అంతర్జాతీయం

అంతరిక్షంలో అమెజాన్‌కు ఎదురుదెబ్బ: యూఎల్‌ఏ వల్కన్ రాకెట్ ప్రయోగం విఫలం!

5 నిమిషాల పఠనం

అంతరిక్ష ప్రయోగాల రంగంలో ప్రఖ్యాతి గాంచిన యునైటెడ్ లాంచ్ అలయన్స్ (ULA) సంస్థకు ఊహించని రీతిలో భారీ ఎదురుదెబ్బ తగిలింది. దిగ్గజ ఈ-కామర్స్ సంస్థ అమెజాన్‌కు చెందిన 40లియో బ్రాడ్‌బ్యాండ్ ఉపగ్రహాలను అంతరిక్ష కక్ష్యలోకి మోసుకెళ్తున్న 'వల్కన్' రాకెట్ ప్రయోగం విఫలమైంది.

 అంతరిక్ష ప్రయోగాల రంగంలో ప్రఖ్యాతి గాంచిన యునైటెడ్ లాంచ్ అలయన్స్ (ULA) సంస్థకు ఊహించని రీతిలో భారీ ఎదురుదెబ్బ తగిలింది. దిగ్గజ ఈ-కామర్స్ సంస్థ అమెజాన్‌కు చెందిన 40లియో బ్రాడ్‌బ్యాండ్ ఉపగ్రహాలను అంతరిక్ష కక్ష్యలోకి మోసుకెళ్తున్న 'వల్కన్' రాకెట్ ప్రయోగం విఫలమైంది. రెండు దశాబ్దాల యూఎల్‌ఏ సుదీర్ఘ చరిత్రలో ఇదే తొలి సంపూర్ణ ప్రయోగ వైఫల్యం కావడం అంతరిక్ష రంగ నిపుణులను ఆశ్చర్యానికి గురిచేస్తోంది.

 ఈ దుర్ఘటనలో అమెజాన్‌కు చెందిన 40 శాటిలైట్లు పూర్తిగా ధ్వంసం కావడంతో ఆ సంస్థ ప్రతిష్టాత్మక బ్రాడ్‌బ్యాండ్ ప్రాజెక్టుకు గట్టి షాక్ తగిలింది. ఫ్లోరిడాలోని కేప్ కెనవెరల్ స్పేస్ ఫోర్స్ స్టేషన్ నుంచి ఆదివారం మధ్యాహ్నం 12:40 గంటలకు (1740 జీఎంటీ) వల్కన్ రాకెట్ నిప్పులు చిమ్ముతూ నింగిలోకి దూసుకెళ్లింది. ప్రయోగం ఆరంభమైన పది నిమిషాల వరకు అంతా సవ్యంగానే సాగినప్పటికీ, ఆ తర్వాత రాకెట్‌లో అకస్మాత్తుగా సాంకేతిక లోపం (అనామలీ) తలెత్తినట్లు యూఎల్‌ఏ ఒక ప్రకటనలో ధృవీకరించింది.

 ఈ సమస్య కారణంగా అమెజాన్ ఉపగ్రహాలను నిర్దేశిత కక్ష్యలో ప్రవేశపెట్టలేకపోయామని స్పష్టం చేసింది. వైఫల్యానికి గల కచ్చితమైన కారణాలపై ఇప్పుడే ఒక అంచనాకు రాలేమని, అమెజాన్ నిపుణులతో కలిసి లోతైన దర్యాప్తు చేపట్టి, వీలైనంత త్వరగా తిరిగి ప్రయోగాలకు సిద్ధమవుతామని పేర్కొంది. 'వల్కన్ లియో 1 (LV-01)' పేరిట చేపట్టిన ఈ మిషన్, అమెజాన్ రూపొందిస్తున్న లియో శాటిలైట్ ఇంటర్నెట్ నెట్‌వర్క్ (గతంలో ప్రాజెక్ట్ కైపర్) కోసం యూఎల్‌ఏతో కుదుర్చుకున్న 38 ప్రయోగాల్లో మొట్టమొదటిది.

 ఒకే ప్రయోగంలో ఏకంగా 40 అమెజాన్ ఉపగ్రహాలను అంతరిక్షంలోకి పంపడం కూడా ఇదే తొలిసారి. ప్రపంచవ్యాప్తంగా హై-స్పీడ్ ఇంటర్నెట్ సేవలు అందించే లక్ష్యంతో అమెజాన్ 3,200కు పైగా శాటిలైట్లతో భారీ నెట్‌వర్క్‌ను నిర్మిస్తోంది. ఇప్పటివరకు ఇతర రాకెట్ల సాయంతో దాదాపు 400 ఉపగ్రహాలను కక్ష్యలోకి పంపగా, ఎలాన్ మస్క్ సంస్థ స్పేస్‌ఎక్స్ స్టార్‌లింక్‌కు గట్టి పోటీగా భావిస్తున్న ఈ ప్రాజెక్టుకు తాజా వైఫల్యం తాత్కాలిక అడ్డంకిగా మారింది.

 అయితే, ఈ ప్రయోగ వైఫల్యంపై అమెజాన్ లియో విభాగం సానుకూలంగా స్పందించింది. అంతరిక్ష ప్రయోగాల్లో, ముఖ్యంగా తొలి దశ మిషన్లలో ఇలాంటి రిస్క్ సహజమేనని వ్యాఖ్యానించింది. ఈ అనుభవం నుంచి యూఎల్‌ఏ తగిన పాఠాలు నేర్చుకుని, భవిష్యత్ ప్రణాళికలను విజయవంతంగా పూర్తి చేస్తుందని విశ్వాసం వ్యక్తం చేసింది. గతంలో సాలిడ్ రాకెట్ బూస్టర్ల లోపం వల్ల తొమ్మిది నెలలు వాయిదా పడిన ఈ ప్రయోగంలో, ఈసారి బూస్టర్లు సరిగ్గానే పనిచేసినా రాకెట్ పైభాగంలో (అప్పర్ స్టేజ్) సాంకేతిక సమస్య తలెత్తినట్లు ప్రాథమికంగా అంచనా వేస్తున్నారు.

 బోయింగ్, లాక్‌హీడ్ మార్టిన్ సంస్థల ఉమ్మడి భాగస్వామ్య సంస్థ అయిన యూఎల్‌ఏ, పాత 'అట్లాస్ V' రాకెట్ స్థానంలో భారీ బరువులను మోసుకెళ్లేందుకు వల్కన్ రాకెట్‌ను అభివృద్ధి చేసింది. దర్యాప్తు పూర్తయి దిద్దుబాటు చర్యలు తీసుకున్నాకే యూఎల్‌ఏ తదుపరి ప్రయోగాలు చేపట్టనుండగా, అమెజాన్ మాత్రం నవంబర్ చివరిలోగా 'ఏరియేన్ 6' రాకెట్ ద్వారా మరో 36 శాటిలైట్లను ప్రయోగించేందుకు సన్నద్ధమవుతోంది.

#ULAVulcanRocketFailure2026#AmazonLeoSatellitesDestroyed#ProjectKuiperRocketCrash#CapeCanaveralLaunchFailure#SpaceNewsTelugu#InternationalNewsTelugu#ScienceNewsTelugu#BreakingNewsTelugu
వాట్సాప్ ఛానెల్‌లో చేరండి

తెలుగు వాట్సాప్ చానల్‌లో చేరడానికి ఇక్కడ క్లిక్ చేయండి

గూగుల్‌లో స్వేచ్ఛను మీ ప్రాధాన్య వార్తా వనరుగా ఎంచుకోండి

తర్వాత చదవండి