రాష్ట్రంలో శీతాకాలం ప్రభావం తీవ్రతరం అవుతోంది. రాబోయే రెండు రోజుల పాటు రాష్ట్రవ్యాప్తంగా రాత్రి పూట కనిష్ఠ ఉష్ణోగ్రతలు సాధారణం కంటే 2 నుంచి 3 డిగ్రీల సెల్సియస్ మేర పడిపోయే అవకాశం ఉందని హైదరాబాద్ వాతావరణ కేంద్రం శుక్రవారం కీలక ప్రకటన విడుదల చేసింది. ఉత్తర, ఈశాన్య దిశల నుంచి వీస్తున్న చల్లని పొడి గాలుల ప్రభావంతో చలి తీవ్రత మరింత పెరగనుందని, ఈ సమయంలో రాష్ట్రంలో ప్రధానంగా పొడి వాతావరణం కొనసాగుతుందని వాతావరణ శాఖ అధికారులు స్పష్టం చేశారు.
ఉష్ణోగ్రతలు అకస్మాత్తుగా తగ్గుముఖం పడుతున్న నేపథ్యంలో ప్రజల ఆరోగ్య రక్షణ దృష్ట్యా తెలంగాణ వైద్యారోగ్య శాఖ అప్రమత్తమైంది. ప్రజారోగ్య, కుటుంబ సంక్షేమ శాఖ డైరెక్టర్ డాక్టర్ బి. రవీందర్ నాయక్ రాష్ట్ర ప్రజలకు ప్రత్యేక హెల్త్ అడ్వైజరీని జారీ చేశారు. వాతావరణంలో ఆకస్మిక మార్పుల వల్ల సీజనల్ ఫ్లూ, జలుబు, తీవ్రమైన శ్వాసకోశ సంబంధిత వ్యాధులు ప్రబలే ప్రమాదం ఉందని ఆయన హెచ్చరించారు.
ముఖ్యంగా ఐదేళ్లలోపు చిన్నారులు, 65 ఏళ్లు దాటిన వృద్ధులు, గర్భిణీ స్త్రీలతో పాటు ఆస్తమా, గుండె జబ్బులు వంటి దీర్ఘకాలిక వ్యాధులతో బాధపడేవారు అత్యంత అప్రమత్తంగా ఉండాలని రవీందర్ నాయక్ సూచించారు. ఉదయం, రాత్రి వేళల్లో బయటకు వెళ్లేటప్పుడు తప్పనిసరిగా ఉన్ని దుస్తులు, స్వెటర్లు, మఫ్లర్లు ధరించాలని తెలిపారు. ఎవరికైనా జ్వరం, పొడి దగ్గు, గొంతునొప్పి, ఒళ్లు నొప్పులు, తీవ్రమైన అలసట వంటి లక్షణాలు కనిపిస్తే ఏమాత్రం నిర్లక్ష్యం చేయకుండా వెంటనే సమీపంలోని ప్రభుత్వ ఆసుపత్రిలో వైద్యులను సంప్రదించాలని స్పష్టం చేశారు.
వ్యాధుల వ్యాప్తిని అరికట్టేందుకు ప్రజలు వ్యక్తిగత పరిశుభ్రత పాటించాలని అధికారులు విజ్ఞప్తి చేశారు. దగ్గినప్పుడు, తుమ్మినప్పుడు ముక్కు, నోటికి రుమాలు లేదా టిష్యూ పేపర్ అడ్డు పెట్టుకోవాలని, చేతులను తరచూ సబ్బు లేదా శానిటైజర్‌తో శుభ్రం చేసుకోవాలని సూచించారు. అనారోగ్య లక్షణాలు ఉన్నవారు జనసమూహాలు ఉండే బహిరంగ ప్రదేశాలకు వెళ్లకూడదని, గోరువెచ్చని నీరు తాగుతూ పోషకాహారం తీసుకోవాలని పేర్కొన్నారు. ఎలాంటి అత్యవసర వైద్య పరిస్థితులు ఎదురైనా 108 అంబులెన్స్ సేవలను వినియోగించుకోవాలని వైద్యారోగ్య శాఖ వెల్లడించింది.
