TG : నారాయణపేట జిల్లా సబ్ రిజిస్ట్రార్, వివాహాల కార్యాలయంలో ఏసీబీ అధికారులు మంగళవారం ఆకస్మిక తనిఖీలు నిర్వహించారు. డీఎస్పీ బాలకృష్ణ ఆధ్వర్యంలో జరిగిన ఈ రైడ్లో ఇద్దరు అరెస్ట్ అయ్యారు. ఓ రిజిస్ట్రేషన్ వ్యవహారంలో లంచం డిమాండ్ చేసినట్లు అందిన కంప్లైంట్తో ఈ తనిఖీలు నిర్వహించినట్లు అధికారులు వెల్లడించారు. అధికారుల వివరాల ప్రకారం.. జూలైలో జరిగిన ఓ రిజిస్ట్రేషన్ ప్రక్రియకు సంబంధించి సబ్ రిజిస్ట్రార్ లగిశెట్టి వెంకటస్వామి రూ.90 వేల లంచం అడిగినట్లు బాధితులు తమని ఆశ్రయించినట్లు ఏసీబీ డీఎస్పీ తెలిపారు. ఇందులో భాగంగా ఇప్పటికే రూ.50 వేలు చెల్లించిన ఆయన.. మిగిలిన మొత్తాన్ని ఈ రోజు ఇవ్వాల్సి ఉంది. ఆయన ఫిర్యాదుతో రంగంలోకి దిగి నిందితులను అరెస్ట్ చేసినట్లు తెలిపారు.
ఈ వ్యవహారంలో మధ్యవర్తిగా వ్యవహరించిన నాగరాజు (నగేష్) ద్వారా సబ్ రిజిస్ట్రార్ డబ్బులు తీసుకున్నట్లు ప్రాథమికంగా గుర్తించినట్లు డీఎస్పీ తెలిపారు. ఈ ఘటనలో సబ్ రిజిస్ట్రార్తో పాటు మధ్యవర్తిని అదుపులోకి తీసుకుని కేసు ఫైల్ చేసినట్లు చెప్పారు. పూర్తి వివరాలను దర్యాప్తు అనంతరం వెల్లడిస్తామని పేర్కొన్నారు. ప్రభుత్వ కార్యాలయాల్లో అధికారులు లంచం డిమాండ్ చేస్తే ప్రజలు భయపడాల్సిన అవసరం లేదని, ఎవరైనా అవినీతికి పాల్పడుతూ డబ్బులు డిమాండ్ చేస్తే మౌనంగా ఉండకుండా ఏసీబీకి ఫిర్యాదు చేయాలని సూచించారు.
లంచం డిమాండ్ లేదా అవినీతికి సంబంధించిన సమాచారాన్ని ఏసీబీ టోల్ఫ్రీ నంబర్ 1064 కు ఫోన్ చేసి తెలియజేయవచ్చన్నారు. X (ట్విట్టర్) ద్వారా కూడా ఫిర్యాదు చేసే అవకాశం ఉందని, కంప్లైంట్ చేసిన వాళ్ల వివరాలను సీక్రెట్గా ఉంచుతామని స్పష్టం చేశారు. అవినీతి నిర్మూలనలో ప్రజల భాగస్వామ్యం ఎంతో కీలకమని, ప్రభుత్వ సేవల్లో పారదర్శకత పెంచేందుకు పౌరులు ముందుకు రావాలని డీఎస్పీ బాలకృష్ణ కోరారు.
