WomenHockeyWC: డచ్ ఆధిపత్యానికి బ్రేక్.. విశ్వవిజేతగా అర్జెంటీనా!

మహిళల హాకీ ప్రపంచ కప్‌లో అర్జెంటీనా అద్భుత ప్రదర్శనతో సంచలనం సృష్టించింది. గత నాలుగు ఎడిషన్లుగా తిరుగులేని ఆధిపత్యాన్ని చెలాయిస్తూ వరుసగా ప్రపంచ కప్ టైటిళ్లను ముద్దాడిన నెదర్లాండ్స్ జైత్రయాత్రకు ఫైనల్లో బ్రేక్ వేసింది. శనివారం రాత్రి ఎంతో ఉత్కంఠభరితంగా సాగిన ఫైనల్ పోరులో నిర్ణీత సమయం ముగిసేసరికి ఇరు జట్లు 1-1 స్కోరుతో సమంగా నిలిచాయి. దాంతో విజేతను నిర్ణయించడానికి నిర్వహించిన పెనాల్టీ షూటౌట్‌లో డచ్ జట్టుపై 3-1తేడాతో అర్జెంటీనా ఘన విజయాన్ని సాధించి, ముచ్చటగా మూడోసారి విశ్వవిజేతగా కిరీటాన్ని కైవసం చేసుకుంది.