టాలీవుడ్ స్టార్ జంట విజయ్ దేవరకొండ, రష్మిక మందన్నల మధ్య సోషల్ మీడియా వేదికగా జరిగిన సరదా ముచ్చట్లు అభిమానులను విశేషంగా ఆకట్టుకుంటున్నాయి. ఇటీవల కురిసిన వర్షాల కారణంగా సినిమా షూటింగ్ తాత్కాలికంగా రద్దు కావడంతో విజయ్ తన నివాసంలో తల్లిదండ్రులతో కలిసి సేదతీరారు. తన తల్లిదండ్రులైన గోవర్ధన్ రావు, మాధవిల మధ్య పడుకుని విశ్రాంతి తీసుకుంటున్న ఓ ఆత్మీయమైన ఫొటోను అభిమానులతో పంచుకుంటూ, చిన్ననాటి తన ఫేవరెట్ ప్రదేశంలో మధ్యాహ్నం నిద్ర దొరికిందంటూ మురిసిపోయారు.
అయితే ఆ పోస్టుకు అసలైన ఆకర్షణ ఏమిటంటే.. ఆ అందమైన ఫొటోను క్లిక్ చేసింది తన సతీమణి రష్మికేనంటూ విజయ్ ప్రత్యేకంగా క్రెడిట్ ఇచ్చారు. దీనిపై రష్మిక అంతే వేగంగా, చమత్కారంగా స్పందిస్తూ తన భర్తను సరదాగా ఆటపట్టించింది. "నేను షూటింగ్ ముగించుకుని ఇంటికి తిరిగొచ్చాక నా అమాయకపు చూపులు (పప్పీ ఐస్) తట్టుకోలేకే ముందే జాగ్రత్తపడి ఈ క్రెడిట్ ఇచ్చావా?" అంటూ ఆమె వేసిన ప్రశ్న నెటిజన్లను ఎంతగానో నవ్విస్తోంది.
అంతటితో ఆగకుండా, గత కొన్నేళ్లుగా తాను తీసిన మిగిలిన ఫొటోలకు కూడా న్యాయంగా క్రెడిట్స్ దక్కాలని, తనలోని ఫొటోగ్రఫీ నైపుణ్యాన్ని గుర్తించాలంటూ రష్మిక చేసిన వ్యాఖ్యలు సామాజిక మాధ్యమాల్లో తెగ చక్కర్లు కొడుతున్నాయి. వెండితెరపై 'గీత గోవిందం', 'డియర్ కామ్రేడ్' చిత్రాలతో హిట్ పెయిర్‌గా గుర్తింపు పొందిన వీరిద్దరూ, ఈ ఏడాది ఫిబ్రవరి 26న వైవాహిక బంధంలోకి అడుగుపెట్టిన సంగతి తెలిసిందే. పెళ్లి తర్వాత కూడా వీరి మధ్య ఉన్న అన్యోన్యత, సరదా సంభాషణలు అభిమానులను ఆకట్టుకుంటున్నాయి.
వివాహానంతరం వీరిద్దరి కాంబినేషన్‌లో వస్తున్న తాజా చిత్రం 'రణబలి' త్వరలోనే థియేటర్లలో సందడి చేసేందుకు సిద్ధమవుతోంది. ప్రస్తుతం రష్మిక వరుస పాన్ ఇండియా ప్రాజెక్టులతో దూసుకుపోతూ, అల్లు అర్జున్ - అట్లీ భారీ కాంబో చిత్రం 'రాక'లో నటిస్తోంది. సినిమాల పరంగా ఎంత బిజీగా ఉన్నప్పటికీ, వ్యక్తిగత జీవితంలో ఈ దంపతులు పంచుకుంటున్న వినోదాత్మక క్షణాలు ప్రస్తుతం ఇంటర్నెట్‌లో హాట్ టాపిక్‌గా మారాయి.
