Telangana Congress: తెలంగాణ కాంగ్రెస్ నేతల్లో పదవుల పరేషాన్!

Telangana Congress: బాగా వేడిగా ఉన్నప్పుడే ఇనుమును కావాల్సిన రూపంలోకి మలుచుకోవాలి.. అలాగే అవసరం ఉన్నప్పుడే అందించే సహాయానికైనా, ఇచ్చే పదవికైనా విలువుంటుంది. సరిగ్గా సమయానికి ఆ గుర్తింపు దక్కకపోతే ఎంత పెద్ద పదవి ఇచ్చినా ఆ మజా ఉండదు. సరిగ్గా ఇప్పుడిదే పరిస్థితి తెలంగాణ కాంగ్రెస్ శ్రేణుల్లో కనిపిస్తోంది. రాష్ట్రంలో సొంత ప్రభుత్వం కొలువుదీరి ఇన్ని నెలలవుతున్నా, నామినేటెడ్ పోస్టులు, పార్టీ పదవుల భర్తీ విషయంలో అధిష్ఠానం వ్యవహరిస్తున్న తీరు నేతల్లో తీవ్ర అసహనానికి దారితీస్తోంది. ఎదురుచూసి చూసి కళ్లు కాయలు కాసి, ఆ కాయలు పళ్లై రాలిపోయే పరిస్థితి వచ్చిందంటూ హస్తం పార్టీ కేడర్ లోలోపల రగిలిపోతున్నారు.