TG: టూరిస్ట్‌ స్పాట్లు, ఎడ్యుకేషన్ ప్రతిబింబించాలి.. గ్లోబల్ సమ్మిట్‌పై సీఎం రేవంత్ ఆదేశాలుతెలంగాణ ఖ్యాతిని ప్రపంచ పటంలో సగర్వంగా నిలబెట్టేలా ప్రతిష్టాత్మక ‘ఇన్వెస్ట్ తెలంగాణ గ్లోబల్ సమ్మిట్’ను నిర్వహించాలని ముఖ్యమంత్రి రేవంత్‌రెడ్డి అధికార యంత్రాంగానికి స్పష్టమైన దిశానిర్దేశం చేశారు. రాష్ట్రంలో పెట్టుబడుల ఆకర్షణతో పాటు ఇక్కడి చారిత్రక, పర్యాటక సంపదను, విద్యారంగంలో సాధిస్తున్న విప్లవాత్మక మార్పులను అంతర్జాతీయ వేదికపై ఘనంగా ఆవిష్కరించాలని ఆదేశించారు. సచివాలయంలో సీఎం అధ్యక్షతన జరిగిన మంత్రివర్గ సమావేశంలో డిసెంబర్ 7, 8, 9 తేదీల్లో ఫ్యూచర్ సిటీ వేదికగా అట్టహాసంగా జరగనున్న గ్లోబల్ సదస్సు ఏర్పాట్లపై కూలంకషంగా చర్చించి కీలక నిర్ణయాలు తీసుకున్నారు.
నర్సరీ నుంచి ఆక్స్‌ఫర్డ్ వరకు.. తెలంగాణ బ్రాండ్ కనిపించాలి
రాష్ట్ర విద్యారంగ సమగ్ర స్వరూపం ప్రపంచ ప్రతినిధులకు స్పష్టంగా తెలిసేలా సదస్సులో ప్రత్యేక వేదికలు ఉండాలని సీఎం స్పష్టం చేశారు. "నర్సరీ నుంచి ఆక్స్‌ఫర్డ్ వరకు" సాగుతున్న రాష్ట్ర విద్యా ప్రస్థానాన్ని, ప్రతిష్టాత్మక విద్యా అవకాశాలను సదస్సులో ప్రముఖంగా చర్చించాలని సూచించారు. దీంతోపాటు తెలంగాణలోని ప్రముఖ పర్యాటక ప్రదేశాలు, చారిత్రక కేంద్రాలను ప్రపంచ ప్రతినిధులను ఆకట్టుకునేలా ప్రత్యేక ప్రదర్శనల ద్వారా చాటిచెప్పాలని అధికారులను ఆదేశించారు. అంతేకాకుండా, గ్లోబల్ వార్మింగ్, వాతావరణ మార్పుల వంటి సమకాలీన అంతర్జాతీయ సవాళ్లపై కూడా ఈ సమిట్ వేదికగా విస్తృత సమాలోచనలు జరిగేలా కార్యాచరణ రూపొందించాలని స్పష్టం చేశారు.
ఇతర రాష్ట్రాల ముఖ్యమంత్రులకు ఆహ్వానం..
గ్లోబల్ సమ్మిట్‌ను అత్యంత ప్రతిష్టాత్మకంగా భావిస్తున్న ప్రభుత్వం.. వివిధ దేశాల నుంచి తరలివచ్చే అంతర్జాతీయ ప్రతినిధులు, దిగ్గజ పారిశ్రామికవేత్తలతో పాటు దేశంలోని ఇతర రాష్ట్రాల ముఖ్యమంత్రులను కూడా సాదరంగా ఆహ్వానించాలని నిర్ణయించింది. సదస్సులో పాల్గొనే విదేశీ, స్వదేశీ ప్రముఖులకు ఎలాంటి అసౌకర్యం కలగకుండా ప్రతినిధులకు ప్రత్యేకంగా లైజనింగ్ ఆఫీసర్లను కేటాయించాలని సీఎం రేవంత్‌రెడ్డి ఆదేశించారు. ప్రతినిధుల రిజిస్ట్రేషన్ల ప్రక్రియ, ప్రవేశ పాస్‌ల జారీని ఎలాంటి లోటుపాట్లు లేకుండా వేగంగా పూర్తి చేయాలని సూచించారు. మొత్తం ఏర్పాట్లకు సంబంధించిన సమగ్ర కార్యాచరణ ప్రణాళికను నవంబర్ 15వ తేదీ నాటికే పూర్తిస్థాయిలో సిద్ధం చేసుకోవాలని గడువు విధించారు. కాగా, ఇదే కేబినెట్ భేటీలో ఫ్యూచర్ సిటీ గ్లోబల్ సమ్మిట్ సన్నాహకాలతో పాటు రాష్ట్రంలో రానున్న గ్రాడ్యుయేట్ ఎమ్మెల్సీ ఎన్నికలు, గవర్నర్ కోటా ఎమ్మెల్సీ స్థానాల భర్తీపై కూడా మంత్రివర్గం సుదీర్ఘంగా సమాలోచనలు జరిపింది.
