సైబర్ నేరాల నియంత్రణలో తెలంగాణ రాష్ట్రం మొదటి స్థానంలో ఉందని తెలంగాణ ముఖ్యమంత్రి ఎనుముల రేవంత్ రెడ్డి అన్నారు. హైదరాబాద్‌లోని ఐసీసీసీ భవనంలో శుక్రవారం నిర్వహించిన ‘దక్షిణ ప్రాంతీయ పోలీసు సమన్వయ కమిటీ’ (SRPCC) ఉన్నత స్థాయి సమావేశంలో ఆయన ముఖ్య అతిథిగా ప్రసంగించారు. దక్షిణ భారతదేశంలోని అన్ని రాష్ట్రాల పోలీసు బలగాల మధ్య పరస్పర సమన్వయాన్ని, సహకారాన్ని మరింత విస్తరించాల్సిన అవసరం ఎంతైనా ఉందని రేవంత్ రెడ్డి పిలుపునిచ్చారు.
భౌగోళిక సరిహద్దులతో సంబంధం లేకుండా నేరాల నియంత్రణే లక్ష్యంగా పొరుగు రాష్ట్రాల పోలీసు వ్యవస్థలతో అత్యాధునిక సాంకేతిక పరిజ్ఞానాన్ని, ఇంటిగ్రేటెడ్ కమాండ్ అండ్ కంట్రోల్ సెంటర్ (ICCC) సామర్థ్యాలను పంచుకోవడానికి తెలంగాణ ప్రభుత్వం పూర్తి సన్నద్ధంగా ఉందని స్పష్టం చేశారు. ఈ సదస్సుకు తెలంగాణ, ఆంధ్రప్రదేశ్, తమిళనాడు, కర్ణాటక, కేరళ రాష్ట్రాల డీజీపీలు, ఐజీలు సహా అండమాన్ నికోబార్, పుదుచ్చేరి, లక్షద్వీప్ ప్రతినిధులు, కేంద్ర దర్యాప్తు సంస్థల ఉన్నతాధికారులు హాజరయ్యారు.
దక్షిణ భారతాన్ని సమగ్ర భద్రతా మండలంగా తీర్చిదిద్దే బాధ్యత పోలీసు అధికారులపై ఉందన్న సీఎం, పోలీసు వ్యవస్థకు కేటాయించే నిధులను ఖర్చుగా చూడకూడదని, సురక్షిత ప్రజా సమాజ నిర్మాణానికి వేసే పటిష్టమైన పెట్టుబడిగా భావించాలని పేర్కొన్నారు. పెరిగిన జనాభా, విస్తరిస్తున్న హైదరాబాద్ పరిధిని దృష్టిలో ఉంచుకుని నగరాన్ని మూడు కమిషనరేట్లుగా పునర్వ్యవస్థీకరించామని, నేరాల అదుపునకు హైడ్రా, ఈగల్, టీ-సేఫ్ వంటి ప్రత్యేక విభాగాలను తీసుకొచ్చామని వివరించారు.
ప్రస్తుతం సైబర్ నేరాలు, మాదకద్రవ్యాల అక్రమ రవాణా, ట్రాఫిక్ సమస్యలు ప్రధాన సవాళ్లుగా పరిణమించాయని, వాటిని సమర్థవంతంగా ఎదుర్కొనేందుకు తెలంగాణ పోలీసులు ప్రత్యేక చర్యలు తీసుకుంటున్నారని సీఎం రేవంత్ వెల్లడించారు. సైబర్ నేరాల నియంత్రణలో తెలంగాణ రాష్ట్రం దేశంలోనే మొదటి స్థానంలో నిలిచిందని ప్రధాని నేతృత్వంలోని 'ప్రగతి' సమీక్షలో కేంద్రం ప్రశంసించిన విషయాన్ని గుర్తుచేశారు. అలాగే రాష్ట్రంలో నక్సలిజం అణచివేతపై కేంద్ర హోంమంత్రి అమిత్ షా అభినందించారని, డ్రగ్స్ రహిత సమాజం కోసం పనిచేస్తున్న 'ఈగల్' విభాగానికి కేంద్రం 80 శాతానికి పైగా రేటింగ్ ఇచ్చిందని గర్వంగా ప్రకటించారు.
బాధితులు కోల్పోయిన డబ్బును రీఫండ్ చేయించడంలో సైబర్ సెక్యూరిటీ బ్యూరో దేశానికే ఆదర్శంగా నిలిచిందన్నారు. ఆహార కల్తీ నివారణ, నాణ్యమైన మూలికా విక్రయాల పర్యవేక్షణ కోసం అమెరికా హెల్త్ మోడల్ తరహాలో 'టీ-సేఫ్' అందుబాటులోకి తెచ్చామని, ప్రభుత్వ ఆస్తుల పరిరక్షణ మరియు చెరువుల పునరుద్ధరణలో 'హైడ్రా' ప్రజాదరణ పొందిందని చెప్పారు. ట్రాఫిక్ నిర్వహణ విభాగంలో ట్రాన్స్‌జెండర్లను 'ట్రాఫిక్ అసిస్టెంట్లు'గా నియమించిన ఘనత కూడా తెలంగాణకే దక్కిందన్నారు. శాంతిభద్రతల పరిరక్షణలో ప్రాణాలు పణంగా పెట్టి పనిచేస్తున్న పోలీసు సిబ్బంది సంక్షేమమే తమ ప్రభుత్వ ప్రథమ ప్రాధాన్యమని సీఎం రేవంత్‌రెడ్డి ఉద్ఘాటించారు.
