భారత క్రికెట్ నియంత్రణ మండలి (BCCI) సీనియర్ పురుషుల సెలక్షన్ కమిటీలో మాజీ చీఫ్ సెలక్టర్ అజిత్ అగర్కర్ పదవీకాలం ముగియడంతో, ఆయన స్థానాన్ని భర్తీ చేసేందుకు సీఏసీ సభ్యులు అశోక్ మల్హోత్రా, జతిన్ పరాంజపేలు అభ్యర్థులకు వర్చువల్‌గా ఇంటర్వ్యూలు నిర్వహించారు. ఈ ఇంటర్వ్యూల సందర్భంగా భారత జట్టు భవిష్యత్ ప్రణాళికలు, ముఖ్యంగా మాజీ కెప్టెన్ రోహిత్ శర్మ వన్డే కెరీర్ ముగింపు, 2027 వన్డే ప్రపంచకప్‌లో ఆయన భాగస్వామ్యంపై దరఖాస్తుదారులకు అత్యంత పదునైన ప్రశ్నలు ఎదురయ్యాయి.
వచ్చే ఏడాది దక్షిణాఫ్రికా, జింబాబ్వే, నమీబియా వేదికలుగా జరగనున్న 2027 వన్డే ప్రపంచకప్‌లో 39 ఏళ్ల రోహిత్ శర్మను కొనసాగించాలా వద్దా? అనే అంశంపై అజిత్ అగర్కర్, బీసీసీఐ పెద్దల మధ్య తీవ్ర అభిప్రాయ భేదాలు తలెత్తినట్లు సమాచారం. రోహిత్ భవిష్యత్తుపై కఠిన వైఖరి అవలంబించడమే అగర్కర్ పదవీకాలాన్ని పొడిగించకపోవడానికి కారణమని ప్రచారం జరుగుతోంది.
ఈ క్రమంలోనే కొత్తగా రాబోయే సెలక్టర్ రోహిత్ శర్మపై ఎలాంటి వ్యూహంతో ముందుకు వెళ్తారు? యువ ఓపెనర్లతో రోహిత్‌ను భర్తీ చేస్తారా? లేదా? ఆయన సీనియారిటీకి మద్దతుగా నిలుస్తారా? అనే అంశాన్ని సీఏసీ ప్రధానంగా ప్రశ్నించింది. దీనితో పాటు, ఇటీవల ముగిసిన సిరీస్‌లలో యశస్వి జైస్వాల్‌ను పక్కనబెట్టడం, యువ సంచలనం వైభవ్ సూర్యవంశీని ప్లేయింగ్ ఎలెవన్‌లోకి తీసుకోకపోవడంపై వ్యక్తమైన విమర్శలను ఎలా హ్యాండిల్ చేస్తారని అభ్యర్థులను నిలదీశారు.
ప్రత్యామ్నాయ నాయకత్వంలో భావి కెప్టెన్ శుభ్‌మన్ గిల్ ఒకవేళ సుదీర్ఘకాలం గాయం బారిన పడితే బ్యాకప్ కెప్టెన్‌గా ఎవరిని ఎంపిక చేస్తారనే కోణంలోనూ అభిప్రాయాలను సేకరించారు. ప్రస్తుతం మాజీ స్పిన్నర్ ప్రజ్ఞాన్ ఓఝా తాత్కాలిక సెలక్షన్ కమిటీ హెడ్‌గా వ్యవహరిస్తున్నప్పటికీ, సరికొత్త సెలక్టర్ ఎంపిక ద్వారా జట్టు మేనేజ్‌మెంట్‌లో మునుపటి కంటే స్పష్టమైన దిశానిర్దేశం తీసుకురావాలని బీసీసీఐ భావిస్తోంది. ఈ ప్రతిష్టాత్మక పదవికి రమేశ్ పవార్, సలీల్ అంకోలాలతో పాటు మాజీ ఓపెనర్ వసీం జాఫర్ కూడా బరిలోకి దిగడంతో పోటీ ఆసక్తికరంగా మారింది.
ప్యానెల్‌లో ఉన్న సభ్యుల కంటే వసీం జాఫర్ అత్యధికంగా 31 టెస్టు మ్యాచ్‌లు ఆడిన అనుభవం కలిగి ఉండటంతో, ఆయన ఎంపికైతే తాత్కాలిక హెడ్ ప్రజ్ఞాన్ ఓఝాను దాటుకుని నేరుగా సెలక్షన్ కమిటీ కొత్త చైర్మన్‌గా నియమితులయ్యే అవకాశం కనిపిస్తోంది. బీసీసీఐ ఇప్పటికే ప్రాధాన్యత కలిగిన అభ్యర్థిపై సూత్రప్రాయ నిర్ణయానికి వచ్చిందని, త్వరలోనే కొత్త సెలక్టర్ పేరును అధికారికంగా వెల్లడించనుందని బోర్డు వర్గాలు తెలిపాయి.
