2028 ఎన్నికలే లక్ష్యంగా బీఆర్ఎస్ అడుగులు..
జనవరి నుంచి క్షేత్రస్థాయి పోరాటాలు..
ఆ తర్వాత కేటీఆర్ రాష్ట్రవ్యాప్త పాదయాత్ర..
కేసీఆర్ బస్సు యాత్రకు కూడా ప్రణాళికలు
తెలంగాణ రాజకీయాల్లో మళ్లీ పాదయాత్రల చర్చ మొదలైంది. అధికార కాంగ్రెస్‌ను ఎదుర్కొనేందుకు బీఆర్ఎస్ తన వ్యూహాలకు పదును పెడుతోంది. ఇప్పటివరకు అసెంబ్లీ సమావేశాలు, ధర్నాలు, నిరసనలకే పరిమితమైన పార్టీ ఇక నేరుగా ప్రజల్లోకి వెళ్లాలని భావిస్తోంది. ఇందులో భాగంగానే రైతు సమస్యలను కేంద్రంగా చేసుకుని సదస్సులు, క్షేత్రస్థాయి పోరాటాలకు శ్రీకారం చుట్టాలని నిర్ణయించినట్లు తెలుస్తోంది. ఈ కార్యక్రమాల తర్వాత కేటీఆర్ స్వయంగా రాష్ట్రవ్యాప్త పాదయాత్ర చేపట్టే ఆలోచనలో ఉన్నారు. అసలు ఈ కార్యాచరణ వెనుక ఉన్న రాజకీయ వ్యూహం ఏమిటి?
జనవరి నుంచి క్షేత్రస్థాయి పోరాటాలు
బీఆర్ఎస్ వర్కింగ్ ప్రెసిడెంట్ కేటీఆర్ ఇప్పటికే పార్టీ భవిష్యత్ కార్యాచరణపై కొన్ని కీలక సంకేతాలు ఇచ్చారు. రాబోయే రెండేళ్లు పార్టీ కార్యక్రమాల వేగాన్ని పెంచుతామని, జనవరి నుంచి క్షేత్రస్థాయిలో పోరాటాలు చేపడతామని ఆయన గతంలో వెల్లడించారు. రైతుల సమస్యలు, సాగునీరు, ప్రభుత్వ హామీలు, వ్యవసాయ రంగంలో ఎదురవుతున్న ఇబ్బందులను ప్రధాన అజెండాగా తీసుకునే అవకాశం ఉంది.
రైతు సదస్సులు, స్థానిక స్థాయి సమావేశాల ద్వారా ప్రజా సమస్యలను వెలుగులోకి తీసుకురావడంతో పాటు పార్టీ నాయకులు, కార్యకర్తలను మళ్లీ క్రియాశీలం చేయాలన్నది బీఆర్ఎస్ ఆలోచనగా కనిపిస్తోంది. ముఖ్యంగా ఉమ్మడి నల్లగొండ, ఖమ్మం, మహబూబ్‌నగర్, వరంగల్ జిల్లాలపై ప్రత్యేక దృష్టి పెట్టాలని కేటీఆర్ గతంలోనే చెప్పారు.
రైతు సమస్యలే పాదయాత్రకు పునాది?
నాగార్జునసాగర్ ఎడమ కాలువకు నీటి విడుదల అంశంపై మిర్యాలగూడలో నిర్వహించిన రైతు మహాధర్నా సందర్భంగా కేటీఆర్ చేసిన ప్రకటన కూడా ఇప్పుడు ప్రాధాన్యం సంతరించుకుంది. సాగర్ ఎడమ కాలువకు నీటి విడుదలపై స్పష్టమైన షెడ్యూల్ ప్రకటించకపోతే వేలాది మంది రైతులతో కలిసి కోదాడ నుంచి హాలియా వరకు పాదయాత్ర చేస్తానని ఆయన సెప్టెంబర్‌లో హెచ్చరించారు.
ఈ సందర్భంగా 2003లో కేసీఆర్ కోదాడ నుంచి హాలియా వరకు చేపట్టిన రైతు పాదయాత్రను కేటీఆర్ గుర్తుచేశారు. అప్పట్లో రైతుల సమస్యలపై జరిగిన ఆ పోరాటం ప్రభుత్వంపై ఒత్తిడి తీసుకొచ్చిందని వివరించారు. అదే స్ఫూర్తితో రైతుల తరఫున మరోసారి పోరాటానికి సిద్ధమని ప్రకటించారు. అంటే కేటీఆర్‌కు పాదయాత్ర అనేది కేవలం రాజకీయ కార్యక్రమం మాత్రమే కాదు. రైతుల సమస్యలను ప్రధానంగా తీసుకుని ప్రభుత్వంపై ఒత్తిడి పెంచే అస్త్రంగా కూడా కనిపిస్తోంది.
