ప్రధాని నరేంద్ర మోదీ అత్యంత ప్రతిష్టాత్మకంగా నిర్వహిస్తున్న 'మన్ కీ బాత్' (Mann Ki Baat) విజయవంతంగా 12 సంవత్సరాలు పూర్తి చేసుకుంది. ఈ సందర్భంగా ఆదివారం ప్రసారమైన 139వ ఎపిసోడ్‌లో ప్రధాని మోదీ భావోద్వేగంతో ప్రసంగించారు. గత పన్నెండు సంవత్సరాల ప్రయాణం తనకెంతో మధురమైన అనుభూతిని మిగిల్చిందని, ఇది సాధారణ ప్రయాణం కాదని, దేశ ప్రజలను దగ్గరగా అర్థం చేసుకునే ఒక 'పవిత్ర తీర్థయాత్ర'తో సమానమని భావోద్వేగంతో వెల్లడించారు. దేశవ్యాప్తంగా వివిధ రంగాల్లో అసాధారణ కృషితో సమాజానికి సేవ చేస్తున్న సామాన్యుల స్ఫూర్తిదాయక గాథలను ఈ వేదిక ద్వారా దేశం ముందుంచినట్లు తెలిపారు.
12 సంవత్సరాల క్రితం, సరిగ్గా విజయదశమి పర్వదినాన అక్టోబర్ 3, 2014న ఆకాశవాణి (అఖిల భారత రేడియో), దూరదర్శన్ నెట్‌వర్క్‌ల ద్వారా 'మన్ కీ బాత్' ప్రయాణం ప్రారంభమైందని ప్రధాని గుర్తుచేశారు. అప్పటి నుంచి నేటి వరకు ఈ ప్రయాణం నిరంతరాయంగా సాగుతోందని, దేశ ప్రజలే దీనికి అసలైన సహచరులు, స్ఫూర్తిదాతలు అని కొనియాడారు. దేశంలోని సామాన్యుల కష్టపడే తత్వాన్ని, ధైర్యాన్ని, సేవ భావాన్ని వేడుకలా కొనియాడే అద్భుతమైన అవకాశంగా ఈ కార్యక్రమం తనకు కలిసి వచ్చిందని పేర్కొన్నారు.
భారతదేశంలో శతాబ్దాలుగా తీర్థయాత్రలు చేసే గొప్ప సాంప్రదాయం ఉందని, 'మన్ కీ బాత్' కూడా అలాంటి ఒక తీర్థయాత్రేనని మోదీ అభివర్ణించారు. సమాజం కోసం, దేశం కోసం నిస్వార్థంగా జీవించే ప్రతి ఒక్కరూ ఒక పుణ్యక్షేత్రంతో సమానులేనని అన్నారు. ఎక్కడో మూలల్లో నిశ్శబ్దంగా అసాధారణమైన పనులు చేస్తూ సమాజ దృష్టికి నోచుకోని ఎంతోమంది స్ఫూర్తిప్రదాతలను ఈ కార్యక్రమం వెలుగులోకి తెచ్చిందని తెలిపారు.
ఈ కార్యక్రమం ద్వారా దేశంలోని ప్రతీ కుటుంబంతో తాను నేరుగా అనుసంధానమైన అనుభూతి కలుగుతుందని ప్రధాని చెప్పారు. 'మన్ కీ బాత్' విన్న తర్వాత ప్రధాని తమ ఇంట్లో కుటుంబ సభ్యుడిలా కూర్చుని మాట్లాడుతున్న అనుభూతి కలుగుతుందని ఎంతోమంది తనకు సందేశాలు పంపుతుంటారని, శ్రోతల ఈ అపారమైన ప్రేమ, ఆప్యాయతలే తనకు అత్యంత విలువైన ఆస్తి అని ప్రధాని మోదీ సంతోషం వ్యక్తం చేశారు.
