ఫ్లైదుబాయ్ విమానంలో ఒమనీ కో-పైలట్ దాడి నుంచి విమానాన్ని సురక్షితంగా కాపాడిన భారతీయ పైలట్, కెప్టెన్ స్మిత్ మచ్చార్ ఆరోగ్యం ఆందోళనకరంగా ఉన్నట్లు తెలుస్తోంది. కాక్‌పిట్ గొడ్డలితో కో-పైలట్ జరిపిన దాడిలో మచ్చార్ తీవ్రంగా గాయపడ్డారు. ప్రస్తుతం ఆయనకు యూఏఈలోని అబుధాబిలో ఉన్న మిలిటరీ ఆసుపత్రి నిపుణులు అత్యవసర వైద్యం అందిస్తున్న విషయం తెలిసిందే. ఈ నేపథ్యంలో ఆయన పుర్రెలో తీవ్ర ఫ్రాక్చర్ ఏర్పడినట్లు వైద్యులు తెలిపారు.
గత నెల 30న దుబాయ్ నుంచి టెల్ అవీవ్‌కు వెళ్తున్న ఫ్లైదుబాయ్ విమానంలో ఒమనీ కో-పైలట్ హమామ్ అల్ హమ్మామీ విచక్షణారహితంగా దాడి చేసినప్పటికీ, తీవ్ర గాయాలతోనే మచ్చార్ అతడిని ధైర్యంగా ప్రతిఘటించారు. అనంతరం 174 మంది ప్రయాణికులు, సిబ్బంది ప్రాణాలను కాపాడుతూ విమానాన్ని సౌదీ అరేబియాలోని తబుక్ విమానాశ్రయంలో ఎమర్జెన్సీ ల్యాండ్ చేశారు. ల్యాండింగ్ తర్వాత వెంటనే ఆయనను ప్రిన్స్ సుల్తాన్ బిన్ అబ్దుల్ అజీజ్ ఆసుపత్రికి తరలించగా, అక్కడ ప్రాథమికంగా పుర్రె రీకన్‌‌స్ట్రక్షన్ నిర్వహించారు.
ఆపై మెరుగైన వైద్యం కోసం అబుధాబి మిలిటరీ ఆసుపత్రికి మార్చారు. కెప్టెన్ మచ్చార్ తలకు అయిన గాయాన్ని 'డిప్రెస్డ్ స్కల్ ఫ్రాక్చర్' (Depressed Skull Fracture) గా వైద్య నిపుణులు వర్గీకరించారు. ఈ తరహా గాయాల్లో విరిగిన పుర్రె ఎముక ముక్కలు మెదడు వైపునకు నెట్టబడి, మెదడుపై తీవ్ర ఒత్తిడి తెచ్చే ప్రమాదం ఉందని వైద్యులు వివరించారు. ఇది అత్యంత ప్రమాదకరమైన పరిస్థితి అయినందున ఎమర్జెన్సీ సర్జరీ నిర్వహించి, ఎముక భాగాలను యథాస్థానానికి తెచ్చే ప్రక్రియ పూర్తి చేశారు.
ప్రస్తుతం కెప్టెన్ స్మిత్ మచ్చార్ వేగంగా కోలుకుంటున్నారని, వైద్య చికిత్సకు ఆయన శరీరం చక్కగా స్పందిస్తోందని అబుధాబి వైద్యుల బృందం వెల్లడించింది. బాధితుడిని కలిసేందుకు అధికారులు ఆయన కుటుంబ సభ్యులకు అనుమతినివ్వడంతో, వారు ఆసుపత్రిలో మచ్చార్‌ను పరామర్శించి మాట్లాడారు. వీరోచిత పోరాటంతో వందలాది ప్రాణాలు కాపాడిన మచ్చార్ త్వరగా కోలుకోవాలని ప్రపంచవ్యాప్తంగా ప్రార్థనలు వెల్లువెత్తుతున్నాయి.
