భాగ్యనగరంలో గణేష్ నవరాత్రోత్సవాల సందర్భంగా ఒక సరికొత్త రాజకీయ-ఆధ్యాత్మిక థీమ్ నెటిజన్లను, భక్తులను విశేషంగా ఆకట్టుకుంటోంది. తెలంగాణలో కాంగ్రెస్ ప్రభుత్వం చేపడుతున్న సంక్షేమ, అభివృద్ధి కార్యక్రమాలకు మద్దతుగా హైదరాబాద్లో కాంగ్రెస్ నేత మెట్టు సాయి కుమార్ ఆధ్వర్యంలో వినూత్న గణేష్ మండపాన్ని ఏర్పాటు చేశారు. కాంగ్రెస్ పార్టీ చేపట్టిన 1000 రోజుల ప్రజాపాలనకు ప్రతీకగా ఈ ప్రత్యేక మండపాన్ని తీర్చిదిద్దడం నగరంలో తీవ్ర చర్చనీయాంశంగా మారింది.
ఈ వినాయక మండపంలో ఏర్పాటు చేసిన ప్రతిమ ప్రత్యేక ఆకర్షణగా నిలిచింది. 'బాహుబలి' సినిమాలోని సన్నివేశాన్ని తలపించేలా.. ముఖ్యమంత్రి రేవంత్ రెడ్డి స్వయంగా భుజాలపై విఘ్నేశ్వరుడి విగ్రహాన్ని ఎత్తుకున్నట్లుగా ఈ భారీ ప్రతిమను రూపొందించారు. ప్రభుత్వం చేపట్టిన వినూత్న పథకాలు, సంక్షేమ ఫలాలు, అభివృద్ధి కార్యక్రమాల 1000 రోజుల ప్రగతికి చిహ్నంగా ఈ థీమ్ను డిజైన్ చేసినట్లు నిర్వాహకులు వెల్లడించారు.
రాష్ట్రంలో ప్రజాపాలన అందిస్తున్న తీరుకు, విఘ్నేశ్వరుడి ఆశీస్సులకు ముడిపెడుతూ రూపొందించిన ఈ బాహుబలి గణనాథుడిని తిలకించేందుకు నగరంలోని వివిధ ప్రాంతాల నుంచి జనాలు పెద్ద ఎత్తున తరలివస్తున్నారు. కాంగ్రెస్ నాయకులు, కార్యకర్తలు, స్థానిక ప్రజలతో ఉత్సవ ప్రాంగణం నిత్యం కోలాహలంగా మారుతోంది. రేవంత్ రెడ్డి విఘ్నేశ్వరుడిని ఎత్తుకున్న ఈ విగ్రహం సోషల్ మీడియాలో కూడా వైరల్గా మారింది.
గణేష్ ఉత్సవాల వేదికగా వినూత్న రీతిలో ప్రభుత్వ అభివృద్ధి కార్యక్రమాలను ప్రజాబాహుళ్యంలోకి తీసుకెళ్లేలా రూపుదిద్దిన ఈ మండపం పట్ల పలువురు హర్షం వ్యక్తం చేస్తున్నారు. ఎలాంటి ఆటంకాలు లేకుండా ప్రజాపాలన నిరంతరం కొనసాగాలని స్వామివారిని వేడుకుంటున్నట్లు ఉత్సవ కమిటీ ప్రతినిధులు తెలిపారు. సందర్శకుల రద్దీకి అనుగుణంగా మండపం వద్ద ప్రత్యేక ఏర్పాట్లు చేశారు.
