TG: తెలంగాణకు పెట్టుబడులను ఆకర్షించే లక్ష్యంతో నిర్వహిస్తున్న 'భారత్ సమ్మిట్'పై బీఆర్ఎస్, బీజేపీ నేతలు ఎందుకు ఆగ్రహం వ్యక్తం చేస్తున్నారో తనకు అర్థం కావడం లేదని ముఖ్యమంత్రి రేవంత్ రెడ్డి పేర్కొన్నారు. హైదరాబాద్‌లో నిర్వహించిన మీడియా సమావేశంలో మాట్లాడిన ఆయన, ప్రతిపక్షాలు ఈ కార్యక్రమాన్ని గుడ్డిగా వ్యతిరేకిస్తున్నాయని విమర్శించారు.
1 ట్రిలియన్ ఎకానమీ లక్ష్యంగా 'భారత్ సమ్మిట్'
2034 నాటికి తెలంగాణను 1 ట్రిలియన్ ఎకానమీగా, 2047 నాటికి 3 ట్రిలియన్ ఎకానమీగా తీర్చిదిద్దడమే లక్ష్యంగా తమ ప్రభుత్వం పనిచేస్తోందని సీఎం రేవంత్ రెడ్డి తెలిపారు. డిసెంబర్ 7, 8, 9 తేదీల్లో నిర్వహించనున్న 'ఇన్వెస్ట్ తెలంగాణ గ్లోబల్ సమ్మిట్'కు సన్నాహకంగా నవంబర్ 13, 14 తేదీల్లో 'భారత్ సమ్మిట్' చేపట్టామని వివరించారు. ఈ సదస్సుకు 70 దేశాల నుంచి సుమారు వెయ్యి మంది వివిధ రంగాల ప్రముఖులు హాజరవుతున్నారని, హైదరాబాద్ వాతావరణం, పారిశ్రామిక విధానాలను ప్రత్యక్షంగా చూసే ప్రతి అతిథి తెలంగాణ బ్రాండ్ అంబాసిడర్లుగా మారుతారని ఆయన ఆశాభావం వ్యక్తం చేశారు. ఇప్పటికే ఢిల్లీ, బెంగళూరు, చెన్నైలలో కర్టెన్ రైజర్ కార్యక్రమాలు పూర్తి చేశామని, త్వరలో ముంబై, అహ్మదాబాద్‌లోనూ నిర్వహిస్తామని వెల్లడించారు.
అభివృద్ధిని అడ్డుకుంటున్న బీజేపీ, బీఆర్ఎస్
తెలంగాణ ప్రజలకు మేలు చేసేలా ప్రభుత్వం ఏ నిర్ణయం తీసుకున్నా బీజేపీ, బీఆర్ఎస్ నేతలు అడ్డుపడుతున్నారని రేవంత్ రెడ్డి ఆరోపించారు. మూసీ ప్రక్షాళన, మెట్రో విస్తరణ, రీజనల్ రింగ్ రోడ్డు, తుమ్మిడిహట్టి ప్రాజెక్టు ఇలా ప్రతి అభివృద్ధి పనిని వ్యతిరేకిస్తున్నారని, కిషన్ రెడ్డి, రాంచందర్ రావు, కేసీఆర్, కేటీఆర్ ప్రజలను తప్పుదోవ పట్టించాలని చూస్తున్నారని మండిపడ్డారు. "వారు వ్యతిరేకిస్తున్నది కాంగ్రెస్ ప్రభుత్వాన్ని కాదు.. తెలంగాణ ప్రజల అభివృద్ధిని. మీ కడుపులో విషం ఉండొచ్చు కానీ, దాన్ని తెలంగాణ ప్రజలపై ప్రదర్శించకండి" అని సీఎం ఘాటుగా వ్యాఖ్యానించారు. సమ్మిట్‌కు రావాల్సిన కొందరు విదేశీ ప్రతినిధులకు మొదట అనుమతులు ఇచ్చిన కేంద్రం, చివరి నిమిషంలో నిరాకరించడం వల్ల వారు ఎయిర్‌పోర్టు నుంచే వెనక్కి వెళ్లాల్సి వచ్చిందని ఆరోపించారు.
రాహుల్ గాంధీ పర్యటన & గిగ్ వర్కర్స్ చట్టం
'భారత్ సమ్మిట్' ముగింపు సమావేశంలో సందేశం ఇచ్చేందుకు లోక్‌సభ ప్రధాన ప్రతిపక్ష నాయకుడు రాహుల్ గాంధీ హైదరాబాద్ వస్తున్నారని సీఎం తెలిపారు. అలాగే, కేంద్ర ప్రభుత్వానికి గిగ్ వర్కర్లను ఆదుకునే ఆలోచన లేదని, కానీ తెలంగాణ ప్రభుత్వం తీసుకొచ్చిన 'గిగ్ వర్కర్స్ చట్టాన్ని' రేపటి నుంచే రాహుల్ గాంధీ చేతుల మీదుగా ప్రారంభించబోతున్నామని ప్రకటించారు. ఢిల్లీలో జరిగిన గ్లోబల్ సమ్మిట్ కర్టెన్ రైజర్‌కు కేంద్ర మంత్రి పీయూష్ గోయల్ వస్తే స్వాగతించిన బీజేపీ నేతలు, ఇప్పుడు రాహుల్ గాంధీ వస్తుంటే విమర్శించడం ఏంటని రేవంత్ రెడ్డి ప్రశ్నించారు. ప్రధాని మోడీ విదేశాల్లో సదస్సులు నిర్వహిస్తే ఒప్పు, రాహుల్ గాంధీ చేస్తే తప్పా? అని నిలదీశారు. రాహుల్ గాంధీ బీజేపీని ఓడించి దేశానికి ప్రధాని అవుతారనే భయంతోనే ఆయన పర్యటనను వ్యతిరేకిస్తూ బీజేపీ నియంతృత్వ వైఖరిని ప్రదర్శిస్తోందని సీఎం విమర్శించారు. ఇప్పటికైనా బీజేపీ నేతలు విజ్ఞత ప్రదర్శించాలని, ప్రజాస్వామ్యంలో అందరి అభిప్రాయాలను గౌరవించాలని సూచించారు.