2027 మార్చి, ఏప్రిల్‌లో రాష్ట్రవ్యాప్త పాదయాత్ర?
కేటీఆర్ 2027 మార్చి లేదా ఏప్రిల్ నుంచి రాష్ట్రవ్యాప్త పాదయాత్ర చేపట్టే అవకాశం ఉంది. జనవరి నుంచి క్షేత్రస్థాయిలో పార్టీ పోరాటాలు ప్రారంభించి, వాటి ద్వారా ప్రజల సమస్యలు, స్థానిక పరిస్థితులపై మరింత అవగాహన పెంచుకున్న తర్వాత పాదయాత్రకు వెళ్లాలన్నది వ్యూహంగా కనిపిస్తోంది.
ఈ పాదయాత్ర ద్వారా గ్రామాలు, పట్టణాల్లో ప్రజలను నేరుగా కలవడం, రైతులు, యువత, నిరుద్యోగులు, వ్యాపార వర్గాల సమస్యలను తెలుసుకోవడం కేటీఆర్‌కు అవకాశం కల్పిస్తుంది. అదే సమయంలో పదేళ్ల బీఆర్ఎస్ పాలన తర్వాత పార్టీకి, ప్రజలకు మధ్య ఏర్పడిన దూరాన్ని తగ్గించుకోవాల్సిన అవసరం కూడా ఉంది.
గతంలో తమ పాలనలో ప్రజలకు, పార్టీకి మధ్య కొంత దూరం పెరిగిందని కేటీఆర్ స్వయంగా అంగీకరించారు. ఆ లోటును భర్తీ చేసేందుకు నేరుగా ప్రజల్లోకి వెళ్లడం అవసరమని చెప్పారు. అందుకే ఈ పాదయాత్రకు రాజకీయంగా ప్రాధాన్యం ఏర్పడుతోంది.
కేటీఆర్ తర్వాత కేసీఆర్ బస్సు యాత్ర?
కేటీఆర్ పాదయాత్ర తర్వాత కేసీఆర్ కూడా బస్సు యాత్ర చేపట్టే ఆలోచనలో ఉన్నట్లు కేటీఆర్ గతంలో వెల్లడించారు. 2027 మార్చి, ఏప్రిల్ నుంచి కేటీఆర్ పాదయాత్ర, ఆ తర్వాత కేసీఆర్ బస్సు యాత్ర ఉండొచ్చని ఆయన సంకేతాలిచ్చారు.
ఇది కార్యరూపం దాలిస్తే బీఆర్ఎస్‌కు రాష్ట్రవ్యాప్తంగా నిరంతర రాజకీయ చైతన్యం తీసుకురావడానికి అవకాశం ఉంటుంది. ఒకవైపు కేటీఆర్ యువత, రైతులు, వివిధ వర్గాలతో మమేకమవుతుంటే, మరోవైపు కేసీఆర్ తన రాజకీయ అనుభవంతో పార్టీ శ్రేణుల్లో ఉత్సాహం నింపే ప్రయత్నం చేయవచ్చు.
2028 ఎన్నికలే అసలు టార్గెటా?
బీఆర్ఎస్‌కు ఇప్పుడు ప్రధాన సవాల్ కాంగ్రెస్ ప్రభుత్వాన్ని విమర్శించడం మాత్రమే కాదు. ప్రజల్లో తిరిగి విశ్వాసాన్ని సంపాదించుకోవడం. అసెంబ్లీ ఎన్నికల్లో ఓటమి తర్వాత పార్టీ క్యాడర్‌లో కొత్త ఉత్సాహం నింపడం, క్షేత్రస్థాయిలో బలమైన వ్యవస్థను నిర్మించడం కూడా అంతే ముఖ్యం. కేటీఆర్ పాదయాత్ర ఈ రెండు లక్ష్యాలను చేరుకోవడానికి ఉపయోగపడుతుందా అన్నది ఆసక్తికరం. మరి.. ప్రజలు తమ సమస్యలను చెప్పుకునే వేదికగా ఈ యాత్ర మారుతుందా? ప్రభుత్వంపై ఒత్తిడి పెంచగలదా? బీఆర్ఎస్‌కు రాజకీయంగా కొత్త ఊపిరి పోస్తుందా? అన్నదే ఇప్పుడు కీలకం.
