విజయవాడ ఇంద్రకీలాద్రిపై కొలువైన శ్రీ కనకదుర్గ అమ్మవారి దసరా శరన్నవరాత్రి ఉత్సవాలు అత్యంత కన్నులపండువగా, వైభవంగా జరుగుతున్నాయి. ఉత్సవాల్లో భాగంగా ఏడో రోజైన శనివారం (అక్టోబర్ 17) కనకదుర్గమ్మవారు శ్రీ మహాలక్ష్మి దేవి అలంకారంలో భక్తులకు దివ్యదర్శనమిస్తున్నారు. అష్టలక్ష్మి సమన్వితగా, సర్వ సంపదలకు అధిదేవతగా భాసిల్లే శ్రీ మహాలక్ష్మి దేవి రూపంలో కొలువైన దుర్గమ్మను దర్శించుకునేందుకు వేకువజాము నుంచే భక్తులు ఇంద్రకీలాద్రికి భారీగా పోటెత్తారు.
ఆలయ ప్రాంగణంతో పాటు కొండకింద క్యూలైన్లన్నీ భక్తులతో కిక్కిరిసిపోయాయి. సాధారణ భక్తులకు అమ్మవారి దర్శనం కోసం సుమారు 3 గంటలకు పైగా సమయం పడుతోంది. ఈ శరన్నవరాత్రి వేడుకల్లో భాగంగా అంతర్జాతీయంగానూ, జాతీయంగానూ పలువురు ప్రముఖులు ఇంద్రకీలాద్రిని సందర్శిస్తున్నారు. భారత్‌లో చైనా రాయబారి జు ఫీహాంగ్ (Xu Feihong) తన సతీమణి టాన్ యుక్సియుతో కలిసి శనివారం ఉదయం 8:15 గంటలకు కనకదుర్గ అమ్మవారిని దర్శించుకుని ప్రత్యేక పూజలు నిర్వహించారు.
అనంతరం వారు అమరావతిలోని మహాస్తూపం, ఏఎస్‌ఐ మ్యూజియం, భారీ బుద్ధ విగ్రహాన్ని సందర్శించనున్నారు. సాయంత్రం ముఖ్యమంత్రి నారా చంద్రబాబు నాయుడితో భేటీ కానున్నారు. మరోవైపు, మధ్యప్రదేశ్ ముఖ్యమంత్రి డాక్టర్ మోహన్ యాదవ్ కూడా శనివారం సాయంత్రం దుర్గమ్మను దర్శించుకున్న అనంతరం పున్నమిఘాట్‌లో నిర్వహించనున్న 'విజయవాడ ఉత్సవ్ 2.0', 'సారస్' వేడుకల్లో పాల్గొననున్నారు.
శ్రీశైల భ్రమరాంబికా మల్లికార్జున స్వామివారి దేవస్థానంలోనూ దసరా ఉత్సవాలు అంబరాన్నింటున్నాయి. ఏడో రోజున శ్రీ భ్రమరాంబికాదేవి కాళరాత్రి అలంకారంలో భక్తులకు దర్శనమివ్వగా, గజవాహనంపై ఆసీనులై ఆదిదంపతులు భక్తులను అనుగ్రహించనున్నారు. రాత్రి క్షేత్ర పురవీధుల్లో స్వామి అమ్మవార్ల గ్రామోత్సవం కన్నులపండువగా నిర్వహించనున్నారు. అదేవిధంగా ఏలూరు జిల్లా ద్వారకాతిరుమలలోని శ్రీ కుంకుళ్లమ్మ అమ్మవారు కూడా శనివారం శ్రీ మహాలక్ష్మి అలంకారంలో దర్శనమిస్తూ భక్తుల పూజలు అందుకుంటున్నారు.
తీర్థక్షేత్రాలకు భక్తుల రద్దీని దృష్టిలో ఉంచుకుని దేవస్థానాల అధికారులు, పోలీస్ యంత్రాంగం విస్తృత ఏర్పాట్లు చేశారు. మంచినీరు, పాలు, ప్రసాదాల పంపిణీతో పాటు భక్తులకు ఎలాంటి అసౌకర్యం కలగకుండా ప్రత్యేక పోలీసు బందోబస్తు ఏర్పాటు చేశారు. ఆంధ్రప్రదేశ్‌లోని ప్రముఖ దేవాలయాలన్నీ దసరా నవరాత్రి ఉత్సవాల శోభతో, వేదమంత్రోచ్ఛారణలు, భక్తజన జయ జయధ్వానాలతో ప్రతిధ్వనిస్తున్నాయి.
