ఆస్ట్రేలియా క్రికెట్ చరిత్రలో మాయని మచ్చగా మిగిలిపోయిన 2018 కేప్ టౌన్ బాల్ ట్యాంపరింగ్ (శాండ్‌పేపర్‌గేట్) వివాదం ఎనిమిదేళ్ల తర్వాత మళ్లీ భగ్గుమంది. మాజీ క్రికెటర్ ఉస్మాన్ ఖవాజా ఇటీవల విడుదల చేసిన తన ఆత్మకథ 'సబర్' (Sabr)లో అప్పటి కుట్ర గురించి సంచలన విషయాలను బయటపెట్టడంతో ఆసీస్ క్రికెట్ వర్గాల్లో పెను దుమారం చెలరేగింది. ఈ వివాదంపై తాజాగా ఆస్ట్రేలియా మాజీ ఓపెనర్ డేవిడ్ వార్నర్ స్పందిస్తూ, క్రికెట్ ఆస్ట్రేలియా (CA) వ్యవహారశైలిపై తీవ్రస్థాయిలో విరుచుకుపడ్డారు.
అసలు నిజాన్ని కప్పిపుచ్చేందుకే అప్పట్లో తూతూమంత్రంగా విచారణ జరిపించారని, ఎవరిని బలిపశువులను చేయాలో ముందుగానే నిర్ణయించుకుని కఠిన శిక్షలు విధించారని వార్నర్ సంచలన ఆరోపణలు చేశారు. శనివారం ఉదయం ఇన్‌స్టాగ్రామ్ వేదికగా స్పందించిన వార్నర్, 2018 విచారణ తీరుపై సూటిగా పలు ప్రశ్నలు సంధించారు. తనకు తెలిసిన సమాచారం ప్రకారం ఆనాటి విచారణలో ఆస్ట్రేలియా స్టార్ బౌలర్లు జోష్ హేజిల్‌వుడ్, మిచెల్ స్టార్క్, నాథన్ లైయన్‌లను అధికారులు కనీసం ప్రశ్నించనేలేదని ఆరోపించారు. బంతి ఆకారాన్ని మార్చే వ్యవహారం గురించి బౌలర్లకు ఏమీ తెలియదని క్రికెట్ ఆస్ట్రేలియా ఎలా నిర్ధారించిందని నిలదీశారు.
కేవలం తనతో పాటు స్టీవ్ స్మిత్, కామెరాన్ బాన్‌క్రాఫ్ట్‌లను మాత్రమే దోషులుగా నిలబెట్టి, మిగతా వారిని కాపాడేందుకు ఓ కప్పిపుచ్చే నాటకం ఆడినట్లు స్పష్టంగా కనిపిస్తోందని వార్నర్ మండిపడ్డారు. ఉస్మాన్ ఖవాజా తన పుస్తకంలో రాసిన అంశాలు 100 శాతం వాస్తవమని పేర్కొంటూ, ఆయనకు తన పూర్తి మద్దతు ఉంటుందని ప్రకటించారు. మరోవైపు, ఆస్ట్రేలియా టెస్ట్ కెప్టెన్ ప్యాట్ కమిన్స్ శుక్రవారం నిర్వహించిన మీడియా సమావేశంలో ఖవాజా ఆరోపణలను పూర్తిగా కొట్టిపారేశారు.
మైదానంలోకి శాండ్‌పేపర్ తీసుకెళ్తున్న విషయం బౌలర్లందరికీ ముందే తెలుసని చెప్పడం పచ్చి అబద్ధమని, సహచర ఆటగాళ్ల జీవితాలతో ఖవాజా బాధ్యతారహితంగా ఆడుకుంటున్నారని ఆగ్రహం వ్యక్తం చేశారు. అయితే, కమిన్స్ వ్యాఖ్యలపై స్పందించిన వార్నర్.. కెప్టెన్ స్వయంగా ఉస్మాన్ ఖవాజాను బలిపశువును చేసేలా మాట్లాడటం తనను తీవ్ర నిరాశకు గురిచేసిందని విమర్శించారు.
వార్నర్ చేసిన తాజా ఆరోపణలపై క్రికెట్ ఆస్ట్రేలియా స్పందిస్తూ వివరణ ఇచ్చింది. 2018లో విచారణ జరిగిన సమయంలో జట్టులోని ఆటగాళ్లందరికీ తమ వాదనలు వినిపించే అవకాశం కల్పించామని, గత ఎనిమిదేళ్లలో కొత్త ఆధారాలు ఉంటే సమర్పించే వెసులుబాటు కూడా ఉందని తెలిపింది. ఖవాజా పుస్తకంలోని వివరాలు మిగతా ఆటగాళ్లు చెప్పిన విషయాలకు భిన్నంగా ఉన్నాయని, ప్రస్తుతం పాత విచారణను మళ్లీ తెరవాల్సిన అవసరం లేదని క్రికెట్ ఆస్ట్రేలియా చీఫ్ ఎగ్జిక్యూటివ్ టాడ్ గ్రీన్‌బర్గ్ స్పష్టం చేశారు.
