ఏపీలో మున్సిపల్ ఎన్నికల హ‌డావుడి
స‌ర్వం సిద్ధ‌మంటున్న రాష్ట్ర ఎన్నికల సంఘం
ఓటర్ల జాబితానే కీలకం
మున్సి.. పోల్స్‌కు సై అంటున్న పార్టీలు
ఆంధ్రప్రదేశ్‌లో మున్సిపల్ ఎన్నికల వేడి మొదలవుతోంది. ఎన్నికలు ఎప్పుడు జరుగుతాయన్న దానిపై ఇంకా పూర్తి స్పష్టత రాకముందే.. రాష్ట్ర ఎన్నికల సంఘం మాత్రం తన పని మొదలుపెట్టింది. వార్డుల వారీగా ఓటర్ల జాబితాల తయారీకి కసరత్తు జరుగుతోంది. దీంతో ఏపీలో మళ్లీ స్థానిక రాజకీయాలు వేడెక్కే పరిస్థితి కనిపిస్తోంది.
ఓటర్ల జాబితానే కీలకం
మున్సిపల్ ఎన్నికలకు ముందు ఓటర్ల జాబితా ఎందుకంత కీలకం? ఏ వార్డులో ఎంత మంది ఓటర్లు ఉన్నారు? కొత్తగా ఎంతమంది చేరారు? ఎవరైనా ఓటర్ల జాబితా నుంచి తొలగిపోయారా? ఒక ప్రాంతం నుంచి మరో ప్రాంతానికి ఓటర్ల మార్పులు ఎంతవరకు జరిగాయి? ఇవన్నీ ఇప్పుడు రాజకీయ పార్టీలకు కీలకంగా మారబోతున్నాయి.
అసెంబ్లీ, లోక్‌సభ ఎన్నికలకు భిన్నంగా మున్సిపల్ ఎన్నికలు పూర్తిగా స్థానిక సమీకరణాలపై ఆధారపడి ఉంటాయి. ఒక్కో వార్డులో 10-20 ఓట్ల తేడాతోనే ఫలితం మారిపోయే అవకాశం ఉంటుంది. అభ్యర్థి వ్యక్తిగత పరిచయం, స్థానిక సమస్యలు, సామాజిక సమీకరణాలు, పార్టీ బలం.. ఇవన్నీ కలిసి ఫలితాన్ని నిర్ణయిస్తాయి. అందుకే వార్డు వారీ ఓటర్ల లెక్క రాజకీయ పార్టీలకు చాలా ముఖ్యం.
ఇక ఓటర్ల జాబితా తర్వాత మరో కీలక అంశం రిజర్వేషన్లు. ఏ వార్డు ఏ సామాజిక వర్గానికి రిజర్వ్‌ అవుతుంది? మహిళలకు ఎన్ని స్థానాలు వస్తాయి? గతంలో రిజర్వ్‌ అయిన వార్డుల పరిస్థితి ఏంటి? అనే అంశాలపై కూడా ఆశావహుల్లో ఆసక్తి పెరుగుతోంది. ఎన్నికల నోటిఫికేషన్‌ రావడానికి ముందే మున్సిపాలిటీల్లో రాజకీయ వ్యూహాలు మొదలయ్యే అవకాశం ఉంది.
అధికార కూట‌మికే కీలకం!
మరోవైపు.. ఈ ఎన్నికలు అధికార కూటమికి కూడా కీలక పరీక్షగా మారనున్నాయి. 2024 అసెంబ్లీ ఎన్నికల తర్వాత రాష్ట్ర రాజకీయ పరిస్థితులు మారాయి. టీడీపీ, జనసేన, బీజేపీ కూటమి అధికారంలోకి వచ్చింది. వైసీపీ ప్రతిపక్షంలోకి వెళ్లింది. ఇప్పుడు స్థానిక సంస్థల ఎన్నికలు జరిగితే.. పట్టణ స్థాయిలో ప్రజల మూడ్‌ ఏ విధంగా ఉందో తెలుసుకునేందుకు ఈ ఫలితాలు ఒక ముఖ్యమైన సూచికగా మారొచ్చు.
ముఖ్యంగా మున్సిపాలిటీల్లో అధికార పార్టీకి బలం ఎంత? వైసీపీ తన పాత క్యాడర్‌ను ఎంతవరకు నిలబెట్టుకుంది? స్థానిక నాయకత్వం ఎవరికి అనుకూలంగా ఉంది? కూటమి పార్టీల మధ్య సమన్వయం ఎలా ఉంటుంది? వంటి ప్రశ్నలకు ఈ ఎన్నికలు సమాధానం చెప్పే అవకాశం ఉంది.
వాస్త‌వానికి స్థానిక ఎన్నికల్లో పార్టీ గుర్తు కంటే అభ్యర్థి ప్రభావం కూడా చాలా సందర్భాల్లో కీలకంగా ఉంటుంది. ఒకే పార్టీలో టికెట్‌ కోసం పోటీ పడే ఆశావహులు ఎక్కువగా ఉంటారు. టికెట్‌ దక్కని నేతలు రెబల్‌గా బరిలోకి దిగితే.. అది అధికార, ప్రతిపక్ష పార్టీల రెండింటికీ తలనొప్పిగా మారొచ్చు. అందుకే ఇప్పుడు పార్టీల దృష్టి కేవలం ఎన్నికల తేదీపై మాత్రమే లేదు. ఓటర్ల జాబితా, వార్డు రిజర్వేషన్లు, అభ్యర్థుల ఎంపిక, స్థానిక రాజకీయ సమీకరణాలపై కూడా ఉంది.
మొత్తానికి.. ఏపీలో మున్సిపల్ ఎన్నికల ప్రక్రియకు తొలి అడుగులు పడుతున్నాయి. ఇప్పటివరకు ఇది అధికారికంగా ఎన్నికల సమరంగా మారకపోయినా.. రాజకీయ పార్టీల వ్యూహాల‌కు మాత్రం కౌంట్‌డౌన్ మొదలైనట్టే. ఓటర్ల జాబితా నుంచి మొదలయ్యే ఈ కసరత్తు.. చివరికి మున్సిపల్ పీఠాలను ద‌క్కించుకునే దాకా పార్టీల మధ్య ర‌స‌వ‌త్త‌ర పోరుగా మార‌నుంది.
