అరెస్ట్ చేస్తారని భయమా? ఎస్ఐఆర్‌పై బీఆర్ఎస్ ఎందుకు మౌనంగా ఉంది
SIR: ఎస్ఐఆర్ ప్రక్రియ విషయంలో బీఆర్ఎస్ వైఖరిపై టీపీసీసీ చీఫ్ మహేశ్ కుమార్ గౌడ్ ప్రశ్నలు సంధించారు. సర్ ప్రక్రియకు వ్యతిరేకంగా దేశవ్యాప్తంగా ఆందోళనలు జరుగుతున్నాయని.. బీజేపీ, దాని మిత్రపక్షాలు మినహా అన్ని పార్టీలు రోడ్డెక్కాయని తెలిపారు. కానీ బీఆర్ఎస్ మాత్రం మౌనంగా ఉండటం అనేక అనుమానాలకు తావిస్తోందన్నారు. ఓటరు జాబి ప్రత్యేక సమగ్ర సవరణ (SIR) ప్రక్రియపై గాంధీభవన్‌లో మీడియాతో మాట్లాడారు మహేశ్ కుమార్ గౌడ్. ఓట్ల తొలగింపు పేరుతో ప్రజాస్వామ్య సూత్రాలను కాలరాస్తున్నారని బీజేపీపై ఫైర్ అయ్యారు.
బీజేపీతో బీఆర్ఎస్ లోపాయికారి ఒప్పందం
ఎస్ఐఆర్ ఆందోళనలో బీఆర్ఎస్ ఎక్కడుందని మహేశ్ కుమార్ గౌడ్ నిలదీశారు. సీఈసీ తప్పు చేస్తుంటే కేసీఆర్, కేటీఆర్, హరీశ్ రావు ఎందుకు మాట్లాడటం లేదని.. నిరసన కార్యక్రమం ఎందుకు చేయడం లేదని ప్రశ్నించారు. బీజేపీకి వ్యతిరేకంగా మాట్లాడితే ఈ-ఫార్ములా కేసులో అరెస్ట్ చేస్తారని భయమా? లేక కాళేశ్వరం కేసులో సీబీఐ అరెస్ట్ చేస్తుందని భయమా? అని మహేశ్ కుమార్ గౌడ్ అడిగారు. బీజేపీతో బీఆర్ఎస్ లోపాయికారి ఒప్పందం చేసుకుందని ఆయన ఆరోపించారు.