TG: ప్రపంచవ్యాప్తంగా ప్రస్తుతం ప్రజాస్వామ్యం, నియంతృత్వం అనే రెండు శక్తుల మధ్య తీవ్ర పోరాటం కొనసాగుతోందని తెలంగాణ ముఖ్యమంత్రి రేవంత్ రెడ్డి వ్యాఖ్యానించారు. రాజ్యాంగ వ్యవస్థలను బలహీనపరిచి, అధికారాన్ని కేవలం ఒకే వ్యక్తి లేదా ఒకే పార్టీ చేతుల్లో కేంద్రీకరించేందుకు కొన్ని శక్తులు ప్రయత్నిస్తున్నాయని ఆయన ఆరోపించారు. తాము రాజ్యాంగం, చట్టబద్ధ పాలన, ప్రజాస్వామ్య విలువల పరిరక్షణ కోసం పోరాడుతున్నామని సీఎం స్పష్టం చేశారు.
బిలియనీర్ల కోసమా.. సామాన్యుల కోసమా?
ప్రభుత్వాలు కొద్దిమంది బడా పారిశ్రామికవేత్తలు, బిలియనీర్ల ప్రయోజనాల కోసం కాకుండా కోట్లాది మంది సామాన్య ప్రజల సంక్షేమం కోసం పనిచేయాలని రేవంత్ రెడ్డి అభిప్రాయపడ్డారు. పేదలు, రైతులు, మహిళలు, మైనారిటీల హక్కులను కాపాడటంతో పాటు సామాజిక న్యాయం, సమాన అవకాశాల కల్పనే తమ ప్రధాన లక్ష్యమని ఆయన పేర్కొన్నారు. చర్చలు, సంప్రదింపుల ద్వారా సమస్యలను పరిష్కరించుకోవడాన్ని తాము విశ్వసిస్తుంటే.. ప్రత్యర్థి శక్తులు మాత్రం ఒకే వ్యక్తి, ఒకే పార్టీ ఆదేశాల మేరకు వ్యవస్థంతా నడవాలని భావిస్తున్నాయని రేవంత్ రెడ్డి విమర్శించారు.
ప్రపంచ దేశాలన్నీ ఒకే తరహా సమస్యలను ఎదుర్కొంటున్నాయి!
గ్లోబలైజేషన్, కరోనా మహమ్మారి పరిణామాల తర్వాత ప్రపంచంలోని దాదాపు అన్ని దేశాలు ఒకే తరహా సవాళ్లను ఎదుర్కొంటున్నాయని సీఎం అన్నారు. ముఖ్యంగా ప్రాథమిక హక్కులపై దాడులు జరగడంతో పాటు విద్య, ఉపాధి, వైద్యం, ద్రవ్యోల్బణం వంటి అంశాలు ప్రజలను తీవ్రంగా ప్రభావితం చేస్తున్నాయని పేర్కొన్నారు. ప్రజల ఆకాంక్షలను అర్థం చేసుకుని, వారి కలలను సాకారం చేయాల్సిన బాధ్యత ప్రజాస్వామ్య శక్తులపై ఉందని ఆయన తెలిపారు.
రాహుల్ గాంధీ నాయకత్వంలోనే దేశంలో మార్పు..
దేశంలో ప్రజాస్వామ్య పరిరక్షణ కోసం సాగుతున్న ఈ పోరాటానికి కాంగ్రెస్ అగ్రనేత రాహుల్ గాంధీ నాయకత్వం వహిస్తున్నారని రేవంత్ రెడ్డి అన్నారు. పౌరులందరి ఓటు హక్కును కాపాడటంతో పాటు దళితులు, మైనారిటీలు, ఓబీసీలకు సామాజిక న్యాయం కల్పించేందుకు రాహుల్ గాంధీ పోరాడుతున్నారని చెప్పారు. ఆయన నాయకత్వంలోనే దేశంలో మార్పు తీసుకొస్తామని, ప్రజలందరూ రాహుల్ గాంధీకి అండగా నిలవాలని కోరారు. సత్యం, ప్రజాస్వామ్యం కోసం పోరాడుతున్న తమను అడ్డుకోగలమని ప్రత్యర్థులు భావించడం భ్రమ మాత్రమేనని రేవంత్ రెడ్డి పేర్కొన్నారు.
