చేనేత కార్మికులకు కూటమి ప్రభుత్వం వరాలు కురిపించింది. జాతీయ చేనేత దినోత్సవం సందర్భంగా తీపి కబురు అందించింది. ఆగస్టు 7వ తేదీన ‘నేతన్నకు భరోసా’ పథకాన్ని ప్రారంభించేందుకు చేనేత, జౌళి శాఖ శరవేగంగా ఏర్పాట్లు చేస్తోంది. గత ప్రభుత్వ హయాంలో ఈ పథకం కింద ఏడాదికి రూ.24 వేల ఆర్థిక సాయం అందేది. అయితే, సీఎం చంద్రబాబు నాయుడు కార్మికుల కష్టాలను గుర్తించి, ఆ మొత్తానికి మరో వెయ్యి రూపాయలు అదనంగా పెంచి, ఈ ఏడాది నుంచి రూ.25 వేల ఆర్థిక సాయం అందించాలని నిర్ణయించారు.
ఈ ప్రతిష్టాత్మక పథకం కోసం ప్రభుత్వం బడ్జెట్లో ఏకంగా ₹250 కోట్లను ప్రత్యేకంగా కేటాయించింది. ఈ నిర్ణయం వల్ల రాష్ట్రవ్యాప్తంగా దాదాపు 55 వేల మంది అర్హులైన చేనేత కార్మికులకు నేరుగా ఆర్థిక లబ్ధి చేకూరనుంది. ప్రభుత్వం నిర్దేశించిన నిబంధనల ప్రకారం, సొంతంగా చేనేత మగ్గం కలిగి ఉండి, దానిపైనే జీవనాధారం పొందుతున్న ప్రతి కార్మికుడికి ఈ స్కీమ్ వర్తిస్తుంది. అయితే, ఒక కుటుంబంలో కేవలం ఒక్కరికి మాత్రమే ఈ ఆర్థిక తోడ్పాటు లభిస్తుందని అధికారులు స్పష్టం చేశారు.
అర్హులైన లబ్ధిదారులందరికీ ఎలాంటి మధ్యవర్తులు లేకుండా నేరుగా వారి బ్యాంక్ ఖాతాల్లోనే ఈ నగదు జమ కానుంది. మగ్గం ఉన్నవారికే కాకుండా చేనేత రంగానికి అనుబంధంగా ఉంటూ జీవనం సాగిస్తున్న ఇతర కార్మికులను కూడా ఆదుకోవాలని ప్రభుత్వం ఈసారి కీలక యోచన చేస్తోంది. రాట్నం వడకడం, నూలుకు రంగులు అద్దడం (డైయింగ్), నూలు ఉడకబెట్టడం వంటి అనుబంధ పనులపై ఆధారపడి బతుకుతున్న వారిని సైతం ఈ పథకం పరిధిలోకి తీసుకురానున్నారు.
రాష్ట్రవ్యాప్తంగా ఇలాంటి అనుబంధ రంగాల కార్మికులు దాదాపు 10 వేల మంది వరకు ఉంటారని అధికారులు ప్రాథమికంగా గుర్తించారు. చేనేత రంగానికి పూర్వ వైభవం తీసుకురావడంతో పాటు, అప్పుల ఊబిలో ఉన్న నేతన్నల కుటుంబాలకు ఆర్థికంగా భరోసా కల్పించడమే ఈ పథకం ముఖ్య ఉద్దేశమని ప్రభుత్వం పేర్కొంది. ఈ సాయంతో చేనేత కుటుంబాల్లో పండుగ వాతావరణం నెలకొంది.
