విశాఖపట్నం నగరం నడిబొడ్డున ఉన్న ఆర్టీసీ కాంప్లెక్స్ సమీపంలోని సెంట్రల్ పార్క్ వద్ద తీవ్ర కలకలం రేగింది. పార్క్లోని ఓ చెట్టు కింద భారీ మొత్తంలో చెదలు పట్టి, చిరిగిపోయిన స్థితిలో ఉన్న కరెన్సీ నోట్లు బయటపడటంతో స్థానికులు, బాటసారులు తీవ్ర విస్మయానికి గురయ్యారు. వేల సంఖ్యలో చెల్లాచెదురుగా పడి ఉన్న ఈ నోట్లను చూసేందుకు చుట్టుపక్కల ప్రజలు పెద్ద ఎత్తున తరలిరావడంతో ఆ ప్రాంతంలో కాసేపు తీవ్ర ఉత్కంఠ వాతావరణం నెలకొంది.
మంగళవారం రాత్రి సమయంలో గుర్తుతెలియని వ్యక్తులు ఈ నోట్లను మూటలుగా తెచ్చి ఇక్కడ పడేసి వెళ్లినట్లు ప్రాథమిక సమాచారం ఆధారంగా అనుమానిస్తున్నారు. చెట్టు కింద లభ్యమైన కరెన్సీలో రూ.10, రూ.20, రూ.500నోట్లు ఉన్నట్లు గుర్తించారు. దాదాపు అన్ని నోట్లు చెదలు పట్టి, పూర్తిగా పాడైపోయిన స్థితిలో ఉన్నప్పటికీ, వాటిలో కొన్ని మంచిగా ఉన్న నోట్లను ఏరుకునేందుకు స్థానికులు పోటీ పడటం కనిపించింది.
అసలు అంత భారీ మొత్తంలో ఉన్న కరెన్సీ నోట్లను ఎక్కడ దాచారు? ఇవి ఎవరికి చెందిన సొమ్ము? చెదలు పట్టడంతో భయపడి రాత్రికి రాత్రే తెచ్చి ఇక్కడ పడేసి వెళ్లారా? అనే కోణంలో పలు సందేహాలు వ్యక్తమవుతున్నాయి. బ్లాక్ మనీ కావడం వల్లే బ్యాంకుల్లో మార్చుకోలేక ఇలా పడేసి ఉంటారా అనే చర్చ కూడా స్థానికంగా నడుస్తోంది. సమాచారం అందుకున్న పోలీసులు సంఘటనా స్థలానికి చేరుకుని వివరాలు సేకరిస్తున్నారు.
ఈ ఘటనపై కేసు నమోదు చేసుకున్న పోలీసులు సమీపంలోని సీసీటీవీ (CCTV) ఫుటేజ్లను తీవ్రంగా పరిశీలిస్తున్నారు. రాత్రి వేళల్లో వాహనాల్లో వచ్చి ఈ నోట్లను ఎవరు పడేశారనే దానిపై నిఘా పెట్టారు. విశాఖ నగరంలో సంచలనం సృష్టించిన ఈ చిరిగిన నోట్ల వ్యవహారం వెనుక అసలు ముఠా ఎవరనేది పోలీసుల పూర్తిస్థాయి దర్యాప్తులో తేలాల్సి ఉంది.
