తమిళ రాజకీయాల్లో మరో స్టార్ ఎంట్రీకి రంగం సిద్ధం
అభిమాన సంఘాలతో సమావేశాలు.. అన్నాడీఎంకే ఆహ్వానం
టీవీకేకు పోటీగా ధనుష్..
తమిళనాట మరో పొలిటికల్ వార్?
తమిళనాడు రాజకీయాల్లో ఇప్పటివరకు ఒక లెక్క.. ఇకపై మరో లెక్క అనే చర్చ మొదలవుతోందా? ఇన్నాళ్లూ వెండితెరపై తన నటనతో ప్రేక్షకులను కట్టిపడేసిన ధనుష్.. ఇప్పుడు రాజకీయ తెరపైకి అడుగుపెట్టబోతున్నారా? ఇప్పటికే తమిళగ వెట్రి కళగం పేరుతో రాజకీయాల్లో ప్రకంపనలు సృష్టిస్తున్న విజయ్‌కు పోటీగా మరో స్టార్ హీరో రంగంలోకి దిగబోతున్నారా? అభిమాన సంఘాలతో సమావేశాలు, రాజకీయ పార్టీల నుంచి ఆహ్వానాలు.. ఈ పరిణామాలన్నీ తమిళ రాజకీయాల్లో కొత్త చర్చకు తెరలేపుతున్నాయి.
ఒకవైపు విజయ్ తన రాజకీయ ప్రయాణాన్ని ముందుకు తీసుకెళ్తుంటే.. మరోవైపు ధనుష్ పేరు రాజకీయ వర్గాల్లో చర్చకు రావడం ఆసక్తిని పెంచుతోంది. ముఖ్యంగా అభిమాన సంఘాలను బలోపేతం చేయడం, వాటిని సేవా కార్యక్రమాల వైపు నడిపించడం వంటి పరిణామాలతో ధనుష్ రాజకీయాల్లోకి వస్తారనే ప్రచారం ఊపందుకుంది. అయితే ధనుష్ ఇప్పటివరకు రాజకీయ ప్రవేశంపై అధికారిక ప్రకటన చేయలేదు. మరి ఈ ప్రచారం వెనుక ఉన్న అసలు కథేంటి? తమిళనాట విజయ్‌కు ధనుష్ ప్రత్యర్థిగా మారే అవకాశాలున్నాయా?
అభిమాన సంఘాలతో ధనుష్ భేటీ.. రాజకీయాలకు సంకేతమా?
ధనుష్ రాజకీయ ప్రవేశంపై చర్చకు ప్రధాన కారణం ఆయన అభిమాన సంఘాల కార్యకలాపాలు. అక్టోబర్ 25న చెన్నైలో జరిగిన అభిమాన సంఘం సమావేశం ఇప్పుడు ప్రత్యేకంగా చర్చకు వస్తోంది. ఈ కార్యక్రమానికి వేలాది మంది అభిమానులు, మహిళా సభ్యులు హాజయ్యారు. వారితో ధనుష్ సమావేశమవడం, మాట్లాడటం, ఫొటోలు దిగడం వంటి పరిణామాలు ఆయన రాజకీయ భవిష్యత్తుపై ఊహాగానాలకు కారణమయ్యాయి.
సినిమా హీరోల అభిమాన సంఘాలు కేవలం సినిమా ప్రచారానికే పరిమితం కాకుండా, సామాజిక సేవా కార్యక్రమాల్లోనూ చురుగ్గా పాల్గొంటే వాటికి క్రమంగా ఒక ప్రత్యేకమైన గుర్తింపు ఏర్పడుతుంది. అదే నెట్‌వర్క్ భవిష్యత్తులో రాజకీయాలకు పునాదిగా మారే అవకాశం కూడా ఉంటుంది. తమిళనాడు రాజకీయ చరిత్రలో అభిమాన సంఘాల ప్రభావం ఎప్పటినుంచో ఉంది.
