బంగాళాఖాతంలో ఏర్పడిన తీవ్ర వాయుగుండం మరింత బలపడి 'మురసు' (Murasu) తుపానుగా రూపాంతరం చెందింది. ప్రస్తుతం ఇది తీవ్ర రూపం దాల్చి ఆంధ్రప్రదేశ్ తీరం వైపు అత్యంత వేగంగా దూసుకొస్తుండటంతో, భారత వాతావరణ శాఖ (IMD) దక్షిణ కోస్తాంధ్రతో పాటు ఉత్తర తమిళనాడు తీర ప్రాంతాలకు అత్యవసర హెచ్చరికలు జారీ చేసింది. ఈ తుపాను తీవ్రత వల్ల ఏపీలోని పలు జిల్లాల్లో భారీ నుంచి అత్యంత భారీ వర్షాలతో పాటు గంటకు 120 కిలోమీటర్ల వేగంతో భీకర ఈదురుగాలులు వీచే అవకాశం ఉందని అధికారులు అప్రమత్తం చేస్తున్నారు.
ఐఎండీ తాజా సమాచారం ప్రకారం, ఆదివారం ఉదయం 11:30 గంటల సమయానికి ఈ 'మురసు' తుపాను నైరుతి, దానికి ఆనుకుని ఉన్న పశ్చిమ మధ్య బంగాళాఖాతంలో కేంద్రీకృతమై ఉంది. ఇది చెన్నైకి తూర్పు ఆగ్నేయంగా 560 కిలోమీటర్లు, నెల్లూరుకు 630 కిలోమీటర్లు, మచిలీపట్నానికి 640 కిలోమీటర్లు , విశాఖపట్నానికి 660 కిలోమీటర్ల దూరంలో కేంద్రీకృతమై ఉంటూ గడిచిన ఆరు గంటల్లో గంటకు 23 కిలోమీటర్ల వేగంతో పశ్చిమ వాయవ్య దిశగా పయనిస్తోంది.
వాతావరణ శాస్త్రవేత్తల అంచనాల ప్రకారం.. 'మురసు' తుపాను రానున్న 24గంటల్లో మరింత తీవ్రరూపం దాల్చి తీవ్ర తుపానుగా (Severe Cyclonic Storm) మారనుంది. అనంతరం నవంబర్ 2వ తేదీ రాత్రి నుంచి నవంబర్ 3వ తేదీ తెల్లవారుజాము మధ్య దక్షిణ ఆంధ్రప్రదేశ్ తీరంలో ఉన్న నెల్లూరు - నర్సాపురం మధ్య అత్యంత తీవ్ర రూపంతో తీరం దాటే అవకాశం ఉందని ఐఎమ్‌డీ వెల్లడించింది.
తీరం దాటే సమయంలో గంటకు 100 నుంచి 110 కిలోమీటర్ల వేగంతో ఈదురుగాలులు వీస్తాయని, గరిష్ఠంగా ఇవి 120 కిలోమీటర్ల వేగాన్ని అందుకుంటాయని హెచ్చరించారు. ఈ భయానక వాతావరణ పరిస్థితుల నేపథ్యంలో ఆంధ్రప్రదేశ్ ప్రభుత్వం తీరప్రాంత జిల్లాల యంత్రాంగాన్ని ముందస్తుగా సిద్ధం చేసింది. మత్స్యకారులు ఎవ్వరూ సముద్రంలోకి వేటకు వెళ్లవద్దని, ఇప్పటికే సముద్రంలో ఉన్నవారు వెంటనే సమీప సురక్షిత తీరాలకు చేరుకోవాలని స్పష్టమైన ఆదేశాలు జారీ చేశారు.
