తెలంగాణ రాష్ట్ర ఆర్థిక, పారిశ్రామిక రంగానికి ‘సూపర్ గేమ్ ఛేంజర్’గా భావిస్తున్న హైదరాబాద్ రీజినల్ రింగ్ రోడ్ (RRR) ప్రాజెక్టు నిర్మాణంలో కీలక అవరోధం ఏర్పడింది. ఈ ప్రతిష్టాత్మక ప్రాజెక్టుకు చెందిన దక్షిణ భాగం (South Segment) ఎలైన్మెంట్ ప్రతిపాదనలు ప్రస్తుతం కేంద్ర ప్రభుత్వం వద్ద పెండింగ్లో పడిపోవడంతో పనుల్లో పురోగతి నిలిచిపోయింది. దీంతో గ్రీన్ఫీల్డ్ ఎక్స్ప్రెస్ వే నిర్మాణంపై తీవ్ర అనిశ్చితి నెలకొనగా, శీఘ్రగతిన ఆమోదం తెప్పించేందుకు రాష్ట్ర ప్రభుత్వం ప్రయత్నాలు ముమ్మరం చేసింది.
రీజినల్ రింగ్ రోడ్ ఉత్తర భాగాన్ని ఇప్పటికే కేంద్ర ప్రభుత్వం ‘భారత్మాల పరియోజన’ పథకం కింద జాతీయ రహదారుల ప్రాధికార సంస్థ (NHAI) ద్వారా చేపడుతున్న విషయం తెలిసిందే. అదే తరహాలోనే దక్షిణ భాగాన్ని కూడా ఏదైనా ఒక కేంద్ర ప్రభుత్వ పథకం కింద చేర్చి, రెండు భాగాల నిర్మాణాన్ని సమాంతరంగా పూర్తి చేయాలని తెలంగాణ రాష్ట్ర ప్రభుత్వం కేంద్రాన్ని విజ్ఞప్తి చేస్తోంది. అయితే కేంద్రం నుంచి స్పష్టమైన అనుమతులు రాకపోవడంతో దక్షిణ భాగం పనులు ముందుకు సాగడం లేదు.
యాదాద్రి భువనగిరి జిల్లా తంగడ్పల్లి నుండి సంగారెడ్డి వరకు దాదాపు 201 కిలోమీటర్ల మేర 6 వరుసల గ్రీన్ఫీల్డ్ ఎక్స్ప్రెస్వేగా ఈ దక్షిణ భాగాన్ని నిర్మించాలని అధికారులు ప్రణాళికలు సిద్ధం చేశారు. ప్రతిష్టాత్మకంగా తెరకెక్కుతున్న ఫ్యూచర్ సిటీ మీదుగా సాగే ఈ రహదారి ఏకంగా 7 జిల్లాల్లోని 55 ప్రాంతాలను కలుపుతూ తెలంగాణ రవాణా వ్యవస్థను పూర్తిగా మార్చివేస్తుందని భావించారు. ఈ మార్గం పూర్తయితే నగర శివార్లలో పారిశ్రామిక కారిడార్లు వేగంగా అభివృద్ధి చెందే అవకాశం ఉంది.
అయితే, ఈ దక్షిణ భాగం నిర్మాణానికి సుమారు 2,010 హెక్టార్ల భారీ భూసేకరణ అవసరమవుతుండటం, కేంద్రం నుంచి ఎలైన్మెంట్ తుది ఆమోదం పొందడంలో తీవ్ర ఆలస్యం జరుగుతుండటంతో ప్రాజెక్టు పనుల్లో ఎటువంటి పురోగతి లేకుండా బ్రేక్ పడింది. భూసేకరణ ప్రక్రియ, పరిహారం చెల్లింపులు కూడా ఈ ఆమోదంపైనే ఆధారపడి ఉండటంతో ప్రాజెక్ట్ వ్యయం పెరిగే ప్రమాదం ఉందని నిపుణులు హెచ్చరిస్తున్నారు. కేంద్రం త్వరగా స్పందించి ఆమోదం తెలపాలని విపక్షాలు, వ్యాపార వర్గాలు కోరుతున్నాయి.
