AP : ఏపీ సీఎం నారా చంద్రబాబు నాయుడు పాల్గొన్న బహిరంగ సభ సమీపంలో గ్యాస్ సిలిండర్ పేలడం తీవ్ర కలకలం రేపింది. బుధవారం సాయంత్రం విజయవాడ అజిత్ సింగ్ నగర్‌లోని మాకినేని బసవపున్నయ్య స్టేడియం సమీపంలో ఈ ఘటన చోటుచేసుకుంది.
ముఖ్యమంత్రి సభ జరుగుతున్న ప్రాంతానికి సమీపంలోనే ఒక్కసారిగా భారీ శబ్దంతో పేలుడు సంభవించడంతో సభకు హాజరైన ప్రజలు తీవ్ర భయాందోళనలకు గురయ్యారు. ఏం జరుగుతుందో తెలియక కొద్దిసేపు గందరగోళ పరిస్థితి నెలకొంది. అయితే రంగంలోకి దిగిన భద్రతా సిబ్బంది, పోలీసులు తక్షణమే అప్రమత్తమై నిమిషాల వ్యవధిలోనే పరిసరాలను తమ ఆధీనంలోకి తీసుకుని పరిస్థితిని చక్కదిద్దారు.
పోలీసులు తెలిపిన వివరాల ప్రకారం.. సభా వేదికకు సమీపంలో ఏర్పాటు చేసిన నిమ్మకాయ సోడా బండి వద్ద ఉన్న గ్యాస్ సిలిండర్ ఒక్కసారిగా పేలిపోయింది. తీవ్రమైన వేడి కారణంగానే ఈ ప్రమాదం జరిగి ఉంటుందని ప్రాథమిక విచారణలో గుర్తించినట్లు అధికారులు వెల్లడించారు. పేలుడు తీవ్రత ఎంత బలంగా ఉందంటే.. ఆ సిలిండర్ దాదాపు 60 మీటర్ల దూరంలో ఉన్న విద్యుత్ స్తంభంపైకి ఎగిరిపడింది.
ఈ ప్రమాదం ధాటికి విద్యుత్ స్తంభం దెబ్బతిని ఆ ప్రాంతంలో తాత్కాలికంగా విద్యుత్ సరఫరా నిలిచిపోయింది. పోలీసులు వెంటనే సదరు ప్రాంతాన్ని చుట్టుముట్టి అదనపు రక్షణ చర్యలు చేపట్టడంతో ప్రమాద తీవ్రత తప్పింది. ఎవరికీ ఎలాంటి ప్రాణాపాయం జరగకపోవడంతో అధికారులు, స్థానిక ప్రజలు ఊపిరి పీల్చుకున్నారు. భద్రతా బలగాలు ప్రస్తుతం ఘటనా స్థలాన్ని పరిశీలిస్తున్నాయి.
