కేరళ ప్రభుత్వం కీలక ప్రకటన.. శబరిమల, మాళికాపురం ప్రధాన పూజారుల ఎంపిక

 ప్రసిద్ధ పుణ్యక్షేత్రమైన శబరిమల అయ్యప్పస్వామి ఆలయం, అలాగే మాళికప్పురం దేవాలయాలకు కొత్త ప్రధాన పూజారులను (Chief Priests) లాటరీ పద్ధతి ద్వారా ఎంపిక చేశారు. రానున్న మండల, మకరవిళక్కు తీర్థయాత్రల (Mandala-Makaravilakku Season) సీజన్‌ను పురస్కరించుకుని ఈ ఎంపిక ప్రక్రియను నిర్వహించారు. శబరిమల అయ్యప్పస్వామి ఆలయ ప్రధాన పూజారిగా అరీక్కర సుబ్రహ్మణ్యన్ శంకరన్ నంబూదిరి ఎంపిక కాగా, మాళికప్పురం ఆలయ ప్రధాన పూజారిగా ఎ. దామోదరన్ నంబూదిరి ఎన్నికయ్యారు.

 శబరిమల ప్రధాన పూజారిగా ఎంపికైన అరీక్కర సుబ్రహ్మణ్యన్ శంకరన్ నంబూదిరి ప్రస్తుతం తిరువనంతపురంలోని ప్రసిద్ధ పళవంగాడి మహా గణపతి ఆలయంలో ప్రధాన పూజారిగా విధులు నిర్వహిస్తున్నారు. అయ్యప్పస్వామికి సేవ చేసుకునే సువర్ణావకాశం లభించడం తన పూర్వజన్మ సుకృతంగా భావిస్తున్నానని ఆయన సంతోషం వ్యక్తం చేశారు. మరోవైపు, మాళికప్పురం ఆలయ ప్రధాన పూజారిగా ఎన్నికైన ఎ. దామోదరన్ నంబూదిరి ప్రస్తుతం కేరళలోని పయ్యోలికి చెందిన కీజూర్ మహావిష్ణు ఆలయంలో ప్రధాన పూజారిగా సేవలందిస్తున్నారు.

 అయ్యప్పస్వామి, మాళికప్పురత్తమ్మ అనుగ్రహం వల్లే తనకు ఈ పవిత్ర బాధ్యత దక్కిందని ఆయన పేర్కొన్నారు. మండల, మకరవిళక్కు తీర్థయాత్రలకు ముందు జరిగే అత్యంత కీలకమైన ప్రక్రియల్లో ఈ ప్రధాన పూజారుల ఎంపిక ఒకటి. ఈ నేపథ్యంలోనే శబరిమల ఆలయ ద్వారాలను తులా మాస పూజల నిమిత్తం తెరిచారు.

 కేరళ సీఎం శబరిమల సన్నిధానాన్ని సందర్శించి స్వామివారిని దర్శించుకోవడంతో పాటు, రాబోయే తీర్థయాత్ర సీజన్‌కు సంబంధించి నిలక్కల్, పంబ ప్రాంతాల్లో ముందస్తు ఏర్పాట్లను ఉన్నతాధికారులతో సమీక్షించారు. శబరిమలను దేశంలోనే అగ్రగామి తీర్థయాత్ర కేంద్రంగా తీర్చిదిద్దేందుకు, భవిష్యత్తులో తిరుమల తరహాలో అత్యాధునిక వసతులు, సౌకర్యాలు కల్పించేందుకు ప్రభుత్వం ప్రణాళికలు రచిస్తోందని ఆయన వెల్లడించారు.