phonepe diwali insurance: దీపావళి పండుగ వచ్చిందంటే చాలు.. పిల్లల నుంచి పెద్దల దాకా అందరూ బాంబులు కాల్చడానికి తెగ ఉత్సాహం చూపిస్తుంటారు. అయితే ఎంత జాగ్రత్తగా ఉన్నా కొన్నిసార్లు అనుకోకుండా ప్రమాదాలు జరిగిపోతుంటాయి. అలాంటప్పుడు ఆసుపత్రి ఖర్చులు మీదపడితే సామాన్య కుటుంబాలకు చేతిలో చిల్లిగవ్వ లేక పెద్ద తలనొప్పిగా మారుతుంది. సరిగ్గా ఇలాంటి ఇబ్బందులు రాకుండా ఉండేందుకు ప్రముఖ యూపీఐ యాప్ ఫోన్‌పే ఓ అదిరిపోయే ప్లాన్ తీసుకొచ్చింది. కేవలం రూ.11 కడితే చాలు.. ఏకంగా రూ.25,000 వరకు వైద్య ఖర్చులకు భరోసా ఇచ్చేలా ప్రత్యేక బాణసంచా బీమాను (ఫైర్‌క్రాకర్ ఇన్సూరెన్స్) అందుబాటులోకి తెచ్చింది. ఆదిత్య బిర్లా హెల్త్ ఇన్సూరెన్స్‌తో కలిసి ఫోన్‌పే ఈ చిన్న బీమా పాలసీని వరుసగా మూడో ఏడాది కూడా అందిస్తోంది. పండుగ వేళ కాలిన గాయాలైనా లేదా ఇతర ప్రమాదాలు జరిగినా ఆసుపత్రి ఖర్చుల భారం పడకుండా ఇది అండగా నిలుస్తుంది.
ఒక్క పాలసీతో వచ్చే లాభాలు ఇవే
బాణసంచా వల్ల గాయపడి 24 గంటలకు మించి ఆసుపత్రిలో చేరాల్సి వస్తే.. అయిన వైద్య ఖర్చుల్లో గరిష్ఠంగా రూ.25,000 వరకు ఒక్క పాలసీతో క్లెయిమ్ చేసి డబ్బులు వెనక్కి తీసుకోవచ్చు. అలాగే ఒకవేళ చిన్నపాటి కాలిన గాయాలై, 24 గంటల కంటే ముందే డిశ్చార్జ్ అయినా కూడా ఈ పాలసీ వర్తిస్తుంది. ఇలాంటి డే కేర్ చికిత్సలకూ రూ.25,000 వరకు కవరేజీ ఇస్తారు. ఒకవేళ ప్రమాదవశాత్తు పాలసీ తీసుకున్న వ్యక్తి చనిపోతే, ఇంట్లో వాళ్లకు (నామినీకి) ఒకేసారి రూ.25,000 సాయం అందుతుంది. ఇంకో మంచి విషయం ఏంటంటే.. ఆసుపత్రి, డే కేర్ చికిత్సల రక్షణ కేవలం ఒక్కరికే కాదు, పాలసీదారుడితో పాటు ఆయన భార్య/భర్త, అలాగే ఇద్దరు పిల్లలకు కూడా కలిపి వస్తుంది.
రెండు రకాల ప్లాన్లు.. ఏది ఎప్పుడు తీసుకోవచ్చంటే
రూ.21 ప్లాన్ (30 రోజుల గడువు) అక్టోబర్ 15 నుంచే యాప్‌లో అందుబాటులో ఉంది. తీసుకున్న రోజు నుంచి 30 రోజుల పాటు, అంటే నవంబర్ 14 దాకా ఈ ప్లాన్ పనిచేస్తుంది. ఇకపోతే రూ.11 ప్లాన్ (11 రోజుల గడువు) దీపావళికి కాస్త ముందుగా, అంటే నవంబర్ 5 నుంచి నవంబర్ 15 వరకు అందుబాటులోకి వస్తుంది.
ఒక్క నిమిషంలో తీసుకోవచ్చు..
ఫోన్‌పే యాప్ ఓపెన్ చేసి ఇన్సూరెన్స్ ఆప్షన్‌లోకి వెళ్లి ‘ఫైర్‌క్రాకర్ ఇన్సూరెన్స్’ పై క్లిక్ చేయాలి. అక్కడ కావాల్సిన వివరాలు ఇచ్చి, యూపీఐ ద్వారా రూ.11 లేదా రూ.21 కట్టేస్తే చాలు.. వెంటనే పాలసీ స్టార్ట్ అవుతుంది. అతి తక్కువ డబ్బులతో దీపావళి పండుగ పూట కుటుంబానికి రక్షణగా నిలిచే ఈ చిన్న ప్లాన్ ఇప్పుడు జనాల్లో తెగ క్రేజ్ తెచ్చుకుంటోంది.
