అనంతపురం జిల్లా రాప్తాడు ప్రభుత్వ ఉన్నత పాఠశాలలో విద్యార్థినులపై ఎలక్ట్రిక్‌ రంపంతో దాడికి పాల్పడి సంచలనం సృష్టించిన నిందితుడు హేమంత్ మరోసారి తీవ్ర అనారోగ్యానికి గురయ్యాడు. ఇప్పటికే కాలు తొలగింపు శస్త్రచికిత్స అనంతరం కోలుకుంటున్న అతడికి తాజాగా ఊపిరితిత్తుల రక్తనాళాల్లో రక్తం గడ్డకట్టే 'పల్మనరీ ఎంబాలిజం' (Pulmonary Embolism) సమస్య తలెత్తినట్లు వైద్యులు గుర్తించారు.
శ్వాస తీసుకోవడంలో తీవ్ర ఇబ్బంది ఎదుర్కోవడంతో అప్రమత్తమైన అనంతపురం సర్వజన ఆసుపత్రి (GGH) వైద్యులు అత్యవసరంగా సీటీ స్కాన్‌ నిర్వహించి ఈ ప్రమాదకర పరిస్థితిని నిర్ధారించారు. గతంలో పోలీసుల కాల్పుల్లో తీవ్రంగా గాయపడిన హేమంత్ కుడికాలికి రక్తప్రసరణ పూర్తిగా నిలిచిపోయి ఇన్ఫెక్షన్ సోకడంతో, ప్రాణాపాయం తప్పించేందుకు వైద్యులు ఇటీవల శస్త్రచికిత్స చేసి కుడికాలును తొలగించారు.
ఆపరేషన్ అనంతరం ప్రత్యేక వైద్యబృందం పర్యవేక్షణలో చికిత్స పొందుతున్న క్రమంలో, రెండు రోజుల క్రితం అతడికి అకస్మాత్తుగా ఊపిరి ఆడక మంచంపై నుంచి కిందపడిపోయాడు. వెంటనే పరీక్షలు నిర్వహించిన వైద్యులు పల్మనరీ ఎంబాలిజం కారణంగా ఊపిరితిత్తులకు రక్తాన్ని సరఫరా చేసే నాళాల్లో రక్తపు గడ్డలు ఏర్పడినట్లు తేల్చారు. సాధారణంగా పెద్ద శస్త్రచికిత్సల అనంతరం శరీర కదలికలు తగ్గడం వల్ల రక్తనాళాల్లో రక్తం గడ్డకట్టే ప్రమాదం ఉంటుందని వైద్య నిపుణులు వివరిస్తున్నారు.
ఇలా ఏర్పడిన గడ్డలు ఊపిరితిత్తుల రక్తనాళాల్లో చిక్కుకుపోతే రక్తప్రసరణకు తీవ్ర అంతరాయం ఏర్పడి, గుండెపై విపరీతమైన ఒత్తిడి పెరుగుతుందని తెలిపారు. సకాలంలో చికిత్స అందకపోతే ఇది ప్రాణాపాయానికి దారితీసే అవకాశం ఉందని వైద్యులు స్పష్టం చేశారు. ప్రస్తుతం నిందితుడు హేమంత్‌కు అనంతపురం సర్వజన ఆసుపత్రిలో ప్రత్యేక వైద్యుల బృందం నిరంతర పర్యవేక్షణలో అత్యవసర చికిత్స అందిస్తోంది. రక్తపు గడ్డలను కరిగించే మందులతో పాటు అతడి ఆరోగ్య పరిస్థితిని, ఆక్సిజన్ స్థాయులను నిరంతరం సమీక్షిస్తూ కట్టుదిట్టమైన పోలీసు భద్రత నడుమ చికిత్స కొనసాగిస్తున్నారు.
