చెన్నై మహానగర ప్రజా రవాణా రంగంలో చారిత్రాత్మక మైలురాయి ఆవిష్కృతమైంది. చెన్నై మెట్రో రైల్ ప్రాజెక్ట్ ఫేజ్-2లో అత్యంత కీలకమైన పూనమల్లి - వడపళని మార్గాన్ని ప్రధాని నరేంద్ర మోదీ, తమిళనాడు సీఎం జోసెఫ్ విజయ్ సంయుక్తంగా ప్రారంభించారు. పోరూర్ బైపాస్ స్టేషన్‌లో ఇరువురు నేతలు పచ్చజెండా ఊపి తొలి మెట్రో రైలు సర్వీసును లాంఛనంగా ప్రారంభించారు. అనంతరం అదే రైలులో కలిసి ప్రయాణించి, అందుబాటులోకి వచ్చిన అధునాతన ప్రయాణ వసతులు, స్టేషన్ల నిర్మాణ శైలిని పరిశీలించారు.
కారిడార్-4లో భాగంగా సుమారు రూ.4,900కోట్ల భారీ వ్యయంతో ఈ 15కిలోమీటర్ల మార్గాన్ని అత్యంత ఆధునిక ప్రమాణాలతో నిర్మించారు. ఈ మార్గంలో మొత్తం 11ఎలివేటెడ్ స్టేషన్లను ఏర్పాటు చేశారు. అంతేకాకుండా, కొన్ని ప్రాంతాల్లో రోడ్డు రద్దీని అధిగమించేందుకు వీలుగా నిర్మించిన డబుల్ డెక్కర్ సెక్షన్ ఈ ప్రాజెక్టులో ప్రత్యేక ఆకర్షణగా నిలిచింది. భవిష్యత్తులో పూర్తిగా డ్రైవర్‌రెస్ విధానంలో రైళ్లను నడిపేందుకు అనువైన అత్యాధునిక సిగ్నలింగ్ వ్యవస్థను ఈ లైన్‌లో పొందుపరిచారు.
ఈ కొత్త మెట్రో మార్గం అందుబాటులోకి రావడంతో చెన్నై పశ్చిమ శివారు ప్రాంతాలైన పూనమల్లి ప్రాంతం నుంచి నగర కేంద్రమైన వడపళని వరకు ప్రయాణ సమయం భారీగా తగ్గనుంది. రోజూ ఆఫీసులు, కాలేజీలకు రాకపోకలు సాగించే వేలాది మంది ఉద్యోగులు, విద్యార్థులకు ట్రాఫిక్ కష్టాలు తప్పనున్నాయి. ఈ ప్రాజెక్టు ప్రారంభంతో చెన్నై నగర మౌలిక సదుపాయాల రంగం మరో మెట్టు ఎక్కిందని, నగర ఆర్థికాభివృద్ధికి ఇది ఎంతగానో దోహదపడుతుందని నిపుణులు అభినందించారు.
ఈ చారిత్రాత్మక ప్రాజెక్టు ప్రారంభోత్సవ వేడుకకు పోరూర్ బైపాస్ స్టేషన్ సర్వాంగ సుందరంగా ముస్తాబైంది. ఈ సందర్భంగా ఏర్పాటు చేసిన ప్రత్యేక కార్యక్రమంలో ప్రధాని మోదీ, సీఎం విజయ్ మాట్లాడుతూ... ప్రజా రవాణా వ్యవస్థను మరింత పటిష్టం చేయడంలో కేంద్ర, రాష్ట్ర ప్రభుత్వాల సమన్వయం ఎంతో స్ఫూర్తిదాయకమని పేర్కొన్నారు. ఫేజ్-2 లోని మిగిలిన మార్గాలను కూడా నిర్దేశిత గడువులోగా పూర్తి చేసి, చెన్నై నగర ప్రజలందరికీ మెరుగైన రవాణా సదుపాయాలు అందిస్తామని వారు స్పష్టం చేశారు.
