మానవ దేహం పంచభూతాలతో నిర్మితమైన ఒక దివ్య దేవాలయం. మన కన్ను, ముక్కు, చెవి, నాలుక, చర్మం అనే పంచేంద్రియాలు కేవలం భౌతిక ప్రపంచాన్ని అనుభవించే సాధనాలు మాత్రమే కావు.. వాటి వెనుక చైతన్యరూపంలో ప్రకాశించేది సాక్షాత్తూ ఆ పరమాత్మే..
కఠోపనిషత్తు ప్రకారం.. ప్రకారం, భగవంతుడు ఇంద్రియాలను బయటి ప్రపంచాన్ని చూడటానికి సృష్టించినప్పటికీ.. జ్ఞాని అయినవాడు ఆ ఇంద్రియాల వెనుక ఉన్న దివ్య శక్తిని దర్శిస్తాడు. ప్రతి ఇంద్రియం లోపల పరమాత్మ ఏ విధంగా అంతర్యామిగా ఉండి నడిపిస్తున్నాడో ఈ ఆధ్యాత్మిక దృక్పథం వివరిస్తుంది..
ఇక ఇది కృష్ణ యజుర్వేదానికి చెందిన ఉపనిషత్తు అని చెబుతారు. నచికేతుడు–యమధర్మరాజు మధ్య జరిగిన సంభాషణ రూపంలో ఆత్మ, పరమాత్మ, మరణం, మోక్షం వంటి లోతైన ఆధ్యాత్మిక విషయాలను ఇది వివరిస్తుంది. ఇక ఇంద్రియాలలో పరమాత్మ స్వరూపం ఎలా ఉంటుందో తెలుసుకుంటే..
చక్షువు అంటే కన్ను.. ఈ కంటికి చూసే శక్తిని ఇచ్చేది పరమాత్మ స్వరూపమైన 'తేజస్సు'. సృష్టిలోని ప్రశాంతతను, ఈశ్వరుని దివ్య మంగళ రూపాన్ని దర్శించినప్పుడు, ఆ కంటి వెలుగులో పరమాత్మ సూర్య చైతన్యంగా ప్రకాశిస్తాడు.
శ్రోత్రం అంటే చెవి.. ఈ చెవికి వినే శక్తిని ఇచ్చేది 'ఆకాశ తత్త్వం'. అనాహత శబ్దమైన 'ఓంకారం' లోనూ, వేద మంత్రాల ధ్వనిలోనూ, ప్రశాంతమైన నిశ్శబ్దంలోనూ చెవి ద్వారా వ్యక్తమయ్యేది నాదబ్రహ్మ స్వరూపమే.
జిహ్వ అంటే నాలుక.. ఈ నాలుకకు రుచిని, వాక్కును ఇచ్చేది 'జల తత్త్వం'. భగవంతుని నామస్మరణ చేసేటప్పుడు, పవిత్రమైన ప్రసాదాన్ని స్వీకరించేటప్పుడు నాలుకపై ప్రసరించే అమృతత్వమే ఈశ్వరుని రస స్వరూపం.
త్వక్కు అంటే చర్మం.. ఈ స్పర్శను గ్రహించే శక్తి 'వాయు తత్త్వం'. తల్లి ఒడిలో దొరికే అనురాగం, ప్రకృతి అందించే ప్రశాంతమైన గాలి స్పర్శ వెనుక మనల్ని స్పృశించేది భగవంతుని అభయ హస్తమే.
ఘ్రాణం అంటే ముక్కు.. ఈ వాసనను గ్రహించే శక్తి 'పృథివి తత్త్వం'. పూజా వేళల్లో లభించే ధూప దీపాల దివ్య పరిమళం, తులసి మాలల సువాసన మనసును పరవశింపజేసినప్పుడు అది పరమాత్మ చైతన్యంగా ప్రతిఫలిస్తుంది.
ఇక కేనోపనిషత్తు చెప్తున్నట్లు.. కన్ను చూడలేని దాన్ని, చెవి వినలేని దాన్ని, ఇంద్రియాలన్నిటికీ శక్తిని ఇచ్చే ఆ అంతర్ ఆత్మయే పరబ్రహ్మం.. మనోబుద్ధులతో ఇంద్రియాలను భగవత్ చింతన వైపు మళ్లించినప్పుడు, ఈ దేహమే కైలాసంగా, వైకుంఠంగా మారుతుంది. ఇంద్రియాల రాగద్వేషాలను దాటి, వాటిలోని దైవత్వాన్ని గుర్తించడమే నిజమైన ఆత్మదర్శనం అని శాస్త్రాలు చెబుతున్నాయి..
గమనిక: ఇక్కడ అందించిన వివరాలు కేవలం సాంప్రదాయ పురాణ విశ్వాసాలు మరియు ఆధ్యాత్మిక భావనల ఆధారంగా ఇవ్వబడ్డాయి. వీటిని కేవలం మతపరమైన విశ్వాసాల కోణంలోనే చూడాలి. వ్యక్తిగత నిర్ణయాలు తీసుకునే ముందు సంబంధిత రంగ నిపుణులను సంప్రదించడం మంచిది.