అన్నాడీఎంకే ఆహ్వానం.. ధనుష్ ఏం చేయబోతున్నారు?
ధనుష్ రాజకీయ ప్రవేశంపై జరుగుతున్న చర్చలో అన్నాడీఎంకే ప్రస్తావన మరింత ఆసక్తిని పెంచుతోంది. ధనుష్ తమ పార్టీలో చేరాలనుకుంటే స్వాగతిస్తామని అన్నాడీఎంకే నేత, మాజీ మంత్రి కేటీ రాజేంద్ర బాలాజీ గతంలో వ్యాఖ్యానించారు. ధనుష్ సినిమాల్లో సామాజిక సమస్యలకు ప్రాధాన్యం ఉంటుందని, ఆయన రాజకీయాల్లోకి వస్తే తమ పార్టీతో కలిసి పనిచేసే అవకాశాన్ని పరిశీలించవచ్చనే సంకేతాలు ఇచ్చారు.
ధనుష్ రాజకీయాల్లోకి రావాలని నిర్ణయించుకుంటే ఎలాంటి అడుగులు వేస్తారు..? సొంత పార్టీ ఏర్పాటు చేస్తారా? అన్నాడీఎంకే వంటి పార్టీతో కలిసి పనిచేస్తారా? లేక ప్రస్తుతానికి రాజకీయాలకు దూరంగా ఉంటారా? ఈ మూడు అవకాశాల్లో ఏది ఎంచుకున్నా తమిళ రాజకీయాల్లో చర్చకు దారితీసే అవకాశముంది.
టీవీకేకు పోటీగా ధనుష్.. విజయ్‌కు కొత్త సవాలా?
ఇక్కడే అసలు రాజకీయ ఆసక్తి మొదలవుతోంది. ఇప్పటికే విజయ్ తన అభిమానుల బలాన్ని రాజకీయ వేదికగా మార్చి తమిళగ వెట్రి కళగం ద్వారా రాజకీయాల్లోకి అడుగుపెట్టారు. తొలి ఎన్నికల్లోనే గెలిచి తమిళనాడు సీఎంగా రికార్డు క్రియేట్ చేశారు. సినీ ప్రేక్షకుల్లో ఉన్న ప్రజాదరణను రాజకీయ మద్దతుగా మార్చుకోవడంలో సక్సెస్ అయ్యారు. ఇప్పుడు ధనుష్ కూడా రాజకీయాల్లోకి వస్తే, తమిళనాట మరో సినీ స్టార్స్ చుట్టూ కొత్త రాజకీయ సమీకరణాలు ఏర్పడే అవకాశం ఉంటుంది.
విజయ్‌కు అభిమానుల బలం, రాజకీయ పార్టీ నిర్మాణం ఒకవైపు ఉంటే.. ధనుష్‌కు ప్రత్యేకమైన సినీ గుర్తింపు, అభిమాన సంఘాల నెట్‌వర్క్ మరోవైపు ఉంటాయి. ఇద్దరూ సినీ నేపథ్యం నుంచి వచ్చినప్పటికీ, రాజకీయాల్లో వారి ప్రయాణం ఒకేలా ఉంటుందని చెప్పలేం. విజయ్ ఇప్పటికే సీఎంగా ముందుకు సాగుతుండగా, ధనుష్ మాత్రం ఇంకా రాజకీయ ప్రవేశాన్ని ప్రకటించలేదు.
అయితే ధనుష్ రాజకీయాల్లోకి వస్తే యువతను ఆకర్షించగలరా? విజయ్‌కు మద్దతుగా ఉన్న ఓటర్లలో కొంత భాగాన్ని తనవైపు తిప్పుకోగలరా? అన్న ప్రశ్నలు సహజంగానే తలెత్తుతాయి. అదే సమయంలో తమిళనాడులో ఇప్పటికే బలంగా ఉన్న డీఎంకే, అన్నాడీఎంకే, టీవీకే వంటి పార్టీల మధ్య తనకంటూ ప్రత్యేకమైన స్థానం సంపాదించడం అంత సులభం కాదు.
