సింగరేణి ప్రభావిత ప్రాంతాల నిరుద్యోగ యువతకు ఉపాధి కల్పించడమే లక్ష్యంగా రాష్ట్ర ప్రభుత్వం అడుగులు వేస్తోంది. ఇందులో భాగంగా ఏర్పాటు చేసిన నైపుణ్య శిక్షణ కార్యక్రమాలు సత్ఫలితాలనిస్తున్నాయి. రామగుండం-1 (ఆర్జీ-1) ఏరియాలోని సింగరేణి జీవీటీసీ (GVTC) నైపుణ్యాభివృద్ధి కేంద్రం ద్వారా నిర్వహించిన ఇంటర్వ్యూలలో స్థానిక యువత అద్భుతమైన విజయం సాధించింది. తాజాగా నిర్వహించిన నియామకాల్లో మొత్తం 112 మంది ఉద్యోగాలకు ఎంపికయ్యారు. కాగా, అందులో హైదరాబాద్‌లోని ప్రముఖ ఎలక్ట్రానిక్స్ తయారీ సంస్థ 'ఫాక్స్కాన్' (Foxconn) కంపెనీలో ఏకంగా 87 మంది మహిళలకు ఉద్యోగాలు దక్కడం విశేషం.
రాష్ట్ర ఉప ముఖ్యమంత్రి, ఇంధన శాఖ మంత్రి భట్టి విక్రమార్క రెండేళ్ల క్రితం ప్రారంభించిన ఈ జీవీటీసీ కేంద్రం ఇప్పటివరకు 500 మందికి పైగా యువతకు ఉపాధి మార్గం చూపింది. తాజాగా ఫాక్స్కాన్ ఆధ్వర్యంలో నిర్వహించిన ప్రత్యేక ఇంటర్వ్యూలలో ఎంపికైన మహిళలు ఆపిల్ ఇయర్పాడ్స్, ఎలక్ట్రానిక్ విడిభాగాల అసెంబ్లింగ్ విభాగాల్లో సేవలు అందించనున్నారు. గ్రామీణ ప్రాంతాల మహిళలకు పారిశ్రామిక రంగంలో లభిస్తున్న ఈ అరుదైన అవకాశాలు వారి ఆర్థిక స్వావలంబనకు, కుటుంబాల అభివృద్ధికి ఎంతగానో తోడ్పడతాయని అధికారులు స్పష్టం చేస్తున్నారు.
ఉద్యోగాలకు ఎంపికైన వారిలో తొలి విడతగా 55మంది మహిళలు ఆదివారం గోదావరిఖని నుంచి ప్రత్యేకంగా హైదరాబాద్‌కు బయలుదేరి వెళ్లారు. మరోవైపు, సోలార్ టెక్నిషియన్ కోర్సు పూర్తి చేసుకున్న 25మంది యువకులు కూడా వివిధ కంపెనీల్లో ఉద్యోగాలకు ఎంపికయ్యారని ఆర్జీ-1 జీఎం డి. లలిత్ కుమార్ తెలిపారు. మార్కెట్‌లో ఎంతో డిమాండ్ ఉన్న ఆధునిక కోర్సుల్లో నైపుణ్య శిక్షణ ఇవ్వడం వల్ల స్థానిక యువతకు ఉపాధి తలుపులు తడుతున్నాయని, భవిష్యత్తులోనూ ఇలాంటి కార్యక్రమాలను మరింత విస్తరిస్తామని ఆయన వెల్లడించారు.
ఈ కార్యక్రమంలో సింగరేణి అధికారులు, టాస్క్ మేనేజర్ డాక్టర్ కౌసల్య, వివిధ కంపెనీల హెచ్‌ఆర్ ప్రతినిధులు పాల్గొని అభ్యర్థులను అభినందించారు. అందివచ్చిన అవకాశాలను సద్వినియోగం చేసుకుని, క్రమశిక్షణతో పనిచేస్తూ వృత్తిలో ఉన్నత స్థాయికి ఎదగాలని నూతన ఉద్యోగులకు సూచించారు. సింగరేణి యాజమాన్యం స్థానిక యువత ఉపాధి కోసం చేపడుతున్న ఈ చర్యలు నిరుద్యోగుల్లో కొత్త ఆశలను రేకెత్తిస్తున్నాయి.
