TG: తెలంగాణ ఉద్యమ ఆశలు, ఏళ్ల తరబడి సాగిన ప్రజా పోరాటాల ఆలోచనలే పునాదిగా రాష్ట్ర రాజకీయాల్లోకి సరికొత్త గొంతు రాబోతోంది. దాదాపు 50ఏళ్ల పాటు విప్లవ బాటలో నడిచి, ఆ తర్వాత జన స్రవంతిలోకి వచ్చిన మాజీ మావోయిస్టులే కీలకంగా నిలబడి ‘జన తెలంగాణ పార్టీ’ పేరిట ప్రజల్లోకి అడుగుపెడుతున్నారు. తుపాకీ వదిలి ప్రజాస్వామ్య దారిని ఎంచుకున్న వీరు, ఇప్పుడు నేరుగా జనం సమస్యలపై మైదానంలోకి దిగి కొట్లాడటానికి నడుం కట్టారు.
పార్టీలో ఉన్నదెవరు?
ఈ కొత్త ప్రయాణంలో విప్లవోద్యమాల్లో పని చేసిన సీనియర్లు లంకా పాపిరెడ్డి (లచ్చన్న), న్యాయవాది బల్ల రవీంద్రనాథ్, గురిజాల రవీందర్‌రావు ముందంజలో ఉన్నారు. వీరితో పాటు కాంగ్రెస్, బీఆర్ఎస్ పార్టీలకు చెందిన అభ్యుదయవాదులు, ప్రజాహక్కుల కోసం పనిచేసే కార్యకర్తలు చేయి కలిపారు. అయితే, ఆపరేషన్ కగార్ తర్వాత బయటకొచ్చిన దేవ్‌జీ-సంగ్రామ్ వర్గం గానీ, సోనూ-ఆశన్న వర్గం గానీ ఈ పార్టీలో చేరడం లేదని స్పష్టమైంది.
తొలి పోరాటం అన్నదాతల కోసమే
ఓట్ల రాజకీయాల కంటే ముందే, ప్రజల సమస్యలపై ఉద్యమాలతోనే జనంలోకి వెళ్లాలని ‘జన తెలంగాణ పార్టీ’ డిసైడ్ అయింది. అందుకే పండగ ముగిసిన వెంటనే తెలంగాణ రైతు సమస్యలపై తమ మొదటి పోరాటానికి సన్నద్ధమైంది. రాష్ట్రంలో కనిపిస్తున్న కరువు దానంతటదే వచ్చింది కాదని, పాలకుల తప్పుల వల్లే అన్నదాతలు కష్టాల్లో పడ్డారని పార్టీ చెబుతోంది.
"రైతు సోదరులారా.. కదిలి రండి" అంటూ పిలుపునిచ్చిన ఈ నాయకులు, గ్రామస్థాయి నుంచి పోరుబాట పట్టేందుకు సిద్ధమయ్యారు. ఎల్‌నినో పేరు చెప్పి రైతులకు మొండిచేయి చూపించొద్దని, యాసంగి నష్టపరిహారం కింద ఎకరానికి రూ.15 వేల చొప్పున వెంటనే పరిహారం ఇవ్వాలని డిమాండ్ చేస్తున్నారు. అలాగే ఆర్థిక ఇబ్బందుల్లో ఉన్న రైతులకు వచ్చే ఏడాది మొత్తం వడ్డీ లేని పంట రుణాలు అందించాలని కోరుతున్నారు. ఈ డిమాండ్లను సర్కార్ ముందుంచేందుకు మండల కేంద్రాల్లో ధర్నాలు, ర్యాలీలు చేపట్టి అధికారులకు నేరుగా వినతిపత్రాలు ఇవ్వనున్నారు.
అసలైన అభివృద్ధి లక్ష్యాలతో ఎన్నికల్లోకి..
కేవలం ధర్నాలు చేయడమే కాకుండా, చట్ట సభల్లోకి అడుగుపెట్టి సామాన్యుల గొంతు బలంగా వినిపించాలని ఈ పార్టీ భావిస్తోంది. ఆకాశాన్ని అంటే ప్రాజెక్టులు, లెక్కల్లో కనిపించే జీడీపీ మాత్రమే నిజమైన అభివృద్ధి కాదని.. ఉచిత బడి చదువు, పైసా ఖర్చు లేని వైద్యం, యువతకు భరోసానిచ్చే ఉద్యోగాలు, మనసులో మాట నిర్భయంగా మాట్లాడే స్వేచ్ఛ ఉండటమే అసలైన అభివృద్ధని తమ ఎజెండాలో పెడుతున్నారు.
తెలంగాణ ప్రత్యేక రాష్ట్రం వచ్చి పుష్కర కాలమైనా పేదవాడి బతుకు మారలేదన్న ఆలోచనతో ఉన్న వీరు, త్వరలోనే కేంద్ర ఎన్నికల సంఘం వద్ద పార్టీ పేరును అధికారికంగా నమోదు చేయించనున్నారు. ఆ వెంటనే వరంగల్-ఖమ్మం-నల్లగొండ, హైదరాబాద్-రంగారెడ్డి-మహబూబ్‌నగర్ గ్రాడ్యుయేట్ ఎమ్మెల్సీ ఎన్నికల బరిలో దిగేందుకు ప్లాన్ చేస్తున్నారు. ఏళ్ల తరబడి అడవుల్లో తుపాకులు మోసిన మాజీ మావోలు, ఇప్పుడు ప్రజాస్వామ్య పద్ధతిలో రైతుల తరఫున జనంలోకి రావడం రాష్ట్ర రాజకీయాల్లో సరికొత్త చర్చకు దారితీసింది.
