అమెరికాలో ఉద్యోగం చేయాలని భావిస్తున్న విదేశీ ఐటీ నిపుణులకు, వారిని ఉద్యోగాల్లోకి తీసుకునే అమెరికన్ టెక్ కంపెనీలకు భారీ ఉపశమనం లభించింది. కొత్తగా మంజూరు చేసే హెచ్-1బీ (H-1B) వీసాలపై లక్ష డాలర్ల (సుమారు ₹96 లక్షలు) భారీ రుసుమును వసూలు చేయాలన్న డొనాల్డ్ ట్రంప్ పరిపాలన నిర్ణయానికి అమెరికా ఫెడరల్ అప్పీల్స్ కోర్టులో ఎదురుదెబ్బ తగిలింది. ఈ ఫీజు వసూలును నిలిపివేస్తూ దిగువ కోర్టు జారీ చేసిన ఉత్తర్వుల స్థానంలో స్టే ఇవ్వాలని కోరుతూ ప్రభుత్వం వేసిన అప్పీల్ను శుక్రవారం కోర్టు తోసిపుచ్చింది.
ఇదిలా ఉంటే విదేశాల నుంచి వచ్చే నైపుణ్యం కలిగిన ఉద్యోగుల వీసాలపై $100,000 అదనపు ఫీజును విధించాలని గత ఏడాది సెప్టెంబర్ నెలలో ట్రంప్ ప్రభుత్వం ఒక ప్రకటన విడుదల చేసింది. అయితే, ఈ నిర్ణయాన్ని వ్యతిరేకిస్తూ 20 మంది డెమొక్రటిక్ రాష్ట్రాల అటార్నీ జనరల్స్ న్యాయస్థానాన్ని ఆశ్రయించారు. విచారించిన దిగువ కోర్టు, అమెరికా కాంగ్రెస్ అనుమతి లేకుండా ప్రభుత్వం విధించిన ఈ రుసుము చట్టవిరుద్ధమైన పన్ను కిందకే వస్తుందని పేర్కొంటూ జూన్ 8న ఈ ప్రక్రియపై నిలిపివేత (స్టే) విధించింది.
మరోవైపు దిగువ కోర్టు తీర్పును సవాల్ చేస్తూ ట్రంప్ ప్రభుత్వం బోస్టన్లోని 'ఫస్ట్ సర్క్యూట్ కోర్ట్ ఆఫ్ అప్పీల్స్'ను ఆశ్రయించింది. కేసును విచారించిన ముగ్గురు న్యాయమూర్తుల ధర్మాసనం, ఈ తరహా ఫీజును విధించే స్పష్టమైన అధికారం తనకు ఉందని నిరూపించడంలో ట్రంప్ ప్రభుత్వం విఫలమైందని స్పష్టం చేస్తూ, దిగువ కోర్టు ఇచ్చే తీర్పునే సమర్థించింది.
అమెరికన్ల ఉద్యోగ భద్రతను కాపాడటానికి, తక్కువ వేతనాలకే విదేశీయులను నియమించుకునే పద్ధతికి స్వస్తి పలకడానికే ఈ కఠిన నిర్ణయం తీసుకున్నామని ప్రభుత్వం వాదించినప్పటికీ కోర్టు అంగీకరించలేదు. సాధారణంగా హెచ్-1బీ వీసా రుసుము $2,000 నుండి $5,000 వరకు మాత్రమే ఉంటుంది. అయితే, అమెరికాలో చదువుకుని విద్యార్థి వీసాల నుంచి హెచ్-1బీకి మారే వారికి ఈ నిబంధన వర్తించదని గతంలోనే ప్రభుత్వం తెలిపింది. కోర్టుల వ్యతిరేక తీర్పులతో ఇప్పటివరకు ఈ భారీ మొత్తాన్ని చెల్లించిన కంపెనీల సంఖ్య చాలా తక్కువగా ఉండగా, తాజా తీర్పుపై వైట్హౌస్ నుండి ఇప్పటివరకు ఎలాంటి అధికారిక స్పందన రాలేదు.
