ప్రధానమంత్రి నరేంద్ర మోదీ నాయకత్వంలో దేశవ్యాప్తంగా ఆరోగ్య రంగంలో విప్లవాత్మక మార్పులు జరుగుతున్నాయని కేంద్ర ఆరోగ్య, కుటుంబ సంక్షేమ శాఖ మంత్రి జేపీ నడ్డా తెలిపారు. గురువారం యాదాద్రి భువనగిరి జిల్లా బీబీనగర్లోని ఎయిమ్స్ను సందర్శించిన ఆయన, కేంద్ర మంత్రి కిషన్ రెడ్డి, ఎంపీలు డీకే అరుణ, లక్ష్మణ్తో కలిసి సంస్థ అభివృద్ధి పనులను సమీక్షించారు.
అనంతరం ఎయిమ్స్లోని వివిధ విభాగాలు, నిర్మాణంలో ఉన్న భవనాలను పరిశీలించి అధికారులతో సమావేశమయ్యారు. ఈ సందర్భంగా మీడియాతో మాట్లాడిన జేపీ నడ్డా, బీబీనగర్ ఎయిమ్స్ను దేశంలోనే అత్యుత్తమ వైద్య, విద్యా, పరిశోధనా కేంద్రంగా తీర్చిదిద్దేందుకు కేంద్ర ప్రభుత్వం కట్టుబడి ఉందని స్పష్టం చేశారు. ప్రస్తుతం రూ.1,000 కోట్లకు పైగా వ్యయంతో నిర్మాణ పనులు కొనసాగుతున్నాయని, ఇప్పటికే 87 శాతం పనులు పూర్తయ్యాయని వెల్లడించారు.
అవసరమైన మౌలిక సదుపాయాల అభివృద్ధి వేగంగా సాగుతోందని పేర్కొన్నారు.. ప్రస్తుతం బీబీనగర్ ఎయిమ్స్లో 24 విభాగాలు పనిచేస్తుండగా, రెండు ఎంబీబీఎస్ బ్యాచ్లు ఇప్పటికే విద్యాభ్యాసం చేస్తున్నాయని తెలిపారు. వైద్య విద్యతో పాటు నాణ్యమైన చికిత్స, పరిశోధనలకు సమాన ప్రాధాన్యం ఇస్తున్నామని పేర్కొన్నారు. సాధారణంగా ఒక ఎయిమ్స్ పూర్తి స్థాయిలో అభివృద్ధి చెందడానికి దాదాపు పదేళ్లు పడుతుందని, కానీ బీబీనగర్ ఎయిమ్స్లో కేవలం రెండేళ్ల వ్యవధిలోనే వైద్య సేవలు ప్రారంభించడం విశేషమని కొనియాడారు.
దక్షిణ భారతదేశంలో బీబీనగర్ ఎయిమ్స్ అగ్రశ్రేణి సంస్థగా ఎదిగే సామర్థ్యం ఉందని జేపీ నడ్డా అభిప్రాయపడ్డారు. ఢిల్లీలోని ఎయిమ్స్ పూర్తి స్థాయి అభివృద్ధి సాధించడానికి రెండు దశాబ్దాల సమయం పట్టిందని, అదే స్థాయిలో బీబీనగర్ ఎయిమ్స్ చాలా వేగంగా ముందుకు సాగుతోందని వివరించారు. వైద్య సేవల విషయానికి వస్తే, రోజుకు సుమారు 1,800 మంది ఓపీ రోగులకు చికిత్స అందిస్తున్నామని తెలిపారు.
అత్యవసర వైద్య సేవలతో పాటు ఆధునిక పరీక్షలు, ప్రత్యేక వైద్య సేవలు అందుబాటులో ఉన్నాయని చెప్పారు. టెలీమెడిసిన్, టెలికన్సల్టేషన్ సేవల ద్వారా గ్రామీణ ప్రాంత ప్రజలకు వైద్యం చేరువవుతోందని, ఇప్పటికే లక్షకు పైగా ప్రజలు ఈ సేవలను వినియోగించుకున్నారని వెల్లడించారు. టెలికన్సల్టేషన్ ద్వారా 1.56 లక్షల మందికి పైగా వైద్య సేవలు అందించామని తెలిపారు.
