Harish Rao: తెలంగాణ రాజకీయాల్లో హాట్ టాపిక్ గా మారిన కొండా సురేఖ బర్తరఫ్ అంశంపై మాజీ మంత్రి హరీశ్ రావు స్పందించారు. సీఎం రేవంత్ ను తిట్టారని కొండా సురేఖపై చర్యలు తీసుకున్నారు.. మరి నిషేధిత భూముల పేరుతో ప్రజలను పట్టిపీడిస్తున్న, రాత్రికి రాత్రి పేదలకు చెందిన లక్షలాది ఎకరాల భూములను నిషేధిత జాబితాలో పెట్టిన మంత్రి పొంగులేటి శ్రీనివాస రెడ్డిపై ఎందుకు చర్యలు తీసుకోవడం లేదని హరీశ్ రావు ప్రశ్నించారు.
అమాయక ప్రజల భూములను నిషేధిత జాబితాలో పెట్టిన మంత్రి పొంగులేటిని.. అసెంబ్లీకి రాకుండా నిషేధిత జాబితాలో మీరు పెట్టండి అని సీఎం రేవంత్ ను డిమాండ్ చేశారు. రేవంత్ తో పొంగులేటికి ఏం పొత్తుందో చెప్పాలన్నారు హరీశ్ రావు. మంత్రి పొంగులేటి క్షమాపణ చెబితే సరిపోదని విరుచుకుపడ్డారు. కుమురం భీం జిల్లా కాగజ్ నగర్ లో బహిరంగ సభలో హరీశ్ రావు మాట్లాడారు.
22ఏ నిషేధిత భూముల జాబితా పేరుతో ప్రజలను రేవంత్ సర్కార్ వేధిస్తోందని హరీశ్ రావు ఆగ్రహం వ్యక్తం చేశారు. ఒక్క సిర్పూర్ నియోజకవర్గంలోనే 42వేల 867 ఎకరాలను నిషేధిత జాబితాలో పెట్టారని హరీశ్ ఆరోపించారు. నిషేధిత జాబితాలో పెట్టిన పేదల భూములను వెంటనే విడుదల చేయాలని హరీశ్ రావు డిమాండ్ చేశారు. పేదల భూములను రిలీజ్ చేయకపోతే అసెంబ్లీని ముట్టడిస్తామని హెచ్చరించారు.
సీఎం రేవంత్ పాలన కమీషన్లమయంగా మారిందని.. వెయ్యి రోజుల పాలన వెయ్యి రోజుల పడగల కింద విస్తరించిందని విమర్శలు గుప్పించారు. పక్క రాష్ట్రంలో పెన్షన్లు ఇస్తుంటే.. రేవంత్ ఇంతవరకు ఒక్క పెన్షన్ కూడా ఇవ్వలేదని దుయ్యబట్టారు. కాంగ్రెస్ పాలనలో కబ్జాలు పెరిగిపోయాయని ఆరోపించారు.
''రేవంత్ వెయ్యి రోజుల పాలనలో కబ్జాలు పెరిగాయి, కుంభకోణాలు పెరిగాయి, లూటీలు, సెటిల్ మెంట్లు పెరిగాయి. ఈ వెయ్యి రోజుల్లో పాలన అస్తవ్యస్తమైంది తప్ప ఎక్కడా ఒక్క అడుగు ముందుకు పడింది లేదు. అభివృద్ధి మటుమాయం అయిపోయింది. రేవంత్ పాలనలో సంక్షేమం బంద్ అయిపోయింది. వెయ్యి పడగలతో అవినీతి విస్తరణ జరిగింది. కమీషన్లు రావని కేసీఆర్ ప్రభుత్వం ప్రారంభించిన పథకాలు ఒక్కొక్కటి మాయం చేస్తున్నారు. కమీషన్ల చుట్టూ రేవంత్ పాలన జరుగుతోంది'' అని హరీశ్ రావు విరుచుకుపడ్డారు.
బీఆర్ఎస్ అధినేత, మాజీ ముఖ్యమంత్రి కేసీఆర్ భూములు ఇస్తే.. ఇప్పటి సీఎం రేవంత్ రెడ్డి వాటిని లాక్కుంటున్నారని హరీశ్ రావు మండిపడ్డారు. రైతుల జీవితాలతో రేవంత్ రెడ్డి ఆడుకుంటున్నారని ధ్వజమెత్తారు. అసెంబ్లీ వేదికగా 22ఏపై పోరాటం చేస్తామని ప్రకటించారు.
