శాశ్వత మంచు ఖండమైన అంటార్కిటికాలో ఉష్ణోగ్రతల పెరుగుదల కారణంగా మంచు వేగంగా కరుగుతున్న సంగతి తెలిసిందే. అయితే ఈ మంచు కరిగే ప్రక్రియను మరింత వేగవంతం కావడం వెనుక ఒక అనూహ్యమైన కారణం ఉందని శాస్త్రవేత్తల పరిశోధనల్లో తేలింది. అంటార్కిటికాలోని పెంగ్విన్ పక్షుల విసర్జితాలు (రెట్టలు) అక్కడి మంచు కరగడంలో కీలక పాత్ర పోషిస్తున్నాయని అమెరికాలోని కొలరాడో విశ్వవిద్యాలయ పరిశోధకులు గుర్తించారు. సముద్ర జీవుల ఆహార శృంఖలానికి, అంటార్కిటికాలోని వాతావరణ మార్పులకు మధ్య అత్యంత ఆసక్తికరమైన అనుబంధం ఉందని ఈ అధ్యయనం ద్వారా వెల్లడైంది.
శాస్త్రవేత్తల వివరాల ప్రకారం, పెంగ్విన్ పక్షుల రెట్టలలో అధిక పరిమాణంలో ఫాస్ఫేట్ వంటి పోషకాలు ఉంటాయి. పెంగ్విన్ కాలనీలు ఉన్న ప్రాంతాల్లో ఈ విసర్జితాలు మంచుపై వ్యాపించడం వల్ల అక్కడ ఆకుపచ్చ రంగు ఆల్గే (పాచి) వేగంగా వృద్ధి చెందుతోంది. సాధారణంగా తెల్లగా ఉండే మంచుపై ఆకుపచ్చ, ఎరుపు రంగు ఆల్గే వ్యాపించినప్పుడు మంచు యొక్క స్వభావంలో గణనీయమైన మార్పులు వస్తాయి. తెల్లటి మంచు సూర్యరశ్మిని తిరిగి పరావర్తనం (రిఫ్లెక్ట్) చేస్తుంది, కానీ రంగు మారిన మంచు సూర్యరశ్మిని, వేడిని ఎక్కువగా గ్రహిస్తుంది. ఫలితంగా మంచు ఉపరితలం వేడెక్కి కరిగే వేగం గణనీయంగా పుంజుకుంటోంది.
కొలరాడో విశ్వవిద్యాలయానికి చెందిన అలియా ఖాన్ నేతృత్వంలోని పరిశోధక బృందం అంటార్కిటికా పశ్చిమ ద్వీపకల్పంలో విస్తృత అధ్యయనం నిర్వహించింది. పెంగ్విన్లు నివసించే ప్రాంతాలు, అవి లేని ప్రాంతాల నమూనాలను సేకరించి పరిశీలించగా, పెంగ్విన్ రెట్టలు ఉన్న చోట ఆకుపచ్చ ఆల్గే, ఫాస్ఫేట్ స్థాయులు అధికంగా ఉన్నట్లు తేలింది. సముద్రంలో చేపలు, ఇతర జీవులను తినే పెంగ్విన్లు, పక్షుల ద్వారా ఈ పోషకాలు భూమి/మంచుపైకి చేరి పర్యావరణ వ్యవస్థను ప్రభావితం చేస్తున్నాయని శాస్త్రవేత్తలు స్పష్టం చేశారు.
గ్లోబల్ వార్మింగ్ అంచనాలను కచ్చితంగా లెక్కించేందుకు ఇప్పటివరకు పరిగణనలోకి తీసుకోని ఇలాంటి జీవసంబంధిత అంశాలను కూడా విశ్లేషించాల్సిన అవసరం ఉందని పరిశోధకులు అభిప్రాయపడుతున్నారు. పెంగ్విన్ల వంటి జీవుల కార్యకలాపాలు అంటార్కిటికాలో మంచు లేని భూభాగాలను విస్తరించడంలో ప్రత్యక్షంగా దోహదపడుతున్నాయని తెలిసింది. వాతావరణంలో సంభవిస్తున్న అపార మార్పులను లోతుగా అర్థం చేసుకోవడానికి, భవిష్యత్తులో అంటార్కిటికా పర్యావరణ పరిణామాలను సరిగ్గా అంచనా వేయడానికి ఈ పరిశోధన ఎంతగానో ఉపయోగపడుతుందని నిపుణులు భావిస్తున్నారు.