పరిశోధన రంగంలో కూడా బీబీనగర్ ఎయిమ్స్ విశేష పురోగతి సాధిస్తోందని జేపీ నడ్డా పేర్కొన్నారు. రీసెర్చ్ కార్యకలాపాల కోసం కేంద్ర ప్రభుత్వం రూ.64 కోట్ల నిధులు కేటాయించిందని, ప్రస్తుతం 128 పరిశోధన ప్రాజెక్టులు కొనసాగుతున్నాయని చెప్పారు. అలాగే ప్రజలకు ఆరోగ్యం పై అవగాహన పెంచేందుకు దేశంలో తొలిసారిగా బీబీనగర్ ఎయిమ్స్లో కమ్యూనిటీ రేడియో స్టేషన్ ఏర్పాటు చేసినట్లు వెల్లడించారు.
అదేవిధంగా 547 వైద్య శిబిరాలను నిర్వహించి గ్రామీణ ప్రాంతాల ప్రజలకు నేరుగా వైద్య సేవలు అందించామని తెలిపారు. వైద్య సేవలను ప్రజల వద్దకే తీసుకెళ్లే ప్రయత్నాల్లో భాగంగానే ఈ కార్యక్రమాలు చేపట్టినట్లు వివరించారు. ఎయిమ్స్ల అభివృద్ధిపై మాట్లాడుతూ, ఒకప్పుడు దేశంలో ఢిల్లీలో మాత్రమే ఎయిమ్స్ ఉండేదని గుర్తు చేశారు. మాజీ ప్రధాని అటల్ బిహారీ వాజపేయి హయాంలో మరో ఐదు ఎయిమ్స్ల ఏర్పాటుకు శ్రీకారం చుట్టారని తెలిపారు.
2014లో మోదీ ప్రభుత్వం అధికారంలోకి వచ్చిన తర్వాత ఆరోగ్య రంగానికి అత్యంత ప్రాధాన్యం ఇచ్చి దేశవ్యాప్తంగా కొత్త ఎయిమ్స్ల నిర్మాణానికి శ్రీకారం చుట్టిందని వెల్లడించారు. ఇప్పటికే 19కి పైగా కొత్త ఎయిమ్స్లు ప్రారంభమయ్యాయని, మొత్తం 23 కొత్త ఎయిమ్స్ల నిర్మాణాలు చేపట్టినట్లు పేర్కొన్నారు. వాటిలో అనేక సంస్థలు పూర్తిస్థాయిలో పనిచేస్తుండగా, మిగిలినవి నిర్మాణ దశలో ఉన్నాయని వివరించారు. ఇక బీబీనగర్ ఎయిమ్స్కు ఇప్పటివరకు రూ.1,110 కోట్లకు పైగా నిధులు కేటాయించినట్లు జేపీ నడ్డా వెల్లడించారు.
సంస్థలో బోధనా సిబ్బంది, వైద్య నిపుణులు, అవసరమైన సాంకేతిక సదుపాయాలు అందుబాటులో ఉన్నాయని చెప్పారు. గత పదేళ్లలో దేశ ఆరోగ్య రంగంలో వచ్చిన మార్పులతో ఇప్పుడు కార్పొరేట్ స్థాయి వైద్య సేవలు సాధారణ ప్రజలకు సైతం అందుబాటులోకి తెచ్చినట్టు పేర్కొన్నారు. మొత్తంగా, బీబీనగర్ ఎయిమ్స్ కేవలం ఒక వైద్య కళాశాలగానే కాకుండా, అత్యాధునిక వైద్య సేవలు, ఉన్నత స్థాయి వైద్య విద్య, ప్రపంచ స్థాయి పరిశోధనలు, ప్రజా ఆరోగ్య అవగాహన కార్యక్రమాలకు కేంద్రబిందువుగా మారుతోందని జేపీ నడ్డా స్పష్టం చేశారు. భవిష్యత్తులో ఇది దేశంలోనే ప్రముఖ సెంటర్ ఆఫ్ ఎక్స్లెన్స్గా నిలుస్తుందనే విశ్వాసాన్ని వ్యక్తం చేశారు.
