బాలీవుడ్ నటి, మండి నియోజకవర్గ బీజేపీ ఎంపీ కంగనా రనౌత్ సోషల్ మీడియా వేదికగా చేసిన సంచలన వ్యాఖ్యలు తీవ్ర రాజకీయ దుమారానికి దారితీశాయి. గాంధీ కుటుంబాన్ని లక్ష్యంగా చేసుకుని అభ్యంతరకర, రెచ్చగొట్టే రీతిలో పోస్టులు పెట్టారన్న ఆరోపణలపై హిమాచల్‌ప్రదేశ్ పోలీసులు ఆమెపై ఎఫ్‌ఐఆర్ (FIR) నమోదు చేశారు. రిటైర్డ్ కెప్టెన్ అతుల్ శర్మ ఇచ్చిన ఫిర్యాదు ఆధారంగా నవంబర్ 13న షిమ్లా పోలీసులు భారతీయ న్యాయ సంహిత (BNS)లోని 196(1)(బి), 353(2), 356(2) సెక్షన్ల కింద కేసు నమోదు చేసి దర్యాప్తు చేపట్టారు.
కంగనా చేసిన వ్యాఖ్యలు ప్రజల్లో విద్వేషాలను రెచ్చగొట్టేలా ఉన్నాయని, శాంతిభద్రతలకు తీవ్ర విఘాతం కలిగించే ప్రమాదం ఉందని ఫిర్యాదుదారు తన కంప్లైంట్‌లో స్పష్టంగా పేర్కొన్నారు. ఫిర్యాదు వివరాల ప్రకారం.. నవంబర్ 10న కంగనా రనౌత్ తన అధికారిక సోషల్ మీడియా ఖాతాలో గాంధీ కుటుంబంపై వరుస పోస్టులు చేశారు. దివంగత మాజీ ప్రధాని ఇందిరాగాంధీ, ఆమె కుమారులు సంజయ్ గాంధీ, మాజీ ప్రధాని రాజీవ్ గాంధీల అకాల మరణాలపై ఆ పోస్టుల్లో అత్యంత రెచ్చగొట్టే వ్యాఖ్యలు ఉన్నాయని అతుల్ శర్మ ఆరోపించారు.
ముఖ్యంగా కాంగ్రెస్ పార్లమెంటరీ పార్టీ ఛైర్‌పర్సన్ సోనియా గాంధీని 'మిస్టీరియస్ ఫారిన్ నేషనల్' (అంతుచిక్కని విదేశీ పౌరురాలు) అంటూ కంగనా అభివర్ణించడంపై తీవ్ర అభ్యంతరం వ్యక్తం చేశారు. గాంధీ కుటుంబంలో వరుస మరణాలు సంభవించిన తర్వాతే సోనియా గాంధీ ప్రభుత్వ పగ్గాలు చేపట్టేలా పరిణామాలు జరిగాయన్న అనుమానం కలిగేలా పోస్టులు పెడుతూ, దానికి 'హౌ కన్వీనియెంట్' (ఎంత అనుకూలమో) అంటూ వ్యంగ్య వ్యాఖ్యలు జతచేశారని ఫిర్యాదులో వివరించారు.
అంతేకాకుండా, సంజయ్ గాంధీ మరణించిన తర్వాత ఆయన సతీమణి మేనకా గాంధీని కుటుంబ నివాసం నుంచి బయటకు పంపించేశారంటూ కంగనా చేసిన వ్యక్తిగత ఆరోపణలను కూడా ఫిర్యాదుదారు ప్రస్తావించారు. ఇవి సాధారణ రాజకీయ విమర్శల పరిధిని దాటిపోయాయని, తప్పుదోవ పట్టించే సమాచారంతో ప్రజల మధ్య విద్వేషాలు పెంచి సామాజిక సామరస్యాన్ని దెబ్బతీసేలా ఉన్నాయని పేర్కొన్నారు. ఇటీవలే సోనియా గాంధీ భారత పౌరసత్వం పొందిన సమయంపై కూడా కంగనా తన ఇన్‌స్టాగ్రామ్ స్టోరీలో వరుస ప్రశ్నలు లేవనెత్తిన విషయం తెలిసిందే.
1983లో వివాహం తర్వాత ఆమె భారత పౌరసత్వం తీసుకున్న అంశాన్ని ప్రస్తావిస్తూ కంగనా చేసిన ఆరోపణలు అప్పట్లోనే పెద్ద ఎత్తున చర్చకు దారితీశాయి. తాజాగా షిమ్లాలో ఎఫ్‌ఐఆర్ నమోదు కావడంతో ఈ రాజకీయ వివాదం మరింత ముదిరింది. కంగనా రనౌత్ పోస్టుల వెనుక ఉన్న ఉద్దేశాలు, వాటిలోని నిజానిజాలపై హిమాచల్‌ప్రదేశ్ పోలీసులు లోతుగా విచారణ కొనసాగిస్తున్నారు.
