రెండేళ్ల కిందట ఆగస్టులో హైదరాబాద్ మాదాపూర్‌లోని తమ్మిడికుంట చెరువు ఎఫ్‌టీఎల్ (FTL), బఫర్ జోన్ పరిధిలో నిర్మించిన సినీ హీరో అక్కినేని నాగార్జునకు చెందిన 'ఎన్ కన్వెన్షన్' (N Convention) సెంటర్‌ను హైడ్రా (HYDRAA) అధికారులు కూల్చివేయడం రాష్ట్రవ్యాప్తంగా పెను సంచలనం సృష్టించిన సంగతి తెలిసిందే. ఆ సమయంలో ఈ కూల్చివేత వెనుక అనేక రాజకీయ కథనాలు, ఆరోపణలు వెల్లువెత్తాయి. ఒకవైపు ప్రతిపక్ష బీఆర్‌ఎస్ నాగార్జునను బాధితుడిగా చూపిస్తూ ప్రభుత్వంపై విమర్శలు గుప్పించగా, మరోవైపు కాంగ్రెస్ నేతలు గత ప్రభుత్వ హయాంలోని లోపాల వల్లే ఈ అక్రమ నిర్మాణాలు వెలిశాయని ప్రత్యారోపణలు చేశారు.
అయితే తాజాగా ఈ వివాదానికి పూర్తిస్థాయి తెరదించుతూ, సుందరంగా పునరుద్ధరించబడిన తమ్మిడికుంట చెరువు ప్రారంభోత్సవ వేదికపై నాగార్జున స్వయంగా పాల్గొని అందరినీ ఆశ్చర్యపరిచారు. హైడ్రా కమిషనర్ ఏవీ రంగనాథ్ ప్రత్యేక చొరవతో తెలంగాణ ప్రభుత్వం రూ.20 కోట్ల వ్యయంతో తమ్మిడికుంట చెరువుకు పూర్వ వైభవం తీసుకువచ్చింది. ఒకప్పుడు దుర్గంధం, ప్లాస్టిక్, బయో వ్యర్థాలతో నిండిపోయిన ఈ చెరువు నుంచి ఏకంగా 30వేల ట్రక్కులకు పైగా పూడిక, చెత్తను తొలగించి, చెరువు విస్తీర్ణాన్ని 30 ఎకరాలకు పెంచారు.
భవిష్యత్తులో ఆక్రమణలకు తావులేకుండా చుట్టూ కంచె ఏర్పాటు చేయడంతో పాటు, వర్షపు నీరు నేరుగా చేరేలా ప్రత్యేక మార్గాలు, మురుగునీరు కలవకుండా పైపులైన్లు, నీటి శుద్ధి ప్లాంట్లను నిర్మించి అత్యంత ఆహ్లాదకరమైన పర్యాటక ప్రదేశంగా తీర్చిదిద్దారు. సీఎం రేవంత్ రెడ్డి చేతుల మీదుగా జరిగిన ఈ పునరుద్ధరించబడిన తమ్మిడికుంట చెరువు ప్రారంభోత్సవానికి హీరో నాగార్జున హాజరుకావడం రాజకీయవర్గాల్లో హాట్ టాపిక్‌గా మారింది.
గతంలో నాగార్జున పేరుతో హైడ్రాను బూచిగా చూపించే ప్రయత్నం చేసిన బీఆర్‌ఎస్ శ్రేణులు సైతం ఆయన రాకతో ఒక్కసారిగా మౌనంగా ఉండిపోయాయి. ఈ సభలో మాట్లాడిన నాగార్జున, ముఖ్యమంత్రి రేవంత్ రెడ్డి దూరదృష్టితో పాటు హైడ్రా కమిషనర్ రంగనాథ్ కృషిని వేదికపై నుంచే మనస్ఫూర్తిగా అభినందించారు. తన ఎన్ కన్వెన్షన్ సెంటర్ కూల్చివేత సమయంలో జరిగిన అసలు విషయాన్ని నాగార్జున ఈ సందర్భంగా బయటపెట్టారు.
కూల్చివేత అనంతరం హైడ్రా కమిషనర్ రంగనాథ్ స్వయంగా తన వద్దకు వచ్చి కూర్చోబెట్టి, పర్యావరణ పరిరక్షణ, చెరువుల ఆవశ్యకత గురించి ఎంతో వివరంగా, అర్థమయ్యేలా చెప్పారని నాగార్జున వెల్లడించారు. రంగనాథ్ మాటలు విన్న తర్వాత తన ఆలోచనా విధానం పూర్తిగా మారిపోయిందని, హైదరాబాద్ నగర భవిష్యత్తు తరాల కోసం తాను చేయాల్సిన బాధ్యత ఇదేనని భావించి హైడ్రా చేపట్టే ప్రతి మంచి పనికి పూర్తి మద్దతుగా నిలిచానని ఆయన స్పష్టం చేశారు. ఉప్పల్ నుంచి మాదాపూర్ వరకు కొత్త జీవం పోసుకున్న చెరువులే రంగనాథ్ నిబద్ధతకు నిదర్శనమని నగరవాసులు ప్రశంసిస్తున్నారు.
