సూర్యాపేట జిల్లా నడిగూడెం మండలం వల్లాపురం గ్రామంలో తీవ్ర విషాదకర ఘటన చోటుచేసుకుంది. ఊహించని రీతిలో కోతుల గుంపు ఒక్కసారిగా వెంబడించడంతో తీవ్రమైన భయాందోళనకు గురై, గుండె ఆగి ఓ 12 ఏళ్ల బాలుడు ప్రాణాలు కోల్పోయాడు. స్థానికులు, పోలీసుల సమాచారం ప్రకారం.. వల్లాపురం గ్రామానికి చెందిన మొక్క వీరబాబు దంపతులు ఉపాధి నిమిత్తం హైదరాబాద్‌లో నివాసముంటున్నారు. వీరి కుమారుడు మొక్క నిశాంత్ గౌడ్ (12) దసరా సెలవులను ఆనందంగా గడిపేందుకు అమ్మమ్మ ఇంటికి వచ్చాడు.
శుక్రవారం నిశాంత్ తన స్నేహితుడితో కలిసి అమ్మమ్మ ఇంటి నుంచి అదే గ్రామంలోని తమ సొంత ఇంటికి కాలినడకన వెళ్తున్నాడు. ఈ క్రమంలో ఒక్కసారిగా తీవ్రమైన కోతుల గుంపు వారిని వెంబడించాయి. వాటి బారి నుంచి తప్పించుకునేందుకు భయంతో పరుగులు తీసిన నిశాంత్ అదుపుతప్పి కిందపడిపోయాడు. ఈ ప్రమాదంలో బాలుడి కాలి బొటనవేలుకు చిన్నపాటి గాయమైంది. అయితే, ఊహించని రీతిలో కోతులు దాడికి రావడం, ప్రాణభయంతో పరుగులు తీయడంతో బాలుడు అపస్మారక స్థితికి వెళ్లాడు.
వెంటనే స్పందించిన స్థానికులు, బాలుడిని చికిత్స కోసం స్థానిక ఆర్ఎంపీ ప్రాథమిక కేంద్రానికి తీసుకెళ్లగా, ఆయన అందుబాటులో లేరు. దీంతో వెంటనే 108 అంబులెన్స్‌కు సమాచారం అందించి, సమయం వృథా కాకుండా ఒక ఆటోలో ఖమ్మం ప్రభుత్వాసుపత్రికి తరలించే ప్రయత్నం చేశారు. మార్గమధ్యంలోనే 108 అంబులెన్స్ ఎదురురావడంతో బాలుడిని అందులోకి మార్చి పరీక్షించారు. అయితే, అప్పటికే బాలుడు మృతి చెందినట్లు అంబులెన్స్ వైద్య సిబ్బంది నిర్ధారించారు. కోతులు వెంటపడటంతో కలిగిన తీవ్ర భయాందోళన (Extreme Panic) కారణంగా గుండెపోటు వచ్చి బాలుడు మరణించి ఉండవచ్చని అనుమానిస్తున్నారు.
గ్రామాల్లో రోజురోజుకూ పెరిగిపోతున్న కోతుల భయాందోళనల వల్ల అమాయక చిన్నారి ప్రాణాలు కోల్పోవడంపై స్థానికులు తీవ్ర దిగ్భ్రాంతి వ్యక్తం చేస్తున్నారు. కాగా, ఈ విషాద ఘటనపై తమకు ఇప్పటివరకు ఎలాంటి అధికారిక ఫిర్యాదు అందలేదని నడిగూడెం సబ్ ఇన్స్పెక్టర్ తేజస్విని వెల్లడించారు. దసరా సెలవుల్లో సరదాగా అమ్మమ్మ ఇంటికి వచ్చిన బాలుడు తిరిగిరాని లోకాలకు వెళ్లడంతో కుటుంబ సభ్యులు, తల్లిదండ్రులు కన్నీరుమున్నీరుగా విలపిస్తున్నారు.
