మహిళల ఆసియా కప్ 2026టోర్నీలో భారత మహిళల జట్టు తన అజేయ ప్రయాణాన్ని కొనసాగిస్తూ, చిరకాల ప్రత్యర్థి పాకిస్థాన్పై 7 వికెట్ల తేడాతో ఘన విజయాన్ని సాధించింది. దుబాయ్ అంతర్జాతీయ క్రికెట్ స్టేడియంలో జరిగిన ఈ మ్యాచ్లో టాస్ గెలిచి మొదట బ్యాటింగ్కు దిగిన పాకిస్థాన్కు భారత స్పిన్నర్లు చుక్కలు చూపించారు. దాంతో పాక్ జట్టు కేవలం 55 పరుగులకే కుప్పకూలింది. మహిళల టీ20 క్రికెట్ చరిత్రలోనే పాకిస్థాన్కు ఇది అత్యల్ప స్కోరు కావడం గమనార్హం.
భారత బౌలర్ల ధాటికి పాక్ బ్యాటింగ్ లైనప్ పూర్తిగా చేతులెత్తేసింది. ఓపెనర్లు మునీబా అలీ (13), షవాల్ జుల్ఫికర్ (14) మినహా జట్టులో మరెవ్వరూ రెండంకెల స్కోరు కూడా చేయలేకపోయారు. భారత స్పిన్నర్లు శ్రీ చరణి (3/7), ప్రేమ రావత్ (3/9) అద్భుతమైన బౌలింగ్తో పాక్ పతనాన్ని శాసించగా, వారికి దీప్తి శర్మ (2/5) చక్కటి సహకారం అందించింది. వీరి ధాటికి 18.1 ఓవర్లలోనే పాకిస్థాన్ 55 పరుగులకు ఆలౌట్ అయింది.
అనంతరం 56పరుగుల సులువైన లక్ష్యంతో బరిలోకి దిగిన భారత్కు ఆరంభంలో చిన్నపాటి షాక్ తగిలింది. పాక్ కెప్టెన్ ఫాతిమా సనా దాడికి దిగి వరుసగా షఫాలీ వర్మ (12), ప్రతికా రావల్ (4), స్మృతి మంధన (9)లను అవుట్ చేయడంతో భారత్ 29 పరుగులకే 3 వికెట్లు కోల్పోయింది. ఈ దశలో ఒత్తిడికి లోనుకాకుండా కెప్టెన్ హర్మన్ప్రీత్ కౌర్ (18 నాటౌట్) బాధ్యతాయుతంగా ఆడుతూ జట్టును ముందుకు నడిపించింది.
హర్మన్ప్రీత్ కౌర్కి దీప్తి శర్మ (12 నాటౌట్) తోడవడంతో భారత్ మరో వికెట్ పడకుండా సునాయాసంగా లక్ష్యాన్ని చేరుకుంది. కేవలం 8.4 ఓవర్లలోనే 3 వికెట్ల నష్టానికి 57 పరుగులు చేసి విజయభేరి మోగించింది. ఈ ఘన విజయంతో భారత మహిళల జట్టు గ్రూప్-ఎ లో అగ్రస్థానంలో నిలిచి సెమీఫైనల్స్కు మరింత ఆత్మవిశ్వాసంతో అర్హత సాధించింది.
