అరికాళ్లు వేడిగా ఉన్నట్టుగా, మంటగా, సూదులతో గుచ్చినట్టుగా లేదా చీమలు పాకుతున్నట్టుగా అనిపించడం చాలామందిలో కనిపించే సమస్య. ముఖ్యంగా రాత్రి పడుకున్నప్పుడు ఈ మంట మరింత ఎక్కువై నిద్రకు కూడా ఇబ్బంది కలిగించవచ్చు. అయితే అరికాళ్లలో తరచూ మంట రావడం శరీరంలో జరుగుతున్న కొన్ని మార్పులకు సంకేతంగా ఉండొచ్చు.
అరికాళ్లలో మంటకు ప్రధాన కారణాల్లో ఒకటి పెరిఫెరల్ న్యూరోపతి, అంటే శరీరంలోని అంచు నరాలు దెబ్బతినడం. ముఖ్యంగా మధుమేహం ఉన్నవారిలో రక్తంలో చక్కెర స్థాయిలు ఎక్కువకాలం నియంత్రణలో లేకపోతే పాదాలు, కాళ్లలోని నరాలు దెబ్బతిని మంట, తిమ్మిరి, నొప్పి లేదా స్పర్శ తగ్గడం వంటి లక్షణాలు కనిపించవచ్చు.
అదే సమయంలో విటమిన్ బి12 వంటి బి విటమిన్ల లోపం, థైరాయిడ్ సమస్యలు, కిడ్నీ లేదా కాలేయ సంబంధిత సమస్యలు, అధిక మద్యం వినియోగం, కొన్ని మందుల ప్రభావం, నరాలపై ఒత్తిడి వంటి కారణాలు కూడా మంటకు దారితీయవచ్చు. కొన్ని సందర్భాల్లో ఫంగల్ ఇన్ఫెక్షన్ వంటి చర్మ సమస్యల వల్ల కూడా పాదాల్లో మంట లేదా మంటతో కూడిన అసౌకర్యం కలగవచ్చు.
మంటతో పాటు తిమ్మిరి, చీమలు పాకినట్టుగా అనిపించడం, స్పర్శ తగ్గడం, కాళ్లలో బలహీనత లేదా నొప్పి ఉంటే నిర్లక్ష్యం చేయకూడదు. ముఖ్యంగా మధుమేహం ఉన్నవారు పాదాలను ప్రతిరోజూ పరిశీలించాలి. చిన్న గాయం, పుండ్లు, బొబ్బలు లేదా చర్మం ఎర్రబడటం కనిపించినా జాగ్రత్త అవసరం. నరాల స్పర్శ తగ్గినప్పుడు గాయం అయినా గుర్తించకపోయే ప్రమాదం ఉంటుంది.
అరికాళ్లలో మంట కొన్ని వారాలుగా కొనసాగుతున్నా, తీవ్రత పెరుగుతున్నా, కాళ్లపైకి మంట వ్యాపిస్తున్నా లేదా పాదాల్లో స్పర్శ తగ్గుతున్నా వైద్యుడిని సంప్రదించడం మంచిది. అవసరాన్ని బట్టి రక్తంలో చక్కెర, విటమిన్ స్థాయిలు, థైరాయిడ్, కిడ్నీ పనితీరు వంటి అంశాలను పరీక్షించి అసలు కారణాన్ని గుర్తించవచ్చు. కాబట్టి అరికాళ్లలో తరచూ కనిపించే మంటను సాధారణ సమస్యగా వదిలేయకుండా, కారణాన్ని గుర్తించి సరైన చికిత్స తీసుకోవడం ముఖ్యం.
ముఖ్య గమనిక: ఈ సమాచారం కేవలం మీ అవగాహన కోసం మాత్రమే. ఇది నిపుణుల లేదా వైద్యుల సూచనలకు ప్రత్యామ్నాయం కాదు. ఆరోగ్యానికి సంబంధించిన ఎలాంటి నిర్ణయాలైనా తీసుకునే ముందు ఖచ్చితంగా మీ డాక్టర్ను సంప్రదించాల్సిందిగా మనవి!..
