విజయదశమి (దసరా) పండుగ నేపథ్యంలో తెలంగాణ అటవీ శాఖ ప్రజలకు, ఉత్సవ నిర్వాహకులకు అత్యంత కీలకమైన హెచ్చరికలు జారీ చేసింది. పండుగ వేళ సెంటిమెంట్ పేరుతో తెలంగాణ రాష్ట్ర పక్షి అయిన ‘పాలపిట్ట’ను పంజరాల్లో బంధించి ప్రదర్శించే అక్రమ చర్యలపై ప్రభుత్వం ఉక్కుపాదం మోపడానికి సిద్ధమైంది. నిబంధనలను అతిక్రమించి పాలపిట్టలను బంధిస్తే చట్టపరంగా తీవ్ర పరిణామాలు ఎదుర్కోవాల్సి ఉంటుందని అటవీ దళాల ప్రధాన అధికారి (PCCF) వినయ్ కుమార్ స్పష్టం చేశారు.
తెలంగాణ సాంస్కృతిక ప్రతీకగా నిలిచే పాలపిట్టను సంరక్షించుకోవాల్సిన బాధ్యత ప్రతి ఒక్క పౌరుడిపై ఉందని పిసిసిఎఫ్ గుర్తుచేశారు. దసరా రోజున పాలపిట్ట దర్శనం శుభప్రదంగా భావించినప్పటికీ, వాటిని బోనుల్లో బంధించి ఇబ్బంది పెట్టడం తీవ్రమైన నేరమని పేర్కొన్నారు. ముఖ్యంగా దేవాలయాల పరిసరాల్లో లేదా ఉత్సవాల వేదికల వద్ద వీటిని పంజరాల్లో ఉంచి ప్రదర్శించకుండా తగిన చర్యలు తీసుకోవాలని ఆయన దేవాదాయ శాఖ అధికారులను ప్రత్యేకంగా కోరారు. వన్యప్రాణి సంరక్షణ చట్టం (వైల్డ్ లైఫ్ ప్రొటెక్షన్ యాక్ట్) ప్రకారం పాలపిట్టను బంధించడం, బోనులలో ఉంచడం లేదా హింసించడం పూర్తిగా చట్టవిరుద్ధమని అటవీ శాఖ హెచ్చరించింది.
ఈ నిబంధనలను ఉల్లంఘించిన వారిపై నాన్-బెయిలబుల్ కేసులు నమోదు చేయడంతో పాటు దోషులకు జైలు శిక్ష కూడా పడే అవకాశం ఉందని వివరించారు. దీంతోపాటు, పండుగ వేళ ప్రజల ప్రాణాలకు, పక్షులకు హాని కలిగించే ప్రమాదకరమైన నైలాన్, చైనా మాంజా విక్రయాలపై కూడా అధికారులు కఠినంగా వ్యవహరించాలని PCCF ఆదేశించారు. నిషేధిత మాంజా అమ్మకాలను పూర్తిగా అరికట్టేందుకు విస్తృత తనిఖీలు చేపట్టాలని క్షేత్రస్థాయి అటవీ సిబ్బందికి స్పష్టమైన ఆదేశాలు జారీ అయ్యాయి.
తెలంగాణ ప్రజలకు దసరా పండుగతో పాలపిట్టకు విడదీయరాని ఆధ్యాత్మిక, సాంస్కృతిక బంధం ఉంది. విజయదశమి రోజున పాలపిట్టను దర్శించుకుంటే సకల శుభాలు కలుగుతాయని, చేపట్టిన ప్రతి పనిలో విజయం లభిస్తుందని ప్రజలు బలంగా నమ్ముతారు. రామాయణంలో శ్రీరాముడు రావణాసురుడిపై యుద్ధానికి వెళ్లే ముందు పాలపిట్టను చూసి విజయం సాధించాడని, అలాగే పాండవులు అజ్ఞాతవాసం ముగించి దసరా రోజున జమీ చెట్టు పైనుంచి తమ ఆయుధాలను తీసుకునే సమయంలో పాలపిట్ట వారికీ కనిపించిందని పౌరాణిక గాథలు తెలుపుతున్నాయి. ఈ శుభ శకునం వెనుక ఉన్న నమ్మకంతోనే తెలంగాణ ప్రభుత్వం పాలపిట్టను రాష్ట్ర పక్షిగా గుర్తించింది.
