AP LocalBody Elections: ఆంధ్రప్రదేశ్ పరిషత్ ఎన్నికల ఫలితాలు రాజకీయ వర్గాలను తీవ్ర దిగ్భ్రాంతికి గురిచేస్తున్నాయి. మొన్నటి మున్సిపల్ ఎన్నికల ఊపును కొనసాగిస్తూ కూటమి భారీగా స్థానాలను చేజిక్కించుకోగా, వైఎస్సార్‌సీపీ అధినేత జగన్మోహన్ రెడ్డి సొంత ఇలాకా అయిన పులివెందుల జెడ్పీటీసీ స్థానాన్ని సైతం టీడీపీ కైవసం చేసుకోవడం రాష్ట్రాన్నే కుదిపేసింది. అయితే, దశాబ్దాలుగా తిరుగులేని కంచుకోటగా ఉన్న పులివెందులలోనే ఫ్యాన్ పార్టీ కుప్పకూలిపోవడం వెనుక ఉన్నది నిజమైన ప్రజా తీర్పేనా లేక అధికార బలంతో నడిచిన భారీ రిగ్గింగ్ మాయాజాలమా అనే సరికొత్త అనుమానాలు ఇప్పుడు తీవ్ర చర్చకు దారితీస్తున్నాయి.
పులివెందులలో ఓటమి.. నమ్మశక్యం కాని పరిణామం!
వైఎస్ కుటుంబానికి పులివెందుల అనేది ఒక రాజకీయ నియోజకవర్గం మాత్రమే కాదు.. దశాబ్దాల కాలంగా వారి వెన్నంటి నిలిచిన అభేద్యమైన కోట. అలాంటి నేలపై వైసీపీ జెడ్పీటీసీ స్థానాన్ని కోల్పోవడం విపక్ష శ్రేణుల్లో అనేక అనుమానాలకు ఆజ్యం పోస్తోంది. స్థానికంగా ఎంతటి వ్యతిరేకత ఉన్నప్పటికీ, పులివెందుల గడ్డపై ఇంతటి ఘోర పరాభవం ఎదురుకావడం వెనుక తెరవెనుక పెద్ద కుట్ర జరిగిందన్న ఆరోపణలు వినవస్తున్నాయి.
పోలీసు యంత్రాంగాన్ని, అధికార యంత్రాంగాన్ని అడ్డం పెట్టుకుని పోలింగ్ కేంద్రాలను గుప్పిట్లోకి తీసుకున్నారని, బోగస్ ఓటింగ్, రిగ్గింగ్‌కు పాల్పడటం వల్లే ఫలితాలు తారుమారయ్యాయని విపక్ష నేతలు అనుమానాలు వ్యక్తం చేస్తున్నారు.
అంకెల్లో ‘ఏకపక్ష’ తీర్పు.. ప్రశ్నార్థకంగా మారిన లెక్కింపు!
రాష్ట్రవ్యాప్తంగా వెలువడిన ఫలితాలను పరిశీలిస్తే, కూటమి సాధించిన సంఖ్యాబలం మునుపెన్నడూ చూడని రీతిలో ఉంది. 659 జెడ్పీటీసీ స్థానాల్లో 77 ఏకగ్రీవం కాగా, పోలింగ్ జరిగిన 582 స్థానాల్లో కూటమి ఏకంగా 473 స్థానాలను గెలుచుకుంది. వైసీపీ కేవలం 57 స్థానాలకే పరిమితమైంది. అర్ధరాత్రి దాటిన తర్వాత వెల్లడైన ఈ ఫలితాల తీరుపైనే ప్రధానంగా విమర్శలు వెల్లువెత్తుతున్నాయి. 7,767 ఎంపీటీసీ స్థానాలకు పోలింగ్ జరగ్గా, కూటమి ఏకపక్షంగా 5,819 స్థానాలు కొల్లగొట్టింది. బలమైన పునాదులున్న ప్రాంతాల్లో సైతం విపక్ష అభ్యర్థులు డిపాజిట్లు కోల్పోయేలా ఫలితాలు రావడం వెనుక రిగ్గింగ్ ప్రభావిత ఓటింగ్ జరిగిందనే వాదనకు బలం చేకూరుతోంది.
ప్రజాస్వామ్య బద్ధంగా జరిగిందా? దౌర్జన్యాలతో లాక్కున్నారా?
ఒకవైపు కూటమి వర్గాలు దీన్ని తమ పాలనకు ప్రజలు ఇచ్చిన తిరుగులేని తీర్పుగా సంబరాలు చేసుకుంటున్నాయి. గ్రామీణ ప్రాంత ప్రజలు మార్పు కోరుకున్నారని, గతంలో జగన్ పాలనపై ఉన్న అసంతృప్తే ఈ ఫలితాలకు కారణమని సమర్థించుకుంటున్నాయి. మరోవైపు, ఇది ప్రజా తీర్పు కాదని.. పథకం ప్రకారం రిగ్గింగ్ చేసి, ప్రతిపక్ష ఏజెంట్లను భయభ్రాంతులకు గురిచేసి దక్కించుకున్న విజయమని ప్రత్యర్థులు గళమెత్తుతున్నారు. సొంతగడ్డపైనే ఇంతటి మార్పు నిజంగా సాధ్యమా లేక తెరవెనుక భారీ తంత్రం నడిచిందా అన్నది తేలాలంటే సమగ్ర విచారణ జరగాలనే డిమాండ్లు తెరపైకి వస్తున్నాయి. రాజకీయాల్లో కంచుకోటలు బద్దలవడం సహజమే అయినా.. పులివెందుల వంటి కంచుకోట నేలమట్టం కావడం వెనుక రిగ్గింగ్ ఆరోపణల నీలినీడలు కమ్ముకోవడం ఈ ఎన్నికల ఫలితాలపై సందేహాలను మిగిల్చింది.
