Delhi Air Pollution: దీపావళి పటాకుల శబ్దం ఇంకా మొదలుకాలేదు.. టపాసుల వెలుగులు అసలు చూడనేలేదు.. కానీ దేశ రాజధాని ఢిల్లీని మాత్రం అప్పుడే దట్టమైన విషపు పొగ చుట్టేసింది. ఏటా చలికాలం మొదట్లో నగరాన్ని భయపెట్టే వాయు కాలుష్యం ఈసారి పండుగ రాకముందే డేంజర్ బెల్స్ మోగిస్తోంది. నిజానికి ఈ రోజు తెల్లవారుజాము నుంచే రోడ్లపై కమ్ముకుంటున్నది మామూలు పొగమంచు కాదని, ప్రాణాలకే ఎసరు పెట్టే విషవాయువులని తెలిసి ఢిల్లీ జనం వణికిపోతున్నారు.
గ్యాస్ ఛాంబర్‌గా మారిన నగరం.. 391కి చేరిన AQI
ప్రస్తుతం ఢిల్లీలో పరిస్థితి చూస్తే అచ్చం ఒక 'గ్యాస్ ఛాంబర్'లో ఉన్నట్లే ఉంది. సెంట్రల్ పొల్యూషన్ కంట్రోల్ బోర్డు లెక్కల ప్రకారం.. నగరంలో ఎయిర్ క్వాలిటీ ఇండెక్స్ (AQI) ఏకంగా 391 పాయింట్లకు పడిపోయి ‘వెరీ పూర్’ కేటగిరీకి చేరింది. ద్వారక, రోహిణి, ఐటీవో, పంజాబీ బాగ్, జహంగీర్‌పురి లాంటి కీలక ప్రాంతాల్లో గాలి నాణ్యత దారుణంగా పడిపోయింది. ఒక్క ఢిల్లీలోనే కాదు.. పక్కనే ఉన్న నోయిడా, గురుగ్రామ్, ఫరీదాబాద్ లాంటి నగరాల్లోనూ పరిస్థితి ఇంతే దారుణంగా మారింది.
రోజుకు 30 సిగరెట్లు తాగినట్లే.. సుప్రీంకోర్టు సీరియస్!
ఇక్కడ ఒక్కరోజు గాలి పీల్చడం అంటే దాదాపు 30 సిగరెట్లు తాగడంతో సమానమని అమికస్ క్యూరీ సుప్రీంకోర్టుకు చెప్పడం చూస్తే సమస్య ఎంత తీవ్రంగా ఉందో అర్థం చేసుకోవచ్చు. ఈ గాలి పీల్చి గొంతు మంట, కళ్లలో దురద, ఊపిరాడని సమస్యలతో ఆస్పత్రుల బాట పడుతున్న వారి సంఖ్య రోజురోజుకూ పెరుగుతోంది. ముఖ్యంగా చిన్న పిల్లలు, పెద్దవాళ్ల పరిస్థితి అయితే మరీ ఘోరంగా ఉంది.
ఈ పరిస్థితిపై దేశ సర్వోన్నత న్యాయస్థానం సుప్రీంకోర్టు తీవ్ర ఆందోళన వ్యక్తం చేసింది. కాలుష్యాన్ని అడ్డుకునేందుకు వెంటనే గట్టి చర్యలు తీసుకోవాలని కేంద్రాన్ని, రాష్ట్ర ప్రభుత్వాలను గట్టిగా ఆదేశించింది. మరోవైపు పక్క రాష్ట్రాల్లో రైతులు పంట వ్యర్థాలను తగులబెట్టడం వల్లే 14 శాతం వరకు కాలుష్యం పెరుగుతోందని నివేదికలు చెబుతున్నాయి. వీటికి తోడు పండుగ వేళ రోడ్లపై పెరిగిన విపరీతమైన ట్రాఫిక్, వాహనాల పొగ గాలిని మరింత విషపూరితంగా మార్చేస్తున్నాయి.
ఇంకా పండుగ రానేలేదు.. టపాసుల మోత మొదలయ్యాక గాలి పరిస్థితి ఇంకెంత దారుణంగా మారుతుందోనన్న గుబులు అందరినీ వెంటాడుతోంది. ఊపిరాడకుండా చేస్తున్న ఈ విషపు పొగ నుంచి రాజధాని ప్రజలకు ఎప్పుడు ఉపశమనం దొరుకుతుందో చూడాలి.
