పశ్చిమాసియాలో మరోసారి యుద్ధ మేఘాలు కమ్ముకున్నాయి. మిడిల్ ఈస్ట్ ప్రాంతం మళ్లీ కల్లోలానికి కేంద్ర బిందువుగా మారింది. ఇరాన్, దాని ప్రాక్సీ దళాలు ఒకవైపు, అమెరికా-ఇజ్రాయెల్ కూటమి మరోవైపు మోహరించడంతో ఈ రెండు వర్గాల మధ్య తీవ్ర ఘర్షణ వాతావరణం నెలకొంది. నిమిషానికో మలుపు తిరుగుతున్న ఈ పరిస్థితులలో ఏ క్షణాన ఏం జరుగుతుందోనన్న భయాందోళనలు ప్రపంచవ్యాప్తంగా వ్యక్తమవుతున్నాయి.
మరోవైపు రాబోయే సైనిక ముప్పును ముందే పసిగట్టిన ఇరాన్ తమ రక్షణ వ్యవస్థలను సర్వసన్నద్ధం చేయడంతో పాటు, సైన్యానికి కీలక ఆదేశాలు జారీ చేసింది. పరిస్థితుల తీవ్రతను దృష్టిలో ఉంచుకుని, అమెరికా అధ్యక్షుడు డొనాల్డ్ ట్రంప్ తన క్యాంప్ పర్యటనను హుటాహుటిన రద్దు చేసుకుని అత్యవసరంగా వైట్ హౌస్కు చేరుకున్నారు. అటు ఇజ్రాయెల్ ప్రధాని బెంజిమిన్ నెతన్యాహు కూడా తన అమెరికా పర్యటనను మధ్యలోనే ముగించుకుని హుటాహుటిన స్వదేశానికి తిరుగు పయనమయ్యారు.
ఈ యుద్ధ సెగలు పొరుగు దేశాలకు సైతం వ్యాపిస్తున్నాయి. యెమెన్లోని హౌతీ తిరుగుబాటుదారులు ఏకంగా సౌదీ అరేబియాలోని కీలక విమానాశ్రయాలు, రక్షణ స్థావరాలే లక్ష్యంగా దాడులకు తెగబడటం కలకలం రేపుతోంది. ఈ పరిణామాల నేపథ్యంలో పశ్చిమాసియా మీదుగా వెళ్లే వైమానిక మార్గాలను పూర్తిగా మూసివేసే అవకాశం ఉందని జాతీయ, అంతర్జాతీయ మీడియా కథనాలు పేర్కొంటున్నాయి. అదే జరిగితే, అంతర్జాతీయ విమానాల రద్దుతో ప్రపంచవ్యాప్తంగా ప్రయాణాలకు తీవ్ర విఘాతం కలగనుంది.
ఈ ఉద్రిక్త వాతావరణం పట్ల అగ్రరాజ్యం అమెరికా అత్యంత అప్రమత్తమైంది. విదేశాల్లోని తమ రాయబార కార్యాలయాలపై దాడులు జరిగే ప్రమాదం ఉందని అమెరికా విదేశాంగ శాఖ తీవ్ర హెచ్చరికలు జారీ చేసింది. విదేశాల్లో ఉన్న అమెరికన్ పౌరులంతా ఎప్పటికప్పుడు అప్రమత్తంగా ఉండాలని సూచించింది. మరోవైపు, సౌదీ అరేబియాలో నివసిస్తున్న తమ పౌరులు అడుగడుగునా జాగ్రత్తలు పాటించాలని ఇటలీ ప్రభుత్వం కూడా ప్రత్యేక అడ్వైజరీ జారీ చేసింది.
మొత్తానికి పశ్చిమాసియాలో నెలకొన్న తాజా పరిస్థితులు తీవ్ర ఆందోళన కలిగిస్తున్నాయి. అగ్రనేతల అత్యవసర సమావేశాలు, భద్రతా బలగాల మోహరింపులు, వరుస దాడులతో మిడిల్ ఈస్ట్ మళ్లీ నివురుగప్పిన నిప్పులా మారింది. పరిస్థితి క్షీణిస్తుండటంతో, ఎప్పుడు ఏ దేశం నుంచి ఎలాంటి పరిణామం ఎదురవుతుందోనని ప్రపంచ దేశాలు ఆందోళన వ్యక్తం చేస్తున్నాయి.
