కిడ్నీలు మన శరీరంలో నిశ్శబ్దంగా పనిచేసే అత్యంత కీలకమైన అవయవాలు. రక్తాన్ని శుద్ధి చేసి వ్యర్థాలను బయటకు పంపడమే కాకుండా, శరీరంలో ద్రవాలు, లవణాల సమతుల్యతను కాపాడటంలో ఇవి ముఖ్యమైన పాత్ర పోషిస్తాయి. అయితే, కిడ్నీల పనితీరులో లోపం తలెత్తినప్పుడు శరీరం కొన్ని ముందస్తు సంకేతాలను ఇస్తుంది. ఈ లక్షణాలను పదేపదే నిర్లక్ష్యం చేయకుండా సరైన సమయంలో కారణాన్ని తెలుసుకోవడం ఎంతో అవసరం.
మూత్రపిండాల సమస్యలు వచ్చినప్పుడు శరీరం రకరకాల సంకేతాలను చూపిస్తుంది. అయితే కిడ్నీ స్టోన్స్, ఇన్ఫెక్షన్లు, మూత్రనాళంలో అడ్డంకులు, దీర్ఘకాలిక మూత్రపిండ వ్యాధి వంటి వేర్వేరు పరిస్థితుల్లో వేర్వేరు లక్షణాలు కనిపిస్తాయి. సాధారణంగా నడుము కింది భాగంలో, పక్కటెముకల కింద ఇరువైపులా నొప్పి రావడం కిడ్నీ సమస్యలకు ప్రధాన సంకేతం.
ఒకవేళ కిడ్నీలో రాళ్లు ఉంటే, ఈ నొప్పి అకస్మాత్తుగా మొదలై తీవ్ర రూపం దాల్చుతుంది. ఇది నడుము నుంచి పొత్తికడుపు, గజ్జల వైపుకూ వ్యాపిస్తుంటుంది. అదే కిడ్నీ ఇన్ఫెక్షన్ అయితే, నొప్పితో పాటు జ్వరం, చలి, మూత్ర విసర్జనలో మంట, తరచుగా మూత్రం రావడం, మూత్రంలో రక్తం పడటం వంటి లక్షణాలు కనిపిస్తాయని ఆరోగ్య నిపుణులు పేర్కొంటున్నారు.
అలాగే, కిడ్నీల పనితీరు గణనీయంగా తగ్గితే శరీరంలో అదనపు ద్రవాలు పేరుకుపోయి కాళ్లు, పాదాలు, చీలమండల వద్ద అకస్మాత్తుగా వాపులు వస్తాయి. వీటితో పాటు తీవ్రమైన అలసట, మూత్ర విసర్జన విధానంలో మార్పులు కూడా గమనించవచ్చు. అయితే, ఛాతీ నొప్పిని మాత్రం కేవలం కిడ్నీ సమస్యగానే భావించకూడదు. తీవ్రమైన కిడ్నీ వ్యాధుల్లో శరీరంలో ద్రవాలు చేరడం వల్ల ఛాతీలో అసౌకర్యం రావచ్చు. కానీ గుండె, ఊపిరితిత్తులకు సంబంధించిన తీవ్రమైన సమస్యల వల్ల కూడా ఛాతీ నొప్పి వస్తుంది. కాబట్టి ఛాతీలో బిగుతుగా అనిపించినా, శ్వాస తీసుకోవడంలో ఇబ్బంది ఉన్నా వెంటనే అత్యవసర వైద్య సహాయం పొందాలి.
చాలావరకు కిడ్నీ వ్యాధులు ప్రారంభ దశల్లో ఎలాంటి స్పష్టమైన లక్షణాలు లేకుండానే పెరుగుతాయి. అందుకే కేవలం నొప్పిని బట్టి సమస్యను నిర్ధారించలేం. రక్త పరీక్షలు, అల్ట్రాసౌండ్ స్కాన్ల ద్వారానే కారణాన్ని సరిగ్గా గుర్తించగలరు.
తీవ్రమైన లేదా పదేపదే వచ్చే నొప్పి, జ్వరం, వాంతులు, మూత్రంలో రక్తం కనిపించడం, మూత్రం తగ్గిపోవడం లేదా కాళ్లలో అకస్మాత్తుగా వాపులు రావడం వంటి లక్షణాలు ఉన్నప్పుడు సొంత వైద్యాన్ని ఆశ్రయించకుండా వెంటనే నిపుణులైన వైద్యుడిని సంప్రదించడం శ్రేయస్కరం.
ముఖ్య గమనిక: ఈ సమాచారం కేవలం మీ అవగాహన కోసం మాత్రమే. ఇది నిపుణుల లేదా వైద్యుల సూచనలకు ప్రత్యామ్నాయం కాదు. ఆరోగ్యానికి సంబంధించిన ఎలాంటి నిర్ణయాలైనా తీసుకునే ముందు ఖచ్చితంగా మీ డాక్టర్ను సంప్రదించాల్సిందిగా మనవి!..
