హైదరాబాద్ నగరంలో ఇటీవల ప్రారంభించిన ఆర్టీసీ-మెట్రో కామన్ పాస్ ఛార్జీలు అధికంగా ఉన్నాయంటూ వస్తున్న ప్రజా వ్యతిరేకతపై రాష్ట్ర ప్రభుత్వం సానుకూలంగా స్పందించింది. ప్రయాణికుల నుంచి వస్తున్న విజ్ఞప్తులు, ఫిర్యాదుల నేపథ్యంలో కామన్ పాస్ ధరలను పునఃపరిశీలించాలని నిర్ణయించినట్లు రాష్ట్ర రవాణా, బీసీ సంక్షేమ శాఖల మంత్రి పొన్నం ప్రభాకర్ మీడియాతో వెల్లడించారు.
ఉప ముఖ్యమంత్రి భట్టి విక్రమార్క సూచనల మేరకు త్వరలోనే రవాణా శాఖ ఉన్నతాధికారులతో ప్రత్యేకంగా సమావేశం నిర్వహించి, ధరల తగ్గింపుపై తగిన నిర్ణయం తీసుకోనున్నట్లు తెలిపారు. ప్రస్తుతం అమల్లో ఉన్న కామన్ పాస్ నిబంధనల ప్రకారం.. రోజువారీ పాస్ ధర రూ.400గా ఉండగా, ఇందులో మెట్రో వాటా రూ.300, ఆర్టీసీ వాటా రూ.100గా ఉంది. అదేవిధంగా నెలవారీ కామన్ పాస్ ధర రూ.8,500 ఉండగా, ఇందులో మెట్రోకు రూ.7,000, ఆర్టీసీకి రూ.1,500 కేటాయించారు.
అయితే ఈ ధరలు సామాన్య, మధ్యతరగతి ప్రజలకు తీవ్ర ఆర్థిక భారంగా మారుతున్నాయని, రోజువారీ ప్రయాణికులు తీవ్ర ఇబ్బందులు పడుతున్నారని పెద్ద ఎత్తున విమర్శలు వెల్లువెత్తాయి. ఈ వాస్తవ పరిస్థితులను ప్రభుత్వం పూర్తిగా పరిగణనలోకి తీసుకుంది. ప్రజా రవాణా వ్యవస్థను మరింత బలోపేతం చేయడంతో పాటు, సామాన్యులు ఆర్టీసీ, మెట్రో సేవలను విస్తృతంగా వినియోగించుకునేలా చేయడమే ప్రభుత్వ ప్రధాన లక్ష్యమని మంత్రి పొన్నం స్పష్టం చేశారు.
ప్రయాణికులపై ఎలాంటి అదనపు ఛార్జీల భారం మోపకుండా, వారి ఆర్థిక స్థోమతకు అనుగుణంగా, సౌకర్యవంతమైన ధరలతో కామన్ పాస్ అందుబాటులో ఉండేలా చర్యలు తీసుకుంటామని భరోసానిచ్చారు. ప్రజల ఆకాంక్షలకు అనుగుణంగా ప్రభుత్వం తీసుకునే ఈ సానుకూల నిర్ణయంపై నగర ప్రయాణికులు హర్షం వ్యక్తం చేస్తున్నారు.
