తెలంగాణ రాజకీయంలో గత కొంతకాలంగా తీవ్ర దుమారం రేపిన వ్యక్తిగత విమర్శల వ్యవహారంలో ఊహించని పరిణామం చోటుచేసుకుంది. బీఆర్ఎస్ వర్కింగ్ ప్రెసిడెంట్, కేటీఆర్‌పై గతంలో తాను చేసిన వ్యక్తిగత దూషణలు, నిరాధార ఆరోపణల పట్ల తీవ్ర విచారం వ్యక్తం చేస్తూ మాజీ మంత్రి కొండా సురేఖ బహిరంగంగా క్షమాపణలు తెలిపారు. కేటీఆర్, ఆయన కుటుంబ సభ్యులను ఉద్దేశించి చేసిన ఘాటు వ్యాఖ్యలను ఉపసంహరించుకుంటున్నట్లు ప్రకటించడంతో రాజకీయ వర్గాల్లో ఈ అంశం ప్రాధాన్యత సంతరించుకుంది.
ఈ వ్యవహారంపై స్పందిస్తూ కొండా సురేఖ ఒక వివరణాత్మక ప్రకటన విడుదల చేశారు. ప్రతిపక్ష పార్టీని, రాజకీయ ప్రత్యర్థులను తీవ్రంగా విమర్శించే క్రమంలోనే తాపత్రయపడి ఆ విధంగా మాట్లాడాల్సి వచ్చిందే తప్ప, కేటీఆర్‌పై ఉద్దేశపూర్వకంగా వ్యక్తిగత కక్ష సాధింపుతో వ్యాఖ్యలు చేయలేదని వివరించారు. ‘ఆనాడు నేను చేసిన కొన్ని నిరాధారమైన వ్యాఖ్యలు చేయకుండా ఉండవలసింది’ అని ఆత్మపరిశీలన చేసుకుంటూ తన అసంతృప్తిని వెల్లడించారు.
మాజీ మంత్రి కొండా సురేఖ తన ప్రకటనలో కేటీఆర్ కుటుంబ ప్రతిష్టను ప్రస్తావిస్తూ ఆవేదన వ్యక్తం చేశారు. ‘కేటీఆర్‌ను లేదా ఆయన కుటుంబ సభ్యులను వ్యక్తిగతంగా బాధపెట్టాలని గానీ, సమాజంలో వారి ప్రతిష్టకు, గౌరవానికి భంగం కలిగించాలనే దురుద్దేశం గానీ నాకు ఎంతమాత్రం లేదు. నా వ్యాఖ్యలు కేటీఆర్ గారిని గానీ, వారి కుటుంబ సభ్యులను గానీ మనోవేదనకు గురిచేసి, నొప్పించి ఉంటే అందుకు తీవ్రంగా చింతిస్తూ, ఆ వ్యాఖ్యలను పూర్తిగా ఉపసంహరించుకుంటున్నాను’ అని కొండా సురేఖ స్పష్టం చేశారు.
రాజకీయ ప్రత్యర్థులపై వ్యక్తిగత దాడులు, కుటుంబ సభ్యులను వివాదాల్లోకి లాగడంపై తీవ్ర వివాదం ముదిరిన నేపథ్యంలో.. కొండా సురేఖ ఇలా బహిరంగ క్షమాపణలు చెప్పడం తెలంగాణ రాజకీయాల్లో చర్చనీయాంశంగా మారింది. గతంలో ఈ వ్యాఖ్యలపై కేటీఆర్ చట్టబద్ధమైన చర్యలు, కోర్టు ప్రక్రియలకు సిద్ధమైన తరుణంలో, కొండా సురేఖ క్షమాపణలు చెప్పడం ద్వారా ఈ వివాదానికి తెరపడినట్లయిందని విశ్లేషకులు భావిస్తున్నారు.
కొండా సురేఖ కేటీఆర్‌పై గతంలో చేసిన వ్యాఖ్యలు..
కొండా సురేఖ గతంలో కేటీఆర్‌ను ఉద్దేశించి తీవ్రమైన వ్యక్తిగత ఆరోపణలు చేశారు. ముఖ్యంగా సినీ పరిశ్రమలోని ప్రముఖ నటీనటుల విడాకులు, వివాదాలకు కేటీఆరే కారణమని, ఫోన్ ట్యాపింగ్‌ను ఆసరాగా చేసుకుని సినీ నటీమణులను ఆయన వేధించేవారని, మాదకద్రవ్యాల సంస్కృతితో వారిని బ్లాక్‌మెయిల్ చేసేవారని తీవ్ర విమర్శలు గుప్పించారు. ఏమాత్రం ఆధారాలు లేని ఈ తరహా వ్యక్తిగత ఆరోపణలు అప్పట్లో సినీ, రాజకీయ వర్గాల్లో తీవ్ర సంచలనం సృష్టించగా, దీనిపై కేటీఆర్ చట్టబద్ధంగా తీవ్ర ఆగ్రహం వ్యక్తం చేస్తూ న్యాయపరమైన చర్యలకు పూనుకోవడం, చివరకు కొండా సురేఖ ఆ వ్యాఖ్యలను వెనక్కి తీసుకుంటూ బహిరంగ క్షమాపణలు చెప్పడంతో ఈ వివాదానికి చెక్ పడినట్లు అయింది.