స్టార్ ఇమేజ్ సరిపోతుందా.. రాజకీయ బలం కూడా కావాలి!
సినిమాల్లో స్టార్‌గా ఎదగడం ఒక ఎత్తు.. రాజకీయాల్లో ప్రజల విశ్వాసాన్ని గెలుచుకోవడం మరో ఎత్తు. తెరపై హీరోగా కనిపించినంత మాత్రాన ఎన్నికల్లో విజయం సాధించడం సాధ్యం కాదు. ప్రజా సమస్యలపై స్పష్టమైన వైఖరి, క్షేత్రస్థాయిలో కార్యకర్తల బలం, బలమైన నాయకత్వ బృందం, ఎన్నికల నిర్వహణ సామర్థ్యం.. ఇవన్నీ రాజకీయ విజయాన్ని నిర్ణయిస్తాయి.
ధనుష్ రాజకీయాల్లోకి వస్తే ఆయన ముందున్న అతిపెద్ద సవాల్ ఇదే. అభిమానుల ఆదరణను ఓట్లుగా మార్చుకోవాలి. యువతను ఆకర్షించడంతోపాటు గ్రామీణ ప్రాంతాల్లోనూ తన ప్రభావాన్ని విస్తరించాలి. అంతేకాదు, తమిళనాడు రాజకీయాల్లో దశాబ్దాలుగా పాతుకుపోయిన పార్టీలకు భిన్నంగా తన రాజకీయ అజెండా ఏమిటో ప్రజలకు వివరించాల్సి ఉంటుంది.
అసురన్ రాజకీయాల్లోకి వస్తే.. తమిళనాట కొత్త సమరం తప్పదా?
మొత్తానికి, అభిమాన సంఘాలతో ధనుష్ సమావేశాలు, అన్నాడీఎంకే నేతల ఆహ్వానం.. ఈ పరిణామాలు ఆయన రాజకీయ భవిష్యత్తుపై ఆసక్తిని పెంచుతున్నాయి. అయితే రాజకీయ ప్రవేశంపై అధికారిక ప్రకటన వచ్చే వరకు ఆయన ఎన్నికల బరిలోకి దిగుతున్నారని నిర్ధారించలేం.
ధనుష్ సొంత పార్టీ పెడితే ఒక కొత్త రాజకీయ అధ్యాయం మొదలవుతుంది. అన్నాడీఎంకేతో కలిసి వస్తే మరో రకమైన సమీకరణాలు ఏర్పడవచ్చు. రాజకీయాలకు దూరంగా ఉంటే ఈ ప్రచారం ఊహాగానంగానే మిగిలిపోవచ్చు.
కానీ ఒక్క విషయం మాత్రం స్పష్టం. తమిళనాడు రాజకీయాల్లో సినీ తారల ప్రభావం మరోసారి చర్చనీయాంశంగా మారింది. విజయ్ ఇప్పటికే రాజకీయ రంగంలో ఉన్నారు. ఇప్పుడు ధనుష్ పేరు కూడా వినిపిస్తోంది. మరి అసురన్ నిజంగానే రాజకీయ రంగంలోకి దిగుతారా? దిగితే టీవీకేకు సవాల్ విసురుతారా? తమిళనాట విజయ్ వర్సెస్ ధనుష్ పోరు నిజమవుతుందా? ఈ ప్రశ్నలకు సమాధానం చెప్పాల్సింది ధనుషే. ఆయన రాజకీయ ప్రవేశంపై అధికారిక ప్రకటన వచ్చే వరకు తమిళనాడు రాజకీయాల్లో ఈ చర్చకు తెరపడేలా కనిపించడం లేదు.
