ప్రపంచ ప్రసిద్ధ ఆర్టిఫిషియల్ ఇంటెలిజెన్స్(AI) చిప్‌ల తయారీ దిగ్గజ సంస్థ 'ఎన్విడియా' సీఈవో జెన్సన్ హువాంగ్ వివాహేతర సంబంధం వ్యవహారం ప్రపంచవ్యాప్తంగా తీవ్ర కలకలం రేపింది. ఈ నేపథ్యంలో ఆయన భార్య లోరీ మిల్స్ హువాంగ్ (Lori Mills Huang) జీవితం, వారి లవ్ స్టోరీ ప్రస్తుతం పబ్లిక్ డొమైన్‌లో చర్చనీయాంశంగా మారింది. జెన్సన్ హువాంగ్ చైనా ఏజెంట్‌గా అనుమానించబడుతున్న బిజినెస్ ఉమెన్ అలిస్ హువాంగ్‌తో ఎఫైర్ పెట్టుకున్నానని, తన భార్యకు తీవ్రమైన నమ్మకద్రోహం చేశానని బహిరంగంగా అంగీకరించి క్షమాపణలు కోరిన విషయం తెలిసిందే.
అయితే 41ఏళ్లపాటు సాగిన వారి వైవాహిక బంధం దృష్ట్యా లోరీ మిల్స్ వార్తలకెక్కారు. జెన్సన్ హువాంగ్, లోరీ మిల్స్‌ల పరిచయం అమెరికాలోని ఒరెగాన్ స్టేట్ యూనివర్సిటీలో (Oregon State University) ఎలక్ట్రికల్ ఇంజనీరింగ్ చదువుతున్న రోజుల్లో ప్రారంభమైంది. అప్పట్లో కేవలం 17ఏళ్ల వయస్సున్న జెన్సన్, తరగతి గదిలో విద్యుత్ ఇంజనీరింగ్ కోర్సు కోసం ల్యాబ్ పార్ట్‌నర్‌గా ఉండమని లోరీని కోరారు. అలా వారిద్దరి మధ్య ల్యాబ్ భాగస్వామ్యంతో మొదలైన స్నేహం క్రమంగా ప్రణయంగా మారింది. దాదాపు ఐదేళ్ల ప్రేమ అనంతరం 1985లో వీరిద్దరూ వివాహ బంధంతో ఒకటయ్యారు.
లోరీ మిల్స్ సాధారణ గృహిణి మాత్రమే కాదు, ఆమె గతంలో సాంకేతిక రంగంలో ప్రతిభావంతురాలైన ఇంజనీర్‌గా సేవలందించారు. ప్రముఖ టెక్ దిగ్గజ సంస్థ హ్యూలెట్-ప్యాకర్డ్ (HP)లో మైక్రోచిప్ డిజైనర్‌గా ఆమె సుదీర్ఘకాలం పనిచేశారు. ఎన్విడియా సంస్థ ప్రారంభమైన తొలి రోజుల్లో జెన్సన్‌కు వెన్నుదన్నుగా నిలిచారు. అనంతరం ఉద్యోగానికి విరామం ఇచ్చి కుటుంబ బాధ్యతలను స్వీకరించిన లోరీ, 'జెన్-సన్ అండ్ లోరీ హువాంగ్ ఫౌండేషన్' పేరిట స్థాపించిన స్వచ్ఛంద సంస్థ ద్వారా విద్య, వైద్యాభివృద్ధి, విశ్వవిద్యాలయాల పరిశోధనలకు వందలాది మిలియన్ డాలర్ల విరాళాలు అందిస్తూ ప్రపంచవ్యాప్తంగా సామాజిక సేవా కార్యక్రమాలను నిర్వహిస్తున్నారు. ఈ దంపతులకు ఇద్దరు పిల్లలు ఉన్నారు.
తన 17ఏళ్ల వయస్సు ల్యాబ్ భాగస్వామి నుంచి బిలియనీర్ టెక్ టైకూన్‌గా ఎదిగే క్రమంలో అడుగడుగునా తోడున్న భార్య లోరీకి, పిల్లలకు తాను తీరని వేదన మిగిల్చానని జెన్సన్ హువాంగ్ భావోద్వేగంగా ఆవేదన వ్యక్తం చేశారు. చైనా గూఢచర్యం, హనీట్రాప్ ఆరోపణల నేపథ్యంలో ఎన్విడియా బోర్డు స్వతంత్ర దర్యాప్తునకు ఆదేశించగా, బోర్డు జెన్సన్ నాయకత్వంపై నమ్మకం వ్యక్తం చేసింది. అయితే 41ఏళ్ల వివాహ బంధంలో ఎదురైన ఈ అనుకోని సంక్షోభం గ్లోబల్ టెక్ వర్గాల్లో చర్చనీయమైంది.
