ప్రముఖ బాలీవుడ్ దర్శకుడు నితేశ్ తివారీ ప్రతిష్టాత్మకంగా తెరకెక్కించిన ‘రామాయణ: పార్ట్ 1’ (Ramayana: Part 1) చిత్రంపై దర్శకుడు రామ్ గోపాల్ వర్మ (RGV) ప్రశంసల వర్షం కురిపించారు. సోషల్ మీడియా వేదికగా ఈ సినిమాపై ఆసక్తికర పోస్ట్ చేశారు. ఈ ప్రతిష్టాత్మక చిత్రం కేవలం ఒక సాధారణ భక్తిరస సినిమా మాత్రమే కాదని, భారతీయ సంస్కృతిలోని అపారమైన మానసిక సమర్థతను చాటిచెప్పే ఒక ‘భక్తి శక్తి’ అని అభివర్ణించారు. బాక్సాఫీస్ వద్ద విజయం సాధిస్తున్న ఈ చిత్రంపై వచ్చే కొద్దిపాటి విమర్శలను చిత్ర బృందం ఏమాత్రం పట్టించుకోవాల్సిన అవసరం లేదని వ్యాఖ్యానించారు.
ఈ అద్భుత దృశ్యకావ్యాన్ని తెరపై ఆవిష్కరించడానికి దర్శకుడు, నిర్మాతలు చేసిన ఏనుగంత ప్రయత్నం ముందు నెగటివ్ విమర్శలు చాలా చిన్నవని వర్మ పేర్కొన్నారు. చిత్రంలోని రాముడి పాత్రను విశ్లేషిస్తూ.. కథానాయకుడు కథకు అతీతంగా తేలియాడే దేవుడిగా కాకుండా, ప్రపంచం అంతం కాబోతోందని స్పష్టంగా తెలిసి కూడా ధైర్యంతో ముందడుగు వేసిన ఒక పరిపూర్ణ మనిషిగా దర్శకుడు చూపించిన తీరు అద్భుతంగా ఉందన్నారు. చిత్రంలో చూపించిన యుద్ధ ఘట్టాలు, హింస కూడా అధర్మం వల్ల కలిగే తీవ్రమైన పర్యవసానాలను స్పష్టంగా తెలియజేసేలా ఉన్నాయని వర్మ కొనియాడారు.
ముఖ్యంగా రాముడి పాత్రలో వదిగిపోయిన బాలీవుడ్ నటుడు రణ్‌బీర్ కపూర్, రావణుడిగా సంచలన నటనను కనబరిచిన రాకింగ్ స్టార్ యశ్ అభినయాన్ని వర్మ ప్రత్యేకంగా కొనియాడారు. సీతాదేవి అపహరణ ముగిసిన తర్వాత శూన్యంగా మారిన ఆశ్రమంలో రాముడు నిలబడే ఒక నిర్దిష్ట సన్నివేశంలో రణ్‌బీర్ కపూర్ ప్రదర్శించిన హావభావాలు, నటనలో వ్యక్తమైన దుఃఖం ఒక అంకగణితంగా మారిన తీరును కెమెరా ఎంతో అద్భుతంగా బంధించిందని ఆర్జీవీ విశ్లేషించారు. రావణాసురుడిగా యశ్ చూపించిన గాంభీర్యం, రాజసం ప్రేక్షకులను మంత్రముగ్ధులను చేస్తాయని చెప్పారు.
నమిత్ మల్హోత్రా ప్రతిష్టాత్మకంగా నిర్మించిన ఈ భారీ బడ్జెట్ చిత్రంలో రణ్‌బీర్ కపూర్, సాయి పల్లవి, యశ్ ప్రధాన పాత్రల్లో అలరించారు. నవంబర్ 5న దీపావళి కానుకగా ప్రపంచవ్యాప్తంగా విడుదలై బాక్సాఫీస్ వద్ద వసూళ్ల సునామీ సృష్టిస్తోంది. దేశవ్యాప్తంగా సినీ ప్రముఖుల నుంచి నితేశ్ తివారీకి ప్రశంసలు దక్కుతున్న తరుణంలో, సినిమా కథనంలో లోతును విశ్లేషిస్తూ రామ్ గోపాల్ వర్మ చేసిన ఈ తాజా పోస్ట్ సామాజిక మాధ్యమాల్లో తీవ్రంగా వైరల్ అవుతోంది.
